ବ୍ରହ୍ମପୁର,୨୮/୦୩: ଗଞ୍ଜାମ ଜିଲ୍ଲାର ୯ ବିଧାନସଭା ଓ ଗୋଟିଏ ଲୋକସଭା ଆସନର ପ୍ରାର୍ଥୀ ତାଲିକାରେ ମୋହର ମାରିଛନ୍ତି ବିଜେଡି ସଭାପତି ନବୀନ ପଟ୍ଟନାୟକ । କିନ୍ତୁ ରାଜ୍ୟର ପ୍ରମୁଖ ନିର୍ବାଚନମଣ୍ଡଳୀ ବ୍ରହ୍ମପୁର ବିଧାନସଭା ଓ ଲୋକସଭା ଆସନରେ ପ୍ରାର୍ଥୀ ଚୟନ ନହେବା ଘଟଣା ଚର୍ଚ୍ଚାକୁ ଅଧିକ ଖୋରାକ୍ ଯୋଗାଇଛି । ଆଶାୟୀଙ୍କ ହୃଦ୍ ସ୍ପନ୍ଦନ ବଢ଼ି ଯାଇଥିବା ବେଳେ ନାନା ଦ୍ୱନ୍ଦ୍ୱ ଓ ସଂଶୟ ଭିତରେ ରହିଛନ୍ତି କର୍ମୀ ଓ ସମର୍ଥକ ।
ବ୍ରହ୍ମପୁର ବିଧାୟକ ବିକ୍ରମ ପଣ୍ଡା ଗୋପାଳପୁର ଆସନକୁ ସ୍ଥାନାନ୍ତର ହେବା ପରେ ଏହି ଆସନ ଖାଲି ପଡ଼ିଥିବା ବହୁ ପୂର୍ବରୁ ଜଳଜଳ ହୋଇଛି । ତେବେ ଏଠାରୁ ବିଜେଡି କାହାକୁ ପ୍ରାର୍ଥୀ କରିବା ତାହା ଏଯାବତ୍ ସ୍ପଷ୍ଟ ହୋଇନାହିଁ । ଆଶାୟୀ ଓ ଦାବିଦାର ମଧ୍ୟ କମ୍ ନୁହଁନ୍ତି । ବ୍ରହ୍ମପୁର ଆସନରୁ ୫ ଥର ଜିଣିଥିବା ପୂର୍ବତନ ବିଧାୟକ ତଥା ବିଜେଡି ଜିଲ୍ଲା ସଭାପତି ଓ ରାଜ୍ୟ ଯୋଜନା ବୋର୍ଡ ସଦସ୍ୟ ଡା. ରମେଶ ଚନ୍ଦ୍ର ଚ୍ୟାଉପଟ୍ଟନାୟକ ଟିକଟ ପାଇବା ଆଶା ରଖିଥିବା ବେଳେ ମେୟର ସଂଘମିତ୍ରା ଦଳେଇ ମଧ୍ୟ ଲବିରେ ରହିଥିବା ଶୁଣିବାକୁ ମିଳିଛି । ବ୍ରହ୍ମପୁର ସାଂସଦ ଚନ୍ଦ୍ରଶେଖର ସାହୁ ଲୋକସଭା ନିର୍ବାଚନରୁ ଦୂରେଇ ରହି ବିଧାନସଭାରେ ପ୍ରବେଶ କରିବାକୁ ମନ ବଳାଇଛନ୍ତି । ତେଣୁ ସେ ମଧ୍ୟ ଆଶା ରଖିଥିବା କୁହାଯାଉଛି । ଯଦି ସାଂସଦ ସାହୁଙ୍କୁ ବିଧାନସଭା ବର୍ଥ ମିଳେ ତେବେ ସଂସଦୀୟ କ୍ଷେତ୍ରରେ କାହାକୁ ଟିକଟ ମିଳିବ ତାହା ବି ବଡ଼ ପ୍ରଶ୍ନବାଚୀ । ହୁଏତ ପୂର୍ବରୁ ୨ ଥର ସାଂସଦ ଥିବା ସିଦ୍ଧାନ୍ତ ମହାପାତ୍ର ପୁଣି ଲେଉଟିବା ସମ୍ଭାବନା ମଧ୍ୟ ଏଡ଼ାଇ ଦେଇହେବ ନାହିଁ । ଯଦି ସାଂସଦ ସାହୁ ଲୋକସଭା ଟିକଟ ପୁଣି ପାଆନ୍ତି ତେବେ ସିଦ୍ଧାନ୍ତ ବିଧାନସଭା ଆସନରେ ପ୍ରତିଦ୍ୱନ୍ଦ୍ୱିତା କରିବା ସମ୍ଭାବନା ରହିଛି ବୋଲି ତଥ୍ୟାଭିଜ୍ଞ ମହଲରୁ ସୂଚନା ମିଳିଛି । ତେବେ ବ୍ରହ୍ମପୁର ବିଧାନସଭା ଓ ଲୋକସଭା ଆସନରେ ସବୁ ଦଳର ପ୍ରାର୍ଥୀ ଅପ୍ରତ୍ୟାଶିତ ହେବା ଆଶଙ୍କା ରହିଛି ।
ଅନ୍ୟପକ୍ଷରେ ବିଜେପି ବ୍ରହ୍ମପୁର ଲୋକସଭା ଆସନରେ ପ୍ରଦୀପ ପାଣିଗ୍ରାହୀଙ୍କୁ ଛାଡ଼ିଥିବା ବେଳେ ବିଧାନସଭା ଆସନରେ ପ୍ରାର୍ଥୀ ଘୋଷଣା କରିନାହିଁ । ବ୍ରହ୍ମପୁର ଲୋକସଭା ଆସନ ଅନ୍ତର୍ଗତ ୭ଟି ବିଧାନସଭା ନିର୍ବାଚନମଣ୍ଡଳୀ ମଧ୍ୟରୁ ତିନିଟିରେ ପ୍ରାର୍ଥୀ ଚୟନରେ ଟଣାଓଟରା ଲାଗିଥିବା କୁହାଯାଉଛି । ବ୍ରହ୍ମପୁର, ଦିଗପହଣ୍ଡି ଓ ମୋହନା ବିଧାନସଭା ଆସନ ପାଇଁ ଲବି ଜୋରଦାର ଥିବାରୁ ପ୍ରାର୍ଥୀ ଚୟନରେ ଅଡ଼ୁଆ ପରିସ୍ଥିତି ଲାଗି ରହିଥିବା ଜଣାପଡ଼ିଛି । ସେହିପରି କଂଗ୍ରେସ ଶିବିରରେ ନିରବତା ବିରାଜମାନ କରିଛି ।