ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଇସ୍ତଫା ଘୋଷଣା ଜାତୀୟ ରାଜଧାନୀରେ ରାଜନୈତିକ ପାଣିପାଗକୁ ଉଷ୍ମ କରିଛି । ଇସ୍ତଫା ଦେବାକୁ ଦୁଇ ଦିନ ସମୟ ନେଇଥିବାରୁ ଏବେ କେଜ୍ରିଓ୍ବାଲଙ୍କ ଉପରେ ପ୍ରଶ୍ନ ଉଠିଛି । ତେବେ ଏହାକୁ ନେଇ ବିରୋଧୀ ଦଳ ଉଠାଇଥିବା ପ୍ରଶ୍ନର ଉତ୍ତର ଦେଇଛନ୍ତି ଦିଲ୍ଲୀ ମନ୍ତ୍ରୀ ଅତିଶୀ ।

ଇସ୍ତଫା ଦେବା ପାଇଁ ଦିଲ୍ଲୀ ମୁଖ୍ୟମନ୍ତ୍ରୀଙ୍କୁ କାହିଁକି ଦୁଇ ଦିନ ଦରକାର ବୋଲି ପଚରାଯିବାରୁ ଦିଲ୍ଲୀ ମନ୍ତ୍ରୀ ଅତିଶୀ କହିଛନ୍ତି ଯେ, ଆଜି ରବିବାର, ଆସନ୍ତାକାଲି ଇଦ୍-ଇ-ମିଲାଦ ଛୁଟି, ତେଣୁ ପରବର୍ତ୍ତୀ କାର୍ଯ୍ୟ ଦିବସ ମଙ୍ଗଳବାର ଅଟେ । ଏଥିପାଇଁ ଦୁଇ ଦିନ ସମୟ ନିଆଯାଇଛି । 

ଏହା ପୂର୍ବରୁ ଦିଲ୍ଲୀ ମନ୍ତ୍ରୀ ଅତିଶୀ ମଧ୍ୟ ମୁଖ୍ୟମନ୍ତ୍ରୀ ଦୌଡରେ ଯୋଗଦେବା ନେଇ ହୋଇଥିବା କଳ୍ପନା ଜଳ୍ପନାର ଜବାବ ଦେଇଛନ୍ତି । ସେ କହିଛନ୍ତି ଯେ ଆମର ବିଧାୟକ ଦଳର ଏକ ବୈଠକ ହେବ, ଯେଉଁଥିରେ କି ପଦକ୍ଷେପ ନିଆଯିବ ଏବଂ ତାହା ସ୍ଥିର ହେବ । ନଭେମ୍ବରରେ ନିର୍ବାଚନ ହେଉ ବୋଲି ଆମେ ଚାହୁଁ । ଆମେ ବର୍ତ୍ତମାନ ଜନସାଧାରଣଙ୍କ ଠାରୁ ନିଷ୍ପତ୍ତି ଚାହୁଁଛୁ। ”

ସେ ଆହୁରି ମଧ୍ୟ କହିଛନ୍ତି ଯେ ବର୍ତ୍ତମାନ ଅରବିନ୍ଦ କେଜ୍ରିୱାଲ ଜୀ ଦିଲ୍ଲୀର ଲୋକଙ୍କ ନିଷ୍ପତ୍ତି ଚାହୁଁଛନ୍ତି । ସେ ଜାଣିବାକୁ ଚାହାଁନ୍ତି କି, ଦିଲ୍ଲୀର ଲୋକମାନେ କ’ଣ ଭାବୁଛନ୍ତି ? ଦିଲ୍ଲୀର ଲୋକମାନେ ବିଶ୍ୱାସ କରନ୍ତି ଯେ ଅରବିନ୍ଦ କେଜ୍ରିୱାଲ ସଚ୍ଚୋଟ କି ନା ?

ସୂଚନାଥାଉକି, ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଆଜି (ରବିବାର) ଘୋଷଣା କରିଛନ୍ତି ଯେ, ସେ ଦୁଇ ଦିନ ପରେ ତାଙ୍କ ପଦରୁ ଇସ୍ତଫା ଦେବେ ଏବଂ ଦିଲ୍ଲୀରେ ଶୀଘ୍ର ନିର୍ବାଚନ କରିବା ପାଇଁ ଦାବି କରିବେ । ସେ ଏହା ମଧ୍ୟ କହିଛନ୍ତି ଯେ ଯେପର୍ଯ୍ୟନ୍ତ ଦିଲ୍ଲୀର ଲୋକମାନେ ତାଙ୍କୁ ସଚ୍ଚୋଟତାର ପ୍ରମାଣପତ୍ର ନ ଦିଅନ୍ତି ସେ ପର୍ଯ୍ୟନ୍ତ ସେ ମୁଖ୍ୟମନ୍ତ୍ରୀ ପଦରେ ବସିବେ ନାହିଁ । ଏହି ସମୟ ମଧ୍ୟରେ ସେ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ, ମନୀଷ ସିସୋଦିଆ ମଧ୍ୟ ବର୍ତ୍ତମାନ କୌଣସି ପଦ ଗ୍ରହଣ କରିବେ ନାହିଁ ।