ଭୁବନେଶ୍ୱର,୨୮/୦୯: ଭରତପୁର ଥାନାରେ ହଙ୍ଗାମା ସମ୍ପର୍କରେ ଅବସରପ୍ରାପ୍ତ ଆଇପିଏସ୍ ଏମ୍. ନାଗେଶ୍ୱର ରାଓଙ୍କ ‘ଏକ୍ସ’ ପୋଷ୍ଟ ଏବେ ଚର୍ଚ୍ଚାରେ । ସେ ସିଧାସଳଖ ଅଭିଯୁକ୍ତ ସେନା ଅଧିକାରୀ ଓ ତାଙ୍କ ସପକ୍ଷରେ ବାହାରିଥିବା ଉଚ୍ଚପଦସ୍ଥ ସେନା ଅଧିକାରୀଙ୍କୁ ଟାର୍ଗେଟ କରିଛନ୍ତି । ସେନା ଆଇନ୍-୧୯୫୦କୁ ଲଂଘିଥିବା ଦର୍ଶାଇ ଉଭୟଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କୁ ଅନୁରୋଧ କରିଛନ୍ତି । ପୂର୍ବତନ ସିବିଆଇ ନିର୍ଦ୍ଦେଶକ ଥିବା ଏହି ଆଇପିଏସ୍ ଗୁରୁବାର ତାଙ୍କ ‘ଏକ୍ସ’ରେ ପ୍ରତିରକ୍ଷା ମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ପୋଷ୍ଟ କରିଥିଲେ ।
ସେଥିରେ ସେ ଉଲ୍ଲେଖ କରିଛନ୍ତି, ଗତ ୧୫ ତାରିଖ ରାତିରେ ଜଣେ ସେନାଅଧିକାରୀ ଓ ତାଙ୍କ ଭାବୀ ପତ୍ନୀ ଭରତପୁର ଥାନାରେ କାର୍ଯ୍ୟରତ ପୁଲିସ ଅଧିକାରୀମାନଙ୍କୁ ଧମକାଇଥିଲେ । ଖରାପ ବ୍ୟବହାର ଦେଖାଇଥିଲେ । ସେନା ଆଇନ ୧୯୫୦ର ଧାରା ୪୫ ଓ ୪୮କୁ ସେନା ଅଧିକାରୀଜଣକ ଗୁରୁତର ଭାବେ ଅବମାନନା କରିଛନ୍ତି । ଏହି ୨ ଧାରା ଅନୁସାରେ କେହି ସେନା ଅଧିକାରୀ ନିଶା ସେବନ(ଡ୍ୟୁଟିରେ ଥାନ୍ତୁ ଅଥବା ନଥାନ୍ତୁ) କଲେ କିମ୍ବା ସର୍ବସାଧାରଣରେ ଅଶୋଭନୀୟ ଆଚାରଣ ଦେଖାଇଲେ, ତାଙ୍କ ନାଁରେ ବିଭାଗୀୟ ତଦନ୍ତ (କୋର୍ଟ ମାର୍ସଲ) କରାଯିବ ।
ଶ୍ରୀ ରାଓଙ୍କ ଅଭିଯୋଗ ଅନୁସାରେ, ମଧ୍ୟ ଭାରତର ଲେଫ୍ଟନାଣ୍ଟ ଜେନାରାଲ ପିଏସ୍ ଶେଖାୱତ (ଏଭିଏସ୍ଏମ୍, ଏସ୍) ଗତ ୧୮ ତାରିଖରେ ସେନାଅଧିକାରୀ ଓ ବାନ୍ଧବୀଙ୍କ ସପକ୍ଷରେ ହାଇକୋର୍ଟ ମୁଖ୍ୟ ବିଚାରପତିଙ୍କୁ ଏକ ଚିଠି ଲେଖିଥିଲେ । ଚିଠି ଅନୁସାରେ, ହାଇକୋର୍ଟ ନିଜ ଆଡୁ ହସ୍ତକ୍ଷେପ କରିଥିଲେ । କିନ୍ତୁ ଶ୍ରୀ ଶେଖାୱତ ଏହି ଚିଠିକୁ ସାମାଜିକ ଗଣମାଧ୍ୟମରେ ପ୍ରଘଟ କରିଥିଲେ । ଯାହାକି, ସେନା ଆଇନ୍୧୯୫୦ର ଧାରା ୨୧(ସି)କୁ ଉଲଂଘନ କରୁଛି ।
ସେହିପରି ଶ୍ରୀ ଶେଖାୱତ ସେନା ମୁଖ୍ୟାଳୟ, ପ୍ରତିରକ୍ଷା ମନ୍ତ୍ରାଳୟଙ୍କ ଦ୍ୱାରସ୍ଥ ନ ହୋଇ ସିଧା ସଳଖ ହାଇକୋର୍ଟ ବିଚାରପତିଙ୍କୁ ଜଣାଇବା ମଧ୍ୟ ସେନା ଆଇନ୍ ଧାରା ୪୫କୁ ଲଂଘୁଛି । ଶ୍ରୀ ରାଓ ଏକ୍ସ ଜରିଆରେ ଏନେଇ ପ୍ରତିରକ୍ଷା ମନ୍ତ୍ରୀଙ୍କୁ ଅନୁରୋଧ କରିଛନ୍ତି ଯେ ଏହା ଏକ ସମ୍ବେଦନଶୀଳ ଘଟଣା । ଜଣେ ବରିଷ୍ଠ ସେନା ଅଧିକାରୀ ମନ୍ତ୍ରାଳୟର ମାର୍ଗଦର୍ଶିକାକୁ ନ ମାନି ସିଧାସଳଖ ଏକ ବେସାମରିକ ପ୍ରଶାସନିକ ଘଟଣାରେ ହସ୍ତକ୍ଷେପ କରିବା ଆଦୌ ଯୁକ୍ତିଯୁକ୍ତ ନୁହେଁ । ଏଭଳି ଘଟଣା ଆଗକୁ ଉଚ୍ଚପଦସ୍ଥ ସେନା ଅଧିକାରୀଙ୍କ ଦ୍ୱାରା ବାରମ୍ବାର ଘଟିଲେ, ଗଣତନ୍ତ୍ର ପାଇଁ ବିପଦ ସୃଷ୍ଟି କରିପାରେ । ପାକିସ୍ତାନ କିମ୍ବା ବାଂଲାଦେଶ ଭଳି ଜରୁରୀକାଳୀନ ପରିସ୍ଥିତି ଉପୁଜିବା ଆଶଙ୍କା ଅଛି । ତୁରନ୍ତ ଏକ ସାଧାରଣ କୋର୍ଟ-ମାର୍ସଲ ଗଠନ କରାଯାଇ ଭୁବନେଶ୍ୱରରେ ଅପ୍ରୀତିକର ପରିସ୍ଥିତି ଉପୁଜାଇଥିବା ସେନା ଅଧିକାରୀ ଓ ଶ୍ରୀ ଶେଖାୱତଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନେବାକୁ ସେ ନିବେଦନ କରିଛନ୍ତି । ଏହି ଘଟଣାରେ ନିଲମ୍ବିତ ୩ ମହିଳା ପୁଲିସ ଅଧିକାରୀଙ୍କ ସମେତ ୪ଜଣ ପୁଲିସ ମିଛଧରା (ପଲିଗ୍ରାଫ) ପରୀକ୍ଷାର ସାମ୍ନା କରିବେ । ଏନେଇ ସ୍ଥାନୀୟ ଏସ୍ଡିଜେଏମ୍ ସୌମରଞ୍ଜନ ନାୟକ ଶୁକ୍ରବାର ଅନୁମତି ଦେଇଛନ୍ତି ।
ନିଲମ୍ବିତ ହୋଇଥିବା ପୁଲିସ ସବ୍ଇନ୍ସପେକ୍ଟର ବୈଶାଳିନୀ ପଣ୍ଡା, ଏଏସ୍ଆଇ ସଲିଳାମୟୀ ସାହୁ, ଏଏସ୍ଆଇ ସାଗରିକା ରଥ ଓ ଏସ୍ଆଇ ପ୍ରଶାନ୍ତ ମହାରଣା ଖୁବ୍ ଶୀଘ୍ର ଗୁଜୁରାଟ ଗାନ୍ଧୀନଗର ଅଭିମୁଖେ ଯିବେ । ଏସ୍ଆଇ ଶ୍ରୀ ମହାରଣା ଘଟଣାଦିନ ରାତିରେ ଭରତପୁର ଥାନାରେ ଉପସ୍ଥିତ ଥିଲେ । ସେ ପ୍ରତ୍ୟକ୍ଷର୍ଦଶୀ ହିସାବରେ ପଲିଗ୍ରାଫ୍ ପରୀକ୍ଷାର ସାମ୍ନା କରିବେ । ପୂର୍ବରୁ ନିଲମ୍ବିତ ଭରତପୁର ପୂର୍ବତନ ଆଇଆଇସି ଦୀନକୃଷ୍ଣ ମିଶ୍ର ମଧ୍ୟ ଏହି ପଲିଗ୍ରାଫ୍ ପରୀକ୍ଷା ପାଇଁ ରାଜି ହୋଇଥିଲେ । ଅଦାଲତ ଗତ ୨୫ ତାରିଖରେ ପଲିଗ୍ରାଫ୍ ସହ ବ୍ରେନ୍ ଫିଙ୍ଗର ପ୍ରିଣ୍ଟିଂ ଓ ନାର୍କୋ ଆନାଲିସିସ୍ ପରୀକ୍ଷା ପାଇଁ କ୍ରାଇମ୍ବ୍ରାଞ୍ଚକୁ ଅନୁମତି ଦେଇଥିଲେ । ଆଗାମୀ ଦିନରେ ୫ଜଣ ପୁଲିସ ଅଧିକାରୀଙ୍କୁ ସାଙ୍ଗରେ ନେଇ କ୍ରାଇମ୍ବ୍ରାଞ୍ଚ ଗାନ୍ଧୀନଗରସ୍ଥିତ ରାଜ୍ୟ ଅପରାଧ ବିଧି ବିଜ୍ଞାନାଗାର(ଏସ୍ଏଫ୍ଏସ୍ଏଲ) ଅଭିମୁଖେ ବାହାରିବେ । ସେପଟେ ନିଲମ୍ବିତ ପୁଲିସ ଅଧିକାରୀ ସାଗରିକାଙ୍କ ମା’ ଶୁକ୍ରବାର ଅଦାଲତଙ୍କ ଦ୍ୱାରସ୍ଥ ହୋଇଛନ୍ତି । ସେନାଧିକାରୀଙ୍କ ବାନ୍ଧବୀଙ୍କ ନାଁରେ ସେ ଏକ ମାମଲା ଦାୟର କରିଛନ୍ତି । ହାଇକୋର୍ଟଙ୍କ ନିର୍ଦ୍ଦେଶକୁ ବେଖାତିର କରି ବାନ୍ଧବୀଜଣକ ଜାତୀୟ ଗଣମାଧ୍ୟମରେ ବିସ୍ତୃତ ସାକ୍ଷାତକାର ଦେଇଥିବା ସେ ପିଟିସନରେ ଦର୍ଶାଇଛନ୍ତି ।
