ଭୁବନେଶ୍ୱର,୧୯/୦୯: ଛାତ୍ରୀଙ୍କୁ ଯୌନ ନିର୍ଯାତନା ଦେଇଥିବା ଉତ୍କଳ ବିଶ୍ୱବିଦ୍ୟାଳୟର  ଅର୍ଥନୀତି ବିଭାଗର ଆସୋସିଏଟ୍‌ ପ୍ରଫେସରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ  କରାଯାଇଛି । ବୁଧବାର ତାଙ୍କୁ ନିଲମ୍ବିତ କରିଛନ୍ତି ବିଶ୍ୱବିଦ୍ୟାଳୟ କର୍ତ୍ତୃପକ୍ଷ । ଆଭ୍ୟନ୍ତରୀଣ  ଅଭିଯୋଗ କମିଟି (ଆଇସିସି)ର ରିପୋର୍ଟ ଆଧାରରେ ଏହି ପଦକ୍ଷେପ ନିଆଯାଇଛି ।  ନିଲମ୍ବନ ପରେ ତାଙ୍କୁ ମୁଖ୍ୟାଳୟ ନ ଛାଡ଼ିବାକୁ ନିର୍ଦ୍ଦେଶ ଦିଆଯାଇଛି । ଅପରପକ୍ଷେ,  ଯୌନ ନିର୍ଯାତନା ଅଭିଯୋଗର ବିସ୍ତୃତ ରିପୋର୍ଟ ଦେବାକୁ ମଙ୍ଗଳବାର ରାଜଭବନ ପକ୍ଷରୁ  କୁଳପତିଙ୍କୁ ଚିଠି କରାଯାଇଛି । 

ଅଭିଯୋଗ ଅନୁସାରେ, ଅଗଷ୍ଟ ୧୬ ତାରିଖ ଅପରାହ୍ଣ  ୨ଟାରେ ସମ୍ପୃକ୍ତ ପ୍ରଫେସର ନିଜ ଚ୍ୟାମ୍ବରରେ ଥିଲେ । ଠିକ୍‌ ସେହି ସମୟରେ ଅର୍ଥନୀତି  ବିଭାଗର ଜଣେ ଛାତ୍ରୀ ବହି ଆଣିବାକୁ ପ୍ରଫେସରଙ୍କ ଚ୍ୟାମ୍ବରକୁ ଯାଇଥିଲେ । ଛାତ୍ରୀଙ୍କୁ ଦେଖି  ପ୍ରଫେସର ତାଙ୍କୁ ପାଖରେ ବସିବା ପାଇଁ କହିଥିଲେ । ଛାତ୍ରୀ ବସିବା ପରେ ପ୍ରଫେସର  ତାଙ୍କୁ ଅସଦାଚରଣ କରିଥିଲେ ବୋଲି ସେ ଅଭିଯୋଗ ଆଣିଥିଲେ । ଏହି ଘଟଣାର ପ୍ରାୟ ୨୫ ଦିନ ପରେ ଆସୋସିଏଟ ପ୍ରଫେସରଙ୍କ କଳାକାରନାମା ପଦାକୁ ଆସିଥିଲା ।  ଏପରିକି ଛାତ୍ରୀ ଏ ନେଇ ବିଶ୍ୱବିଦ୍ୟାଳୟ କୁଳପତି ଓ ସେକ୍ସୁଆଲ ହାରାସ୍‌ମେଣ୍ଟ୍‌ ସେଲ୍‌କୁ  ଅଭିଯୋଗ କରିଥିଲେ ହେଁ ତାଙ୍କୁ ନ୍ୟାୟ ମିଳିନଥିଲା । ଏହାକୁ ଚପାଇଦେବାକୁ ଉଦ୍ୟମ  ହେଉଥିବା ଛାତ୍ରୀ ଅଭିଯୋଗ କରିଥିଲେ । ଘଟଣାଟି ଲୋକଲୋଚନକୁ ଆସିବା ପରେ  ମାନବାଧିକାର କର୍ମୀ ଜୟନ୍ତ କୁମାର ଦାସ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ବିରୋଧରେ  ରାଜ୍ୟପାଳଙ୍କ ନିକଟରେ ଫେରାଦ ହୋଇ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କୁ ଦାୟୀ କରିଥିଲେ ।