ନୂଆଦିଲ୍ଲୀ,୨୬/୦୯:  ବିହାରର ‘ଜୀବିତ ପୁତ୍ରିକା’ପର୍ବ ପାଳନ ବେଳେ ଅଘଟଣା। ଏହି ପର୍ବ ପାଳନ ପାଇଁ ପୋଖରୀରେ ଗାଧୋଉଥିବା ବେଳେ ୨ଟି ଭିନ୍ନ ଗାଁରେ ବୁଡ଼ି ସମୁଦାୟ ୮ ଜଣଙ୍କ ମୃତ୍ୟୁ ହୋଇଛି। ତେବେ ସେମାନଙ୍କ ମଧ୍ୟରେ ୭ ନାବାଳିକା ଓ ଜଣେ ନାବାଳିକା ଅଛନ୍ତି। 

ସୂଚନା ମୁତାବକ,ବିହାରରେ ଗତକାଲି ‘ଜୀବିତ ପୁତ୍ରିକା’ ପର୍ବ ପାଳିତ ହେଉଥିଲେ। ଏହି ପର୍ବ ପାଳନ କରୁଥିବା ଲୋକେ ପରିବାର ସହ ନିକଟସ୍ଥ ପୋଖରୀ, ନଦୀକୁ ଯାଇ ବୁଡ଼ ପକାଇଥିଲେ। ଏହି ସମୟରେ ଦୁଇଟି ଭିନ୍ନ ଭିନ୍ନ ଗାଁରେ ଅଘଟଣ ଘଟିଛି। ଅସାବଧାନତା ଯୋଗୁଁ ଗୋଡ଼ ଖସିଯିବାରୁ ୭ ନାବାଳିକା ଓ ଜଣେ ନାବାଳକ ପୋଖରୀରେ ବୁଡ଼ି ଯାଇଥିବ ସୂଚନା ମିଳିଛି। ଏନେଇ ଖବରପାଇ ଅଗ୍ନିଶମ ବାହିନୀ କର୍ମଚାରୀ ଓ ପୋଲିସ୍‌ ଘଟଣାସ୍ଥଳରେ ପହଞ୍ଚି ଖୋଜାଖୋଜି ଆରମ୍ଭ କରିଥିବା ବେଳେ ସମସ୍ତଙ୍କୁ ଉଦ୍ଧାର କରି ନିକଟସ୍ଥ ମେଡିକାଲକୁ ନିଆଯାଇଥିଲା। ମାତ୍ର ଡାକ୍ତର ସମସ୍ତ ୮ ଜଣଙ୍କୁ ମୃତ ଘୋଷଣା କରିଛନ୍ତି। ତେବେ ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକାକୂଳ ପରିବେଶ ସୃଷ୍ଟି ହୋଇଛି। ସେପଟେ ଏହି ଘଟଣା ସମଗ୍ର ବିହାରରେ ଚାଞ୍ଚଲ୍ୟ ଖେଳାଇ ଦେଇଥିବା ବେଳେ ମୁଖ୍ୟମନ୍ତୀ ନୀତୀଶ କୁମାର ଗଭୀର ଶୋକ ପ୍ରକାଶ କରିଛନ୍ତି। ଏଥିସହ ମୃତକଙ୍କ ପରିବାରକୁ  ୪ ଲକ୍ଷ ଟଙ୍କାର  ସହାୟତା ରାଶି ଘୋଷଣା କରିଛନ୍ତି।