ନୂଆଦିଲ୍ଲୀ: ଦିଲ୍ଲୀ ଅବକାରୀ ଦୁର୍ନୀତି ମାମଲାରେ ବିଆରଏସ୍ ନେତ୍ରୀ କେ. କବିତାଙ୍କ ଅଡ଼ୁଆ ବଢ଼ିବାରେ ଲାଗିଛି । ଇଡି ପରେ ସିବିଆଇ ଗିରଫ କରିଥିବା କବିତାଙ୍କୁ ପୁଣି କୋର୍ଟରୁ ଝଟକା ମିଳିଛି । ଆଜି ତାଙ୍କୁ ଏପ୍ରିଲ ୧୫ ଯାଏଁ ସିବିଆଇ ହେପାଜତକୁ ପଠାଇଛନ୍ତି ରାଉଜ ଆଭେନ୍ୟୁ କୋର୍ଟ । ୫ ଦିନ ପାଇଁ କବିତାଙ୍କୁ ହେପାଜତକୁ ନେବା ପାଇଁ ସିବିଆଇ ଆବେଦନ ଉପରେ କୋର୍ଟ ନିଜର ରାୟ ଆଜି ସନ୍ଧ୍ୟା ପର୍ଯ୍ୟନ୍ତ ସୁରକ୍ଷିତ ରଖିଥିଲେ । ଏବେ ୩ ଦିନ ପାଇଁ କବିତାଙ୍କୁ ସିବିଆଇ ହେପଜତକୁ ପଠାଇ ଦେଇଛନ୍ତି କୋର୍ଟ ।
ଦିଲ୍ଲୀ ଅବକାରୀ ଦୁର୍ନୀତି ସହ ଜଡ଼ିତ ମନି ଲଣ୍ଡରିଂ ମାମଲାରେ କବିତାଙ୍କୁ ସିବିଆଇ ଗିରଫ କରିଛି । ଅପରାଧିକ ଷଡ଼ଯନ୍ତ୍ର ଏବଂ ବ୍ୟାଙ୍କ ଖାତାରେ ହେରଫେର ଏବଂ ଦୁର୍ନୀତି ନିବାରଣ ଅଧିନିୟମର କେତେକ ଧାରାରେ ତାଙ୍କୁ ସିବିଆଇ ଗିରଫ କରିଥିବା ଜଣାପଡ଼ିଛି । କବିତାଙ୍କୁ ୫ ଦିନ ଲାଗି ରିମାଣ୍ଡରେ ନେବାକୁ କୋର୍ଟରେ ଆବେଦନ କରିଥିଲା ସିବିଆଇ ।
କୋର୍ଟରେ ସିବିଆଇ ପକ୍ଷର ଓକିଲ କହିଥିଲେ ଯେ, ଆମ ଆଦମୀ ପାର୍ଟିକୁ ୧୦୦ କୋଟି ଟଙ୍କା ଦେବା ପଛରେ କବିତାଙ୍କ ହାତ ରହିଛି । ମୁଖ୍ୟ ଷଡ଼ଯନ୍ତ୍ରକାରୀଙ୍କ ମଧ୍ୟରେ ସେ ଜଣେ । ଜଣେ ବଡ଼ ବ୍ୟବସାୟୀ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ସାକ୍ଷାତ କରିଥିଲେ । କେଜ୍ରିଓ୍ବାଲଙ୍କ ତାଙ୍କୁ ଅବକାରୀ ନୀତି ଜରିଆରେ ସମର୍ଥନ କରିବେ ବୋଲି ପ୍ରତିଶ୍ରୁତି ଦେଇଥିଲେ। ଏହି ମାମଲାରେ ବହୁ ଅଭିଯୁକ୍ତଙ୍କ ବୟାନ ରେକର୍ଡ ହୋଇଛି । ହୋଟେଲ ତାଜରେ ବୈଠକ ହୋଇଥିଲା ବୋଲି ଓକିଲ କୋର୍ଟରେ କହିଛନ୍ତି ।