ନୂଆଦିଲ୍ଲୀ,୨୩/୦୫: ଚୀନ୍ ଏବଂ ତାଇୱାନ ମଧ୍ୟରେ ମାଲିକାନା ଏବଂ ଅସ୍ତିତ୍ୱ ପାଇଁ ଯୁଦ୍ଧ ଲାଗିରହିଛି। ପରାକ୍ରମ ଦେଖାଇବାରେ ପଛଘୁଞ୍ଚା ଦେଉନି ଡ୍ରାଗନ୍। ଏଇ ଯେମିତି ଚାଇନା ତାଇୱାନ ଚାରିପାଖରେ ଦୁଇ ଦିନିଆ ଡ୍ରିଲ ଆରମ୍ଭ କରିଛି। ଚାଇନା ଏହାର ନାମ 'ପନିସମେଣ୍ଟ ଡ୍ରିଲ' ରଖିଛି। ଚୀନ କହିଛି ଯେ ତାଇୱାନ ଷ୍ଟ୍ରେଟ୍ ଏବଂ ତାଇୱାନର ନିୟନ୍ତ୍ରଣରେ ଥିବା ଦ୍ୱୀପପୁଞ୍ଜରେ ବିଚ୍ଛିନ୍ନତାବାଦୀ କାର୍ଯ୍ୟକଳାପର ଜବାବରେ ଏହି ଡ୍ରିଲ୍ ଆରମ୍ଭ କରିଛି। ବିଚ୍ଛିନ୍ନତାବାଦୀ ବାହିନୀକୁ ଉପଯୁକ୍ତ ଉତ୍ତର ଦେବା ଉଦ୍ଦେଶ୍ୟରେ ଏହା ଆରମ୍ଭ ହୋଇଛି। କହିରଖୁଛୁ ଯେ, ତାଇୱାନର ନୂତନ ରାଷ୍ଟ୍ରପତି ଲାଇ ଚିଙ୍ଗ ତେ ଶପଥ ଗ୍ରହଣ କରିଥିବା ବେଳେ ଚୀନ୍ ସେପଟେ ଏହାର ଡ୍ରିଲ କରିଛି। ଲାଇ ଚିଙ୍ଗଙ୍କୁ ଚୀନ୍ର ଜଣେ ଦୃଢ଼ ପ୍ରତିଦ୍ୱନ୍ଦ୍ୱୀ ଭାବରେ ବିବେଚନା କରାଯାଏ।
ଚୀନ୍ର ପିପୁଲ୍ସ ଲିବରେସନ୍ ଆର୍ମି ର ଇଷ୍ଟର୍ଣ୍ଣ ଥିଏଟର କମାଣ୍ଡ କହିଛି ଯେ ଏହା ସକାଳ ୭.୪୫ ରେ ତାଇୱାନର ଆଖପାଖରେ ମିଳିତ ସାମରିକ ଡ୍ରିଲ ଆରମ୍ଭ କରିଛି, ଯେଉଁଥିରେ ସେନା, ନୌସେନା ଏବଂ ବାୟୁସେନା ରକେଟ୍ ଫୋର୍ସ ସହିତ ସାମିଲ ହୋଇଛନ୍ତି। ତାଇୱାନ ଷ୍ଟ୍ରେଟ୍, ଉତ୍ତର, ଦକ୍ଷିଣ ଏବଂ ପୂର୍ବ ତାଇୱାନ ଏବଂ କେନ୍ମେନ୍, ମାତସୁ, ୱୁକିୟୁ ଏବଂ ଡୋଙ୍ଗିନ୍ ତାଇୱାନ ନିୟନ୍ତ୍ରିତ ଦ୍ୱୀପପୁଞ୍ଜରେ ଏହି ଡ୍ରିଲ୍ ଆରମ୍ଭ କରାଯାଇଥିଲା।
