ଜି.ଉଦୟଗିରି, ୧/୯: ଜି.ଉଦୟଗିରି ବ୍ଲକ୍ ଲିଙ୍ଗାଗଡ଼ଠାରେ ରବିବାର ମଧ୍ୟାହ୍ନରେ ଏକ ଘରୋଇ ବସ୍ ଦୁର୍ଘଟଣାଗ୍ରସ୍ତ ହୋଇଛି I ଫଳରେ ଗୋଟିଏ ଗାଈର ମୃତ୍ୟୁ ହୋଇଥିବା ବେଳେ ୧୦ ଜଣ ଆହତ ହୋଇଛନ୍ତି । ସୂଚନା ଅନୁଯାୟୀ, ମାଳତୀ ନାମକ ଏହି ଯାତ୍ରୀବାହୀ ବସ୍ ଆସିକାଠାରୁ ମୁନିଗୁଡ଼ା ଅଭିମୁଖେ ଯାଉଥିଲା I ଲିଙ୍ଗାଗଡ଼ଠାରେ ହଠାତ୍ ଦୁଇଟି ଗୋରୁ ରାସ୍ତା ମଝିକୁ ଚାଲି ଆସିଥିଲେ I ଡ୍ରାଇଭର ଗୋରୁ ଦୁଇଟିଙ୍କୁ ବଞ୍ଚାଇବାକୁ ଯାଇ ଭାରସାମ୍ୟ ହରାଇବାରୁ ବସଟି ରାସ୍ତା କଡ଼କୁ ଖସି ଓଲଟି ପଡ଼ିଥିଲା । 

ଦୁର୍ଘଟଣାରେ ଗୋଟିଏ ଗାଈର ମୃତ୍ୟୁ ହୋଇଥିବା ବେଳେ ୧୦ ଜଣ ଆହତ ହୋଇଥିବା ସୂଚନା I ଆହତଙ୍କୁ ଜି.ଉଦୟଗିରି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ପଠାଯାଇ ଚିକିତ୍ସା କରାଯାଉଛି I ଦୁର୍ଘଟଣାସ୍ଥଳରେ ଦମକଳ ବାହିନୀ ପହଞ୍ଚିଥିବା ଜଣାପଡ଼ିଛି I ସ୍ଥାନୀୟ ଏସଡିପିଓ ବିଜୟ କୁମାର ବିଶି, ଥାନା ଅଧିକାରୀ ଭଗବାନ ପୂଜାରୀ, ଏସ୍.ଆଇ ଅନନ୍ତ କୁମାର ପ୍ରଧାନ ପ୍ରମୁଖ ପହଞ୍ଚି ଘଟଣାର ତଦନ୍ତ କରୁଛନ୍ତି I