ନୂଆଦିଲ୍ଲୀ, ୧୪/୦୮ : ମଧ୍ୟପ୍ରାଚ୍ୟରେ ଦେଖାଦେଇଥିବା ଅସ୍ଥିରତା ବିଶ୍ୱ ତୈଳ ବଜାର ଆଡ଼କୁ ମୁହାଁଇଲାଣି । କ୍ରମାଗତ ପଞ୍ଚମ ଦିନ ପାଇଁ ଅଶୋଧିତ ତୈଳ ଦରରେ ବୃଦ୍ଧି ଦେଖିବାକୁ ମିଳିଛି । ସୋମବାର ଏଥିରେ ୩% ବୃଦ୍ଧି ଘଟିଥିବାବେଳେ ଆଜି ଏହା ଆଉ ୨.୬୪% ମହଙ୍ଗା ହୋଇଛି । ବ୍ୟାରେଲ୍ ପିଛା ବ୍ରେଣ୍ଟ କ୍ରୁଡ୍ ଦର ୮୨.୩୦ ଡଲାରରେ ପହଞ୍ଚିଛି । ଏ ବର୍ଷ ବ୍ରେଣ୍ଟ କ୍ରୁଡ୍ ଦରରେ ସର୍ବାଧିକ ଦୈନିକ ବୃଦ୍ଧି ଦେଖିବାକୁ ମିଳିଛି । ତେବେ ଅଶୋଧିତ ତୈଳ ଦର ଏହିଭଳି ଭାବେ ବଢ଼ିଚାଲିଲେ ଆଗକୁ ସ୍ଥିତି ଭୟଙ୍କର ହୋଇପାରେ । ପୂର୍ବରୁ ହିଁ ଦରଦାମ ଚାପରେ ଲୋକେ ବୁଡ଼ି ରହିଥିବାବେଳେ ସ୍ଥିତି ଦୁର୍ବିସହ ହୋଇପାରେ ବୋଲି ବିଶେଷଜ୍ଞମାନେ ଆଶଙ୍କା ପ୍ରକାଶ କରିଛନ୍ତି ।
ଜୁଲାଇରେ ଭାରତରେ ଖୁଚୁରା ମୁଦ୍ରାସ୍ଫୀତି ୪% ତଳକୁ ଖସିଛି । ଏହା ଏବେ ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) ର ଧାର୍ଯ୍ୟ ସୀମା ତଳେ ରହିଛି । ତେବେ ବିଶ୍ୱର ବିଭିନ୍ନ ପ୍ରାନ୍ତରେ ବଢୁଥିବା ଅସ୍ଥିରତାର ପ୍ରଭାବ ଖୁବ୍ଶୀଘ୍ର ଭାରତୀୟ ବଜାରରେ ଦେଖିବାକୁ ମିଳିପାରେ । ମଧ୍ୟପ୍ରାଚ୍ୟରେ ଅଶାନ୍ତି ଯୋଗୁ ଗତ ୫ ଦିନରେ ଅଶୋଧିତ ତୈଳ ଦରରେ ନିଆଁ ଲାଗିଛି । ବଜାର ବିଶେଷଜ୍ଞଙ୍କ ଅନୁସାରେ, ବ୍ରେଣ୍ଟ କ୍ରୁଡ୍ ଦର ବ୍ୟାରେଲ ପିଛା ୯୦ ଡଲାର ପାର୍ କଲେ ଭାରତରେ ଦରଦାମ୍ ସ୍ଥିତି ଆହୁରି ଉତ୍କଟ ହେବ । ଏସ୍ଏସ୍ ୱେଲ୍ଥଷ୍ଟ୍ରିଟ୍ର ପ୍ରତିଷ୍ଠାତା ସୁଗନ୍ଧା ସଚଦେବା କୁହନ୍ତି, ଭୁ-ରାଜନୈତିକ ସମସ୍ୟା ବଢିବା ସହିତ ବ୍ରେଣ୍ଟ କ୍ରୁଡ୍ ଦର ପ୍ରାରମ୍ଭିକ ଭାବେ ବ୍ୟାରେଲ ପିଛା ୮୩ରୁ ୮୮ ଡଲାର ପର୍ଯ୍ୟନ୍ତ ଯାଇପାରେ । ଯଦି ସ୍ଥିତି ନ ସୁଧୁରେ ତେବେ ଏହା ବ୍ୟାରେଲ୍ ପିଛା ୯୫ ଡଲାର ପର୍ଯ୍ୟନ୍ତ ଯାଇପାରେ ।
ସଚଦେବା କହିଛନ୍ତି ଯେ, ଅଶୋଧିତ ତୈଳ ଦରରେ ଯଦି ୧୦ ଡଲାର ବୃଦ୍ଧି ଘଟେ ତେବେ ଘରୋଇ ମୁଦ୍ରାସ୍ଫୀତି ହାର ୦.୪% ପର୍ଯ୍ୟନ୍ତ ବଢ଼ିପାରେ । ଦେଶର ମୋଟ ଆମଦାନିରେ ଅଶୋଧିତ ତୈଳର ଅଂଶ ୨୫% ରହିଛି । ଭାରତ ଏହାର ତୈଳ ଆବଶ୍ୟକତାର ୮୦%ରୁ ଅଧିକ ଆମଦାନି କରିଥାଏ । ଅଧିକ ନିର୍ଭରତା ଅର୍ଥାତ ଯଦି ତୈଳ ମହଙ୍ଗା ହୁଏ ତେବେ ଅନେକ ଶିଳ୍ପଗୁଡ଼ିକର ଖର୍ଚ୍ଚ ବଢ଼ିବ ଏବଂ ମୁଦ୍ରାସ୍ଫୀତି ଉପରମୁହାଁ ହେବ । ଭାରତର ଉପଭୋକ୍ତା ମୂଲ୍ୟ ସୂଚକାଙ୍କ(ସିପିଆଇ)ରେ ଏବେ ଇନ୍ଧନ ଏବଂ ବିଜୁଳିର ଭାଗ ୬.୮୪% ରହିଛି ।
ଅନ୍ୟପକ୍ଷରେ, ଖାଦ୍ୟପେୟର ଦବ୍ଦବା ୪୫.୮% । ଜୁଲାଇରେ ଭାରତରେ ମୁଦ୍ରାସ୍ଫୀତି ହାର ୫ ବର୍ଷର ସର୍ବନିମ୍ନ ସ୍ତର ୩.୫୪%କୁ ଖସିଆସିଛି । କିନ୍ତୁ ଏହାସତ୍ତେ୍ୱ ସଚଦେବା ଚେତାବନି ଦେଇଛନ୍ତି ଯେ, ଅଶୋଧିତ ତୈଳ ଦରରେ ହେଉଥିବା ଲଗାତର ବୃଦ୍ଧି ସ୍ଥିତିକୁ ବିଗାଡ଼ିପାରେ । ଏଚ୍ଡିଏଫ୍ସି ସିକ୍ୟୁରିଟିଜ୍ର ବରିଷ୍ଠ ରିସର୍ଚ୍ଚ ଆନାଲିଷ୍ଟ(କମୋଡିଟିଜ୍) ସୌମିଲ ଗାନ୍ଧୀ କହିଛନ୍ତି, ସ୍ୱଳ୍ପ ସମୟ ପାଇଁ ଅଶୋଧିତ ତୈଳ ଦଳ ବ୍ୟାରେଲ ପିଛା ୮୮ରୁ ୯୨ ଡଲାର ମଧ୍ୟରେ ରହିପାରେ । ଭୁ-ରାଜନୈତିକ ସମସ୍ୟା ତେଜିଲେ ଏହା ୧୦୦ ଡଲାର ପର୍ଯ୍ୟନ୍ତ ଯାଇପାରେ ।
