ଭୁବନେଶ୍ୱର,୩୧/୦୫: ପରକୀୟା ପ୍ରୀତି ପାଇଁ ବହୁଚର୍ଚ୍ଚିତ ଟୁଙ୍ଗୁରୁ ଭୋଳର ପୁଣି ଏକ କାରନାମା ପଦାକୁ ଆସିଛି । ଏଥର ସେ ଚୋରଙ୍କ ସହ ସମ୍ପର୍କ ରଖି ପୁଲିସ ହାବୁଡ଼ରେ ପଡି଼ଛି । ଏକ ଚୋର ଗ୍ୟାଙ୍ଗ୍‌ର ସଦସ୍ୟମାନଙ୍କୁ ଅଟୋରେ ବୋହିବାରୁ ଟୁଙ୍ଗୁରୁ ଭୋଳକୁ କମିଶନରେଟ ପୁଲିସ ଗିରଫ କରିଛି । ଘଟଣାଟି ଚନ୍ଦକା ଥାନା ଅଞ୍ଚଳରେ ଘଟିଛି । 

ପୁଲିସ କହିବା ମୁତାବକ, ଟୁଙ୍ଗୁରୁ ତା’ ଅଟୋରିକ୍ସା ନେଇ ଗତକାଲି ରାତିରେ ନନ୍ଦନକାନନ-ଚନ୍ଦକା ରାସ୍ତାରେ ଯାଉଥିଲା । ପୁଲିସର ସନ୍ଦେହ ହେବାରୁ ଉକ୍ତ  ଅଟୋରିକ୍ସାକୁ ଅଟକାଇ ଯାଞ୍ଚ କରିଥିଲା । ଉକ୍ତ ଅଟୋରିକ୍ସାରୁ ୪ଜଣ ବାହାରିଲେ । ସେମାନଙ୍କ ନିକଟରୁ ଚୋରି ସାମଗ୍ରୀ ଧରାପଡିଥିଲା । ସେମାନେ ଏକ ଆପାର୍ଟମେଣ୍ଟରୁ  ଚୋରି କରି ଫେରାର୍‌ ହେଉଥିବା ପୁଲିସ ଜାଣିବାକୁ ପାଇଥିଲା । ଟୁଙ୍ଗୁରୁ ଚୋରମାନଙ୍କୁ କେବଳ ଅଟୋରେ ଚାଲାଣ କରୁଥିଲା ନା ଚୋରିରେ ତା’ର ସମ୍ପୃକ୍ତି ରହିଛି ।  ସେନେଇ ପୁଲିସ ତଦନ୍ତ ଚଳାଇଛି । ଶୁକ୍ରବାର ସମସ୍ତ ଅଭିଯୁକ୍ତଙ୍କୁ ପୁଲିସ କୋର୍ଟଚାଲଣ କରିବ।