ଜଳେଶ୍ୱର,୦୭/୦୯: ବାଲେଶ୍ୱର  ଜିଲ୍ଲା ଜଳେଶ୍ୱର ଓ ପଶ୍ଚିମବଙ୍ଗର ସୀମା  ୬୦ନଂ ଜାତୀୟ ରାଜପଥର ସୁନାକଣିଆ  ନାକା ପଏଣ୍ଟ୍‌ ନିକଟରେ ଅଟକିଛି ୭୦ରୁ  ଅଧିକ କୁକୁଡ଼ା ଓ ଅଣ୍ଡା ବୋଝେଇ  ଟ୍ରକ୍‌ । ଓଡ଼ିଶାରେ ବାର୍ଡ ଫ୍ଲୁ ବ୍ୟାପିଥିବା  ଯୋଗୁଁ ଓଡ଼ିଶାରୁ ପଶ୍ଚିମବଙ୍ଗକୁ ଯାଉଥିବା  କୁକୁଡ଼ା ଓ ଅଣ୍ଡା ଟ୍ରକ୍‌ ଉପରେ ପ୍ରତିବନ୍ଧକ  ଲଗାଇଛି ପଶ୍ଚିମବଙ୍ଗ ସରକାର ।  

ଗତ ବୁଧବାରଠାରୁ ଦୀର୍ଘ  ୩ ଦିନ ଧରି ପଶ୍ଚିମବଙ୍ଗର ସୀମା  ସୁନାକଣିଆଠାରେ ଥିବା ପଶ୍ଚିମବଙ୍ଗର  ଦାନ୍ତୁନ ପୁଲିସ୍‌ ନାକା ପଏଣ୍ଟ୍‌ରେ ଏହି  ଟ୍ରକ୍‌ଗୁଡ଼ିକୁ ଅଟକାଇଛି । ଏପରିକି  ଆନ୍ଧ୍ରପ୍ରଦେଶରୁ ଆସାମ ଯିବା ପାଇଁ  ପଶ୍ଚିମବଙ୍ଗ ମଧ୍ୟଦେଇ ଯାଉଥିବା  ଗାଡ଼ିଗୁଡ଼ିକୁ ମଧ୍ୟ ପଶ୍ଚିମବଙ୍ଗ ସରକାର  ଛାଡ଼ିବାକୁ ମନା କରିଛି । ଫଳରେ ଓଡ଼ିଶା- ପଶ୍ଚିମବଙ୍ଗ ସୀମା ଜଳେଶ୍ୱର ଟୋଲ୍‌ ପ୍ଲାଜା  ନିକଟରେ ଟ୍ରକ୍‌ଗୁଡ଼ିକର ଲମ୍ବା ଲାଇନ୍‌ ଲାଗିଛି । ଗାଡ଼ି ଚାଳକମାନେ ଅଖିଆ  ଅପିଆ ପଡ଼ି ରହିଛନ୍ତି । ଅପରପକ୍ଷେ  ଖାଦ୍ୟାଭାବରୁ କୁକୁଡ଼ା ମରିଯିବା ଓ  ଅଣ୍ଡା ନଷ୍ଟ ହେବାର ଆଶଙ୍କା ମଧ୍ୟ ଦେଖା  ଦେଇଛି । ତେବେ କେତେକ ଛୋଟ ଗାଡ଼ି  ଗଳାବାଟ ଦେଇ ପଶ୍ଚିମବଙ୍ଗ ଭିତରକୁ  ଯାଇଥିବା ସୂଚନା ମିଳିଛି ।