କାଣ୍ଡି ୦୨/୦୯ : ଚଳିତ ଏସିଆ କପ୍ରେ ଶନିବାର ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ ଭାରତ ଓ ଆୟୋଜକ ପାକିସ୍ତାନ ପରସ୍ପରକୁ ଭେଟିବେ । ଏହି ହାଇଭୋଲଟେଜ୍ ମୁକାବିଲାକୁ ନେଇ ସମଗ୍ର ବିଶ୍ୱ କ୍ରିକେଟ୍ପ୍ରେମୀ ଉତ୍ସୁକତାର ସହ ଅପେକ୍ଷା କରିଛନ୍ତି । ଭାରତୀୟ ସମୟ ଅପରାହ୍ଣ ୩ଟାରେ ମ୍ୟାଚ୍ ଆରମ୍ଭ ହେବ । ପାକିସ୍ତାନ ଆୟୋଜକ ରହିଥିଲେ ହେଁ ମ୍ୟାଚ୍ଟି ଶ୍ରୀଲଙ୍କାର କାଣ୍ଡି ସହରରେ ଆୟୋଜିତ ହେଉଛି । ଉଭୟ ଦେଶର ସମର୍ଥକ ଇତି ମଧ୍ୟରେ ଶ୍ରୀଲଙ୍କାରେ ପହଞ୍ଚି ମ୍ୟାଚ୍ର ମଜା ଉଠାଇବା ପାଇଁ ଅପେକ୍ଷା କରି ରହିଛନ୍ତି ।
୪ବର୍ଷ ପରେ ଉଭୟ ଦଳ ମଧ୍ୟରେ ଦିନିକିଆ ମ୍ୟାଚ୍ ଖେଳାଯିବ । ଶେଷ ଥର ପାଇଁ ୨୦୧୯ ବିଶ୍ୱକପ୍ରେ ଉଭୟ ପରସ୍ପରକୁ ଭେଟିଥିଲେ। ଏହାପରେ ଉଭୟ ଦଳ କେବଳ ଟି-ଟ୍ୱେଣ୍ଟି ଫର୍ମାଟ୍ରେ ମୁହାଁମୁହିଁ ହୋଇଛନ୍ତି ।
ଏସିଆ କପ୍ରେ ଭାରତର ରେକର୍ଡ ବେଶ୍ ଉନ୍ନତ ରହିଥିଲେ ହେଁ ପାକିସ୍ତାନକୁ ଦୁର୍ବଳ ମନେ କରିବା ମୁର୍ଖାମୀ ହେବ । ପାକିସ୍ତାନ ସମ୍ପ୍ରତି ଦିନିକିଆ ମାନ୍ୟତାର ଶୀର୍ଷ ସ୍ଥାନ ଦଖଲ କରିଛି । ଭାରତ ତୃତୀୟ ସ୍ଥାନରେ ରହିଛି । ଆଗାମୀ ଦିନିକିଆ ବିଶ୍ୱକପ୍ ପାଇଁ ପାକିସ୍ତାନ ଏକ ଶ୍ରେଷ୍ଠ ଦଳ ଗଠନ କରିସାରିଥିବା ସ୍ପଷ୍ଟ ଜଣା ପଡ଼ୁଛି । ଅଧିନାୟକ ବାବର ଆଜମ ଶତକ ଅର୍ଜନ କରିଛନ୍ତି । ଅନ୍ୟ ବ୍ୟାଟରମାନେ ଫର୍ମରେ ରହିଛନ୍ତି ।
ଭାରତୀୟ ଦଳରେ ଆହତ ସମସ୍ୟା ଲାଗି ରହିଛି । ବ୍ୟାଟିଂ କ୍ରମ ଚୂଡ଼ାନ୍ତ ହୋଇପାରି ନାହିଁ । ବାରମ୍ବାର ପରୀକ୍ଷା ନିରୀକ୍ଷା ମଧ୍ୟ ଖେଳାଳିଙ୍କ ମନୋବଳକୁ ଦୁର୍ବଳ କରୁଛି । ଭାରତୀୟ ଦଳର ବ୍ୟାଟିଂ ବିଭାଗ ବେଶ ଶକ୍ତିଶାଳୀ ଜଣାପଡ଼ୁଥିଲେ ହେଁ ପାକିସ୍ତାନ ନିକଟରେ ଏକ ଘାତକ ପେସ୍ ବାହିନୀ ରହିଛି । ତଥାପି ପୂର୍ବଭଳି ବିରାଟ କୋହଲି ବିଜୟର ସୂତ୍ରଧର ସାଜିବେ ବୋଲି ଫ୍ୟାନ୍ମାନେ ଆଶା ବାନ୍ଧିଛନ୍ତି । ୨୦୨୨ ଟି-ଟ୍ୱେଣ୍ଟି ବିଶ୍ୱକପ୍ର ମୁକାବିଲାରେ କୋହଲିଙ୍କ ଇନିଂସକୁ ଦର୍ଶକ ଭୁଲି ନାହାନ୍ତି ।
ଶନିବାର ବର୍ଷା ମ୍ୟାଚ୍ରେ ବାଧକ ସାଜିପାରେ । ଅବଶ୍ୟ ଅପରାହ୍ଣରେ ବର୍ଷା ସମ୍ଭାବନା ନାହିଁ । ଦିନ ବେଳା ବର୍ଷା ହୋଇପାରେ । ତେଣୁ ମ୍ୟାଚ୍ ଆରମ୍ଭରେ ବିଳମ୍ବ ଘଟିପାରେ । ପିଚ୍ ପେସ୍ ବୋଲରଙ୍କୁ ସହାୟତା କରିବା ଆଶା କରାଯାଉଛି । ତେଣୁ ଉଭୟ ଦଳର ପେସ୍ ବାହିନୀଙ୍କ ମଧ୍ୟରେ ଅସଲ ଲଢେଇ ଦେଖିବାକୁ ମିଳିବ ।
ଭାରତ: ରୋହିତ ଶର୍ମା(ଅଧିନାୟକ), ଶୁଭମନ ଗିଲ୍, ବିରାଟ କୋହଲି, ଶ୍ରେୟାସ ଆୟର/ ସୂର୍ଯ୍ୟକୁମାର ଯାଦବ, ଇଶାନ କିଷନ, ହାର୍ଦ୍ଦିକ ପାଣ୍ଡ୍ୟା, ରବିନ୍ଦ୍ର ଜାଡେଜା, କୁଲଦୀପ ଯାଦବ, ମହମ୍ମଦ ସାମି, ଯଶପ୍ରୀତ ବୁମରା, ମହମ୍ମଦ ସିରାଜ ।
ପାକିସ୍ତାନ: ଫଖାର ଜମାନ, ଇମାମ ଉଲ୍ହକ୍, ବାବର ଆଜମ(ଅଧିନାୟକ), ମହମ୍ମଦ ରିଜୱାନ, ଆଘା ସଲମାନ, ଇଫତିଖର ଅହମ୍ମଦ, ଶଦାବ ଖାନ, ମହମ୍ମଦ ନୱାଜ, ନସିମ ଶାହ, ସହିନ ଆଫ୍ରିଦି, ହ୍ୟାରିସ ରୌଫ ।