ତାଇୱାନର ପ୍ରତିରକ୍ଷା ମନ୍ତ୍ରଣାଳୟ ଏହି ଚୀନ୍ ସାମରିକ ଡ୍ରିଲକୁ ନିନ୍ଦା କରିଛି ଏବଂ କହିଛି ଯେ ସେମାନେ ନିଜ ଅଞ୍ଚଳକୁ ସୁରକ୍ଷା ଦେବା ପାଇଁ ତାଇୱାନ ଷ୍ଟ୍ରେଟ୍ ଚାରିପାଖରେ ପହରା ଦେଉଛନ୍ତି। ଏହି ଡ୍ରିଲ କେବଳ ତାଇୱାନ ଷ୍ଟ୍ରେଟର ଶାନ୍ତି ଏବଂ ସ୍ଥିରତାକୁ ବାଧା ଦେବ ନାହିଁ ବରଂ ଏହା ଚୀନ୍ର ସାମରିକବାଦୀ ମାନସିକତାକୁ ମଧ୍ୟ ପ୍ରକାଶ କରିବ। ଚୀନ୍ ତାଇୱାନକୁ ନିଜର ବୋଲି ଦାବି କରିଆସୁଛି। ସୋମବାର ତାଇୱାନର ନୂତନ ରାଷ୍ଟ୍ରପତି ଲାଇ ଚିଙ୍ଗଙ୍କ ଭାଷଣକୁ ଚୀନ୍ ନିନ୍ଦା କରିଛି। ଏହି ଅଭିଭାଷଣରେ ତାଇୱାନର ରାଷ୍ଟ୍ରପତି ଚୀନ୍କୁ ନିଜ ଦେଶ ପ୍ରତି ବିପଦ ବନ୍ଦ କରିବାକୁ କହିଥିଲେ। ସେ କହିଥିଲେ ଯେ କେବଳ ତାଇୱାନର ଲୋକମାନେ ସେମାନଙ୍କ ଭବିଷ୍ୟତ ବିଷୟରେ ନିଷ୍ପତ୍ତି ନେଇ ପାରିବେ। ତାଇୱାନର ନୂତନ ରାଷ୍ଟ୍ରପତି କ୍ରମାଗତ ଭାବରେ ଚୀନ୍ ସହ ଆଲୋଚନା କରୁଛନ୍ତି କିନ୍ତୁ ଚୀନ୍ ତାଙ୍କୁ ପ୍ରତ୍ୟେକ ଥର ପ୍ରତ୍ୟାଖ୍ୟାନ କରିଆସୁଛି।
କାହିଁକି ତାଇଓ୍ବାନକୁ ଡରୁଛି ଚୀନ୍?
ତାଇୱାନ ହେଉଛି ଏକ ଛୋଟ ଦ୍ୱୀପ ଯାହା ଚୀନ୍ର ଦକ୍ଷିଣ-ପୂର୍ବ ଉପକୂଳଠାରୁ ୧୦୦ ମାଇଲ କିମ୍ବା ପ୍ରାୟ ୧୬୦ କିଲୋମିଟର ଦୂରରେ ଅବସ୍ଥିତ। ଏହା ଏକଦା ଚୀନ୍ ଦ୍ୱାରା ଦଖଲ କରାଯାଇଥିଲା। ସେତେବେଳେ ଏହାକୁ ଫର୍ମୋସା ଦ୍ୱୀପ କୁହାଯାଉଥିଲା। ୧୯୪୯ ପରଠାରୁ ଚୀନ୍ ଏବଂ ତାଇୱାନ ଅଲଗା ରହିଆସିଛି। ଏହାପୂର୍ବରୁ ତାଇୱାନ ଏବଂ ଚୀନ୍ ଗୋଟିଏ ହୋଇ ରହିଆସୁଥିଲେ। କିନ୍ତୁ କମ୍ୟୁନିଷ୍ଟ ସରକାର କ୍ଷମତାକୁ ଆସିବା ପରେ କାମିଙ୍ଗତାଙ୍ଗ ଦଳର ଲୋକମାନେ ତାଇୱାନକୁ ପଳାଇଥିଲେ।
