ଭଞ୍ଜନଗର, ୩୧।୩: ଗଞ୍ଜାମ ଜିଲ୍ଲା ଭଞ୍ଜନଗର ଉତ୍ତର ଘୁମୁସର ବନ ଖଣ୍ଡ ଅଧୀନ ତାରାସିଂଙ୍ଗ ରେଞ୍ଜର ଗାଁରେ ହାତୀ ଉପଦ୍ରବ । ଏହି ରେଞ୍ଜର ଅନ୍ତର୍ଗତ ବିଭିନ୍ନ ଗାଁରେ ଏବେ ଗୋଟିକିଆ ହାତୀ ଉପଦ୍ରବ କରୁଛି । ଏହି ଅଞ୍ଚଳ ଅନ୍ତର୍ଭୁକ୍ତ ତାରାସିଂଙ୍ଗ, ଲେମ୍ଭୁଇ, ହଳନ୍ତ ଖୋଳା, ମାଣପୁର, ଆଦି ଅଧିକାଂଶ ଜାଗାରେ ପରିବା ଚାଷ ହେଉଥିବାରୁ ପନିପରିବା ଖାଇବା ପାଇଁ ଏକ ଗୋଟିକିଆ ଦନ୍ତା ହାତୀ ବ୍ୟାପକ କ୍ଷୟ କ୍ଷତି ଘଟାଉଛି । 

ତେବେ ଏହି ଅଞ୍ଚଳରେ ଅଧିକ ଜଙ୍ଗଲ ରହିଥିବାରୁ ଏଠି ବର୍ଷ ତମାମ ହାତୀଙ୍କ ଚଳପ୍ରଚଳ ଦେଖିବାକୁ ମିଳିଥାଏ । ଜଙ୍ଗଲରେ ଝରଣା ଶୁଖିଯିବା କାରଣରୁ ହାତୀଟି ଗାଁ ମୁହାଁ ହୋଇଛି । ବନ ବିଭାଗ ହାତୀକୁ ଘଉଡ଼ାଇବା ପାଇଁ ଚେଷ୍ଟା କରୁଥିଲେ ମଧ୍ୟ ହାତୀ ବଣମୁହାଁ ହେଉନାହିଁ । ସେ ପାଣି ପିଇବା ପାଇଁ ଗାଁ ନିକଟ ଜଳାଶୟମାନଙ୍କୁ ଆସୁଛି । ଫଳରେ ଲୋକ ଭୟଭୀତ ହେଉଛନ୍ତି ।