ଭୁବନେଶ୍ୱର,୩୧/୦୩: ବିଜେପି ଟିକଟରେ କଟକ ଲୋକସଭା ଆସନରୁ ଲଢ଼ିବେ ୬ ଥରିଆ ସାଂସଦ ଭର୍ତ୍ତୃହରି ମହତାବ । ବିଜେଡିରୁ ସେ ଲଗାତାର ୬ ଥର ନିର୍ବାଚିତ ହୋଇଥିଲେ କଟକରୁ।
ବିଜେପିର କେନ୍ଦ୍ରୀୟ ନିର୍ବାଚନ କମିଟି ଶନିବାର ଭର୍ତ୍ତୃହରିଙ୍କ ପ୍ରାର୍ଥୀତ୍ୱ ଘୋଷଣା କରିଛି। ଗତ ୨୨ ତାରିଖରେ ସେ ବିଜେଡିରୁ ଇସ୍ତଫା ଦେଇଥିଲେ । ଦୁଇ ଦିନ ତଳେ ପଦ୍ମ ଧରିଥିଲେ ଦିଲ୍ଲୀରେ । କଟକ ସହିତ କନ୍ଧମାଳ ଓ ଯାଜପୁର ଲୋକସଭା ଆସନ ପାଇଁ ମଧ୍ୟ ବିଜେପି ପ୍ରାର୍ଥୀ ଘୋଷଣା କରିଛି ।
କନ୍ଧମାଳରୁ ସୁକାନ୍ତ ପାଣିଗ୍ରାହୀ ଓ ଯାଜପୁରରୁ ରବୀନ୍ଦ୍ର ନାରାୟଣବେହେରା ଲଢ଼ିବେ । ଏ ତିନି ଆସନ ମିଶାଇ ୨୧ଟି ଯାକ ଲୋକସଭା ଆସନ ପାଇଁ ବିଜେପି ପ୍ରାର୍ଥୀ ତୟାର । ପୂର୍ବରୁ ୧୮ଟି ଲୋକସଭା ଆସନରେ ବିଜେପି ପ୍ରାର୍ଥୀ ତାଲିକା ଜାରି କରି ଆସିଥିଲା । ବିଜେଡି ୧୫ଟି ଆସନ ପାଇଁ ପ୍ରାର୍ଥୀ ଘୋଷଣା କରିଛି । ବଲାଙ୍ଗୀର, ବାଲେଶ୍ୱର, ଭଦ୍ରକ, ବ୍ରହ୍ମପୁର, ବରଗଡ଼ ଓ କେନ୍ଦୁଝର ପ୍ରାର୍ଥୀ ଘୋଷଣା ହୋଇ ନାହିଁ । କଂଗ୍ରେସ ଗୋଟିଏ ବି ପ୍ରାର୍ଥୀ ଘୋଷଣା କରି ନାହିଁ ।
ବିଜେଡିର ଲୋକସଭା ପ୍ରାର୍ଥୀ ସଂତୃପ୍ତ ମିଶ୍ରଙ୍କୁ ଟକ୍କର ଦେବେ ଭେଟେରାନ ଭର୍ତ୍ତୃହରି । ୧୯୯୮ରୁ ୨୦୧୯ ପର୍ଯ୍ୟନ୍ତ ଲଗାତାର ୬ ଥର ଯେଉଁ ଶଙ୍ଖ ଚିହ୍ନରେ କଟକ ଲୋକସଭା ଆସନରୁ ଭର୍ତ୍ତୃହରି ଜିତି ଆସୁଥିଲେ, ଏଥର ସେଇ ଚିହ୍ନ ବିରୋଧରେ ଲଢ଼େଇ ପାଇଁ ଓହ୍ଲାଇବେ । ଯାଜପୁର ଲୋକସଭା ପାଇଁ ଏଥର ନୂଆ ମୁହଁ ଦେଇଛି ବିଜେପି । ଏଠାରେ ରବୀନ୍ଦ୍ରନାଥ ବେହେରାଙ୍କୁ ମିଳିଛି ବିଜେପି ଟିକଟ । ରବୀନ୍ଦ୍ର ପୂର୍ବରୁ ସରକାରୀ ଚାକିରି କରିଥିଲେ । ଚାକିରିରୁ ଅବସର ପରେ ବିଜେପି ସହ ଗତ କିଛିବର୍ଷ ହେବ ଯୋଡ଼ି ହୋଇଥିଲେ । ରାଜ୍ୟ ବିଜେପି ଅନୁସୂଚିତ ଜାତି ସେଲ୍ରେ ରହି କାର୍ଯ୍ୟ କରୁଥିଲେ ବୋଲି ଜଣାପଡ଼ିଛି । ପ୍ରଥମ ଥର ପାଇଁ ସେ ନିର୍ବାଚନ ମଇଦାନରେ ଓହ୍ଲାଉଛନ୍ତି । ରବୀନ୍ଦ୍ରଙ୍କ ଘର ରସୁଲପୁର ବ୍ଲକର ରାଜେନ୍ଦ୍ରପୁରରେ । ଏଥର ଯାଜପୁର ଲୋକସଭା ଆସନରେ ରବୀନ୍ଦ୍ର ସାମ୍ନା କରିବେ ବିଜେଡି ସାଂସଦ ଶର୍ମିଷ୍ଠା ସେଠୀଙ୍କୁ ।
ଯାଜପୁର ଲୋକସଭା ଆସନରେ ବିଜେଡି ପୁଣି ଥରେ ଶର୍ମିଷ୍ଠାଙ୍କୁ ଟିକଟ ଦେଇଛି । ୨୦୧୯ରେ ବିଜେପିର ଅମୀୟ ମଲ୍ଲିକଙ୍କୁ ଲକ୍ଷାଧିକ ଭୋଟରେ ପରାସ୍ତ କରିଥିଲେ ଶର୍ମିଷ୍ଠା । ୧୯୯୯ରୁ ବିଜେଡି ଯାଜପୁର ଲୋକସଭା ଆସନ କେବେ ହାରିନାହିଁ । କନ୍ଧମାଳ ଲୋକସଭା ଆସନରେ ବିଜେପି ସୁକାନ୍ତ ପାଣିଗ୍ରାହୀଙ୍କୁ ଟିକଟ ଦେଇଛି । ସୁକାନ୍ତ ୨୦୧୪ ସାଧାରଣ ନିର୍ବାଚନରେ କନ୍ଧମାଳ ଲୋକସଭା ପାଇଁ ବିଜେପି ପ୍ରାର୍ଥୀ ହୋଇଥିଲେ । ସେଥର ସୁକାନ୍ତ ତୃତୀୟ ସ୍ଥାନରେ ରହିଥିଲେ । ବିଜେଡି ସାଂସଦ ଅଚ୍ୟୁତ ସାମନ୍ତଙ୍କୁ ଟକ୍କର ଦେବେ ବିଜେପିର ସୁକାନ୍ତ । ସୁକାନ୍ତଙ୍କ ଘର ନୟାଗଡ଼ ଜିଲ୍ଲାର କଣ୍ଟିଲୋ ପାଖ ଗଣିଆ ଅଞ୍ଚଳରେ ।
ଏଯାବତ୍ ବିଜେପି ଗୋଟିଏ ବି ବିଧାନସଭା ଆସନ ପାଇଁ ବିଜେପି ଟିକଟ ଘୋଷଣା ହୋଇନାହିଁ । ଦୁଇଦିନ ଭିତରେ ବିଧାନସଭା ପାଇଁ ବିଜେପି ପ୍ରାର୍ଥୀ ଘୋଷଣା କରିବ ବୋଲି ନିର୍ବାଚନ ପ୍ରଭାରୀ ବିଜୟପାଲ ସିଂ ତୋମାର ଆଜି ସୂଚନା ଦେଇଛନ୍ତି । ସୂତ୍ର ଅନୁସାରେ ପ୍ରଥମ ପର୍ଯ୍ୟାୟରେ ବିଜେପି ଅନ୍ୟୁନ ୧୦୦ ବିଧାନସଭା ପାଇଁ ପ୍ରାର୍ଥୀ ଘୋଷଣା କରିପାରେ । ଏ ନେଇ ଦିଲ୍ଲୀରେ ଗତ ଦୁଇ ଦିନ ହେବ ବିଚାର ବିମର୍ଷ ଚାଲିଥିଲା । ଦିଲ୍ଲୀରେ ମଧ୍ୟ ଓଡ଼ିଶାକୁ ନେଇ ବୈଠକ ବସିଛି । ଏପଟେ କ୍ଷେତ୍ରୀୟ ପ୍ରଭାରୀ ସୁନୀଲ ବଂଶଲ, ନିର୍ବାଚନ ପ୍ରଭାରୀ ତୋମାର, ରାଜ୍ୟ ସଭାପତି ମନମୋହନ ସାମଲ ଓ ରାଜ୍ୟ ନେତୃମଣ୍ଡଳୀଙ୍କୁ ନେଇ ଆଜି ଭୁବନେଶ୍ୱର ପାର୍ଟି କାର୍ଯ୍ୟାଳୟରେ ଲମ୍ବା ଆଲୋଚନା ଚାଲିଥିଲା ।