୧୯୪୯ ମସିହାରେ ଚୀନ୍କୁ 'ପିପୁଲ୍ସ ରିପବ୍ଲିକ୍ ଅଫ୍ ଚାଇନା' ଏବଂ ତାଇୱାନକୁ 'ରିପବ୍ଲିକ୍ ଅଫ୍ ଚାଇନା' ନାମ ରଖାଗଲା। ଉଭୟ ଦେଶ ପରସ୍ପରକୁ ମାନ୍ୟତା ଦିଅନ୍ତି ନାହିଁ। କିନ୍ତୁ, ଚୀନ୍ ଦାବି କରିଆସୁଛି ଯେ ତାଇୱାନ ମଧ୍ୟ ଏହାର ଏକ ଅଂଶ। ଚୀନ୍ ଏବଂ ତାଇୱାନରେ ପ୍ରାୟତଃ ଯୁଦ୍ଧ ପରି ପରିସ୍ଥିତି ଉପୁଜେ। ଚୀନ୍ ତାଇୱାନକୁ କାବୁ କରିବାକୁ ଚେଷ୍ଟା କରେ। ତେବେ ବିଶେଷଜ୍ଞମାନେ ବିଶ୍ବାସ କରନ୍ତି ଯେ ଚୀନ୍ ଯଦିଓ ଯୁଦ୍ଧ କରିବାକୁ ବାରମ୍ବାର ଧମକ ଦେଉଛି, ତଥାପି ତାଇୱାନ ଉପରେ ଆକ୍ରମଣ କରିବା ସହଜ ହେବ ନାହିଁ। ଏହାର ତିନୋଟି ବଡ଼ କାରଣ ଅଛି। ସର୍ବପ୍ରଥମେ, ତାଇୱାନ ସବୁ ପାର୍ଶ୍ୱରେ ସମୁଦ୍ର ଦ୍ୱାରା ଘେରି ରହିଛି। ସେଠାରେ ପାଣିପାଗର ପୂର୍ବାନୁମାନ କରିବା କଷ୍ଟସାଧ୍ୟ। ସେଠାରେ ଥିବା ପର୍ବତ ଏବଂ ସମୁଦ୍ର ଉପକୂଳ କଠିନ ଓ ଅବଡ଼ା ଖାବଡ଼ା ଅଟେ। ତେଣୁ ତାଇଓ୍ବାନରେ ପ୍ରବେଶ କରିବା ସହଜ ନୁହେଁ।
ଦ୍ୱିତୀୟ କାରଣ ହେଉଛି ତାଇୱାନର ସୈନ୍ୟବାହିନୀ ଚୀନ୍ ସୈନ୍ୟ ସାମ୍ନାରେ ଛୋଟ ପରି ଦେଖାଯାଇପାରେ, କିନ୍ତୁ ଏମାନେ ଉନ୍ନତ ଅସ୍ତ୍ରଶସ୍ତ୍ର ସହିତ ଜଡ଼ିତ। ୨୦୧୮ରେ ତାଇୱାନ କହିଥିଲା ଯେ ଏଥିରେ ମୋବାଇଲ୍ ମିଜାଇଲ ସିଷ୍ଟମ ମଧ୍ୟ ଅଛି। ଏହାର ସାହାଯ୍ୟରେ ଏହାର କ୍ଷେପଣାସ୍ତ୍ରଗୁଡିକ କାହାର ବିନା ଲକ୍ଷ୍ୟସ୍ଥଳରେ ପହଞ୍ଚିପାରିବ। ତୃତୀୟ କାରଣ ହେଉଛି ଆମେରିକାର ସମର୍ଥନ। ଆମେରିକା ସବୁବେଳେ ତାଇୱାନକୁ ଏହାର ଭଲ ବନ୍ଧୁ ବୋଲି କହିଆସିଛି। ଆମେରିକାର ରାଷ୍ଟ୍ରପତି ଜୋ ବାଇଡେନ ଖୋଲାଖୋଲି ଭାବେ କହିଛନ୍ତି ଯେ, ଯଦି ଚୀନ୍ ଆକ୍ରମଣ କରେ ତେବେ ଆମେରିକା ନିଶ୍ଚିତ ଭାବରେ ତାଇୱାନକୁ ସାମରିକ ସହାୟତା ଯୋଗାଇବ।
