ନୂଆଦିଲ୍ଲୀ,୦୧/୦୪: ଅରୁଣାଚଳ ପ୍ରଦେଶର ୩୦ଟି ସ୍ଥାନର ନାଁ ଚୀନ୍ ବଦଳାଇଛି । ଚୀନ୍ କ୍ୟାବିନେଟରେ କେତେକ ସ୍ଥାନର ଭୌଗୋଳିକ ନାମ ପରିବର୍ତ୍ତନ ପ୍ରସ୍ତାବ ଅନୁମୋଦନଲାଭ କରିଛି । ଚୀନର ନାଗରିକ ମନ୍ତ୍ରଣାଳୟ ପକ୍ଷରୁ ଏ ସଂକ୍ରାନ୍ତ ବିଜ୍ଞପ୍ତି ପ୍ରକାଶ ପାଇଛି । ପୂର୍ବରୁ ଚୀନ୍ ଅରୁଣାଚଳକୁ ତିବ୍ଦତର ସ୍ୱୟଂଶାସିତ ଅଞ୍ଚଳ ବୋଲି ଉଳ୍ଲେଖ କରିବା ସହ ଏହାର ନାମ ଜଙ୍ଗନାନ ବୋଲି ଦର୍ଶାଇଥିଲା । ଏହା ଚୀନ୍ର ଏକ ଅଂଶ ବୋଲି କହିବା ସହ ଭାରତ ଏହାକୁ ବଳପୂର୍ବକ ଦଖଲ କରିଥିବା କହିଥିଲା । ବର୍ତ୍ତମାନ ଚୀନ୍ ଅରୁଣାଚଳର ୧୧ଟି ଜିଲ୍ଲା, ୧୨ଟି ପାହାଡ, ୪ଟି ନଦୀ, ଗୋଟିଏ ହ୍ରଦ, ଗୋଟିଏ ମାଉଣ୍ଟେନ ପାସ ଓ ଖଣ୍ଡେ ଜମିର ନାମକୁ ବଦଳାଇ ଚୀନ୍ ନାମରେ ନାମିତ କରିଛି ।
ଚୀନ୍ ଲଗାତାର ଭାବେ ଅରୁଣାଚଳକୁ ନିଜର ବୋଲି ଦର୍ଶାଇବା ସହ ଏଠାକୁ ପ୍ରମୁଖ ରାଜନେତା ଓ କୂଟନୀତିଜ୍ଞଙ୍କ ଗସ୍ତ ଉପରେ ଆପତ୍ତି ଉଠାଉଛି । ଅନ୍ୟପକ୍ଷରେ ଆରୁଣାଚଳ ହେଉଛି ଭାରତର ଅବିଚ୍ଛେଦ୍ୟ ଅଙ୍ଗ ଏବଂ ନାମ ପରିବର୍ତ୍ତନ କରିଦେଲେ ସେହିସବୁ ସ୍ଥାନ ଚୀନର ହୋଇଯିବ ନାହିଁ ବୋଲି ଭାରତ ପୂର୍ବରୁ କହିଆସିଛି । ୨୦୨୧ ଡିସେମ୍ବରରେ ଚୀନ୍ ଅରୁଣାଚଳ ପ୍ରଦେଶର ୧୫ଟି ସ୍ଥାନର ନାମ ପରିବର୍ତ୍ତନ କରିଥିଲା ବେଳେ ୨୦୨୩ ଏପ୍ରିଲ ୪ରେ ୧୧ଟି ସ୍ଥାନର ନାଁ ବଦଳାଇଥିଲା ।
