ବୋରିଗୁମ୍ମା, ୨୬/୦୧ : ମିଳିଲାନି ମହାପ୍ରୟାଣ ଗାଡି। ୨୦ କିଲୋମିଟର କାନ୍ଧରେ ବୁହା ହେଲା ଶବ। କୋରାପୁଟ ଜିଲ୍ଲା ବୋରିଗୁମ୍ମା ବ୍ଲକ ପୁରୁନିଗୁଡାରେ ଏଭଳି ଘଟଣା ଘଟିଛି। ପୁରୁନିଗୁଡାରୁ ନବରଙ୍ଗପୁର ଜିଲ୍ଲା ନନ୍ଦାହାଣ୍ଡି ବ୍ଲକ ଫୁଫୁଗାଁକୁ ପ୍ରାୟ ୨୦ କି.ମି ବୁହା ହେଲା ଶବ। 

ସୂଚନାନୁଯାୟୀ, କୋରାପୁଟ ଜିଲ୍ଲା ବୋରିଗୁମ୍ମା ବ୍ଲକ ଅନ୍ତର୍ଗତ କୁମଲି ଗ୍ରାମପଞ୍ଚାୟତ ନିକଟ ପୁରୁନିଗୁଡା ଗ୍ରାମର କରୁନା ଆମନାତ୍ୟ ନବରଙ୍ଗପୁର ଜିଲ୍ଲା ନନ୍ଦାହାଣ୍ଡି ବ୍ଲକ ଫୁପୁଗାଁର ଅଭି ଆମନାତ୍ୟଙ୍କୁ ବିବାହ କରିଥିଲେ। ବିବାହ ପରେ ତାଙ୍କର ଗୋଟିଏ ପୁଅ ଏବଂ ଦୁଇଟି ଝିଅ ଅଛନ୍ତି । ସାନ ଝିଅ ଜନ୍ମକୁ ୩ ମାସ ହେଇଥିବାରୁ କରୁନା ଆମନାତ୍ୟ ତାଙ୍କ ବାପାଘର ପୁରୁନିଗୁଡାକୁ ଯାଇଥିଲେ। ପୁରୁନିଗୁଡାରେ ତାଙ୍କ ଦେହାନ୍ତ ହେଇଥିଲା। ସେଠାରୁ ଶାଶୁ ଘରକୁ ଶବ ଆଣିବାକୁ ମହାପ୍ରୟାଣ ଗାଡି ମିଳି ନଥିଲା। ତାଙ୍କର ପରିବାର ଗରିବ ଶ୍ରେଣୀର ହୋଇଥିବାରୁ କୌଣସି ଗାଡିର ବ୍ୟବସ୍ଥା କରିପାରି ନଥିଲେ । ଫଳରେ ତାଙ୍କ ସମ୍ପର୍କୀୟମାନେ ଶବକୁ ପ୍ରାୟ  ୨୦ କିଲୋମିଟର ଖଟିଆରେ ବୋହି ଜଗନ୍ନାଥପୁର ପଞ୍ଚାୟତ, ଫୁପୁଗାଁ ଠାରେ ଆଣି ଶବ ସଂସ୍କାର କରିଥିଲେ ।