ନୂଆଦିଲ୍ଲୀ: ପେଜର ବିସ୍ଫୋରଣ ପରେ ଓ୍ବାକି ଟକି ଧମାକା । ପୁଣି ଥରେ ଦୋହଲିଗଲା ଲେବାନନର ରାଜଧାନୀ ବେରୁଟ । ପେଜର ବିସ୍ଫୋରଣରେ ୧୨ ଜଣଙ୍କ ମୃତ୍ୟୁ ହୋଇଥିବା ବେଳେ ୨୭୦୦ରୁ ଅଧିକ ଆହତ ହୋଇଥିଲେ । ଆଜି ପୁଣି ଥରେ ଓ୍ବାକି ଟକି ବିସ୍ଫୋରଣରେ ୯ ଜଣଙ୍କ ମୃତ୍ୟୁ ହୋଇଥିବା ହିଜବୁଲ୍ଲା ଦାବି କରିଛି । ଏହା ସହ ୩୦୦ରୁ ଅଧିକ ଆହତ ହୋଇଥିବା ଜଣାପଡ଼ିଛି । ପ୍ରତ୍ୟକ୍ଷଦର୍ଶୀଙ୍କ ଅନୁସାରେ ହିଜବୁଲ୍ଲାଙ୍କ ଦ୍ଵାରା ବ୍ୟବହାର ଓ୍ଵାକି ଟକି ବେରୁଟର ଦକ୍ଷିଣ ଭାଗରେ ବିସ୍ଫୋରଣ ଘଟିଥିଲା।

ପେଜର ବ୍ଲାଷ୍ଟରେ ପ୍ରାଣ ହରାଇଥିବା ଲୋକଙ୍କ ଅନ୍ତିମ ସଂସ୍କାର ସମୟରେ ଫାଟିଥିଲା ଓ୍ବାକି ଟକି। ଅନ୍ତିମ ସଂସ୍କାରରେ ବହୁ ସଂଖ୍ୟାରେ ଲୋକଙ୍କ ଭିଡ଼ ଜମିଥିଲା। ବିଶେଷ କରି ଦକ୍ଷିଣ ଲେବାନନ ଓ ରାଜଧାନୀ ବେରୁଟର ଦକ୍ଷିଣ ଉପନଗରରେ ହିଜବୁଲ୍ଲା ଆତଙ୍କବାଦୀଙ୍କ ଦ୍ବାରା ବ୍ୟବହୃତ ଏକ ହଜାରରୁ ଅଧିକ ଓ୍ବାକି ଟିକି ବିସ୍ଫୋରଣ ଘଟିଥିବା ଜଣାପଡ଼ିଛି  । ରୟଟର୍ସର ରିପୋର୍ଟ ମୁତାବକ, ହିଜବୁଲ୍ଲା ପକ୍ଷରୁ ପାଞ୍ଚ ମାସ ପୂର୍ବେ ଏହି ଓ୍ବାକି ଟକି କିଣାଯାଇଥିଲା । ଆଉ ସେହି ସମାନ ସମୟରେ ପେଜର ମଧ୍ୟ କିଣା ଯାଇଥିଲା। 

ସୂଚନାଯୋଗ୍ୟ, ଗୋଟିଏ ଦିନ ପୂର୍ବରୁ ଲେବାନନର ଅନେକ ସ୍ଥାନରେ ହିଜବୁଲ୍ଲା ଆତଙ୍କୀ ସଂଗଠନର ସଦସ୍ୟଙ୍କ ଦ୍ଵାରା ବ୍ୟବହୃତ ପାଖାପାଖି ୧୦୦୦ ପେଜର ଅଚାନକ ବିସ୍ଫୋରଣ ଘଟିଥିଲା। ଏଥିରେ ଅତିକମରେ ୧୨ ଜଣଙ୍କ ମୃତ୍ୟୁ ଘଟିଥିବା ବେଳେ ୨୭୦୦ରୁ ଅଧିକ ଆହତ ହୋଇଛନ୍ତି। ଏହି ଆକ୍ରମଣ ପଛରେ ଇସ୍ରାଏଲ  ହାତ ରହିଥିବା ଆଶଙ୍କା କରାଯାଉଛି। ତେବେ ଏହି ଆକ୍ରମଣ ପାଇଁ ନିଜକୁ ଦାୟୀ କରିନି କିମ୍ବା ଇସ୍ରାଏଲୀ ସେନା ପକ୍ଷରୁ କୌଣସି ଟିପ୍ପଣୀ ଦିଆଯାଇନାହିଁ । 

ଅନ୍ୟପଟେ ହିଜବୁଲ୍ଲା ବୁଧବାର ଲେବାନନର ଦକ୍ଷିଣ ଭାଗରୁ ଇସ୍ରାଏଲର ତୋପଖାନା ଆଡ୍ଡା ଉପରେ ଘନ ଘନ ରକେଟ୍ ଆକ୍ରମଣ କରିଛି। ପେଜର ଆକ୍ରମଣ ପରେ ଲେବାନନର ଇସ୍ରାଏଲ ଉପରେ ଏହା ସିଧା ଆକ୍ରମଣ ଥିଲା। ପେଜର ବିସ୍ଫୋରଣ ପରେ ଲେବାନନ ଏବଂ ଇସ୍ରାଏଲ ମଧ୍ୟରେ ଉତ୍ତେଜନା ବୃଦ୍ଧି ପାଇଛି ।