ଭୁବନେଶ୍ୱର,୧୦/୦୫: ପ୍ରଚଣ୍ଡ ଖରା ସାଂଗକୁ ଝାଞ୍ଜି ପବନ । ସବୁଠାରୁ ଲମ୍ବା ଅବଧି ପାଇଁ ରାଜ୍ୟକୁ କଲବଲ କଲା ତାତି । ସକାଳୁ ଘରୁ ବାହାରିବା ପୂର୍ବରୁ ଶହେ ଥର ଚିନ୍ତା କରିବାକୁ ପଡ଼ୁଥିଲା । ଯଦିଓ ଏବେ ତାତି କିଛି ମାତ୍ରାରେ ହ୍ରାସ ପାଇଛି, ତଥାପି ଏହା ସଂପୂର୍ଣ୍ଣ ରୂପେ ଅପସରି ନାହିଁ । ଏଭଳି ସ୍ଥିତିରେ କର୍ମଜୀବୀ, କଲେଜ ଛାତ୍ରୀମାନଙ୍କୁ ଘରୁ ପାଦ କାଢ଼ିବାକୁ ପଡ଼ୁଛି । ସୂର୍ଯ୍ୟଙ୍କ ପ୍ରଖର କିରଣ ଆଉ ଉତ୍ତପ୍ତ ଓ ଆଦ୍ର ବାୟୁମଣ୍ଡଳର ପ୍ରଭାବରେ ଶରୀର କଳା (ଟ୍ୟାନ୍)ପଡ଼ୁଛି । ଚର୍ମ କୋଷିକାରୁ ଜଳୀୟ ଅଂଶ ଶୋଷି ହୋଇଯାଉଛି । ସୌନ୍ଦର୍ଯ୍ୟରେ ହେଉଥିବା ଏହି ଅବକ୍ଷୟ ମହିଳାଙ୍କ ପାଇଁ ମୁଣ୍ଡବିନ୍ଧା ପାଲଟିଛି । ଆଉ ଏହାର ଫାଇଦା ଉଠାଉଛନ୍ତି ବ୍ୟୁଟି ପାର୍ଲର । ମୁହଁ, ବେକ, ହାତଗୋଡ଼ରୁ କିରଣ ଦାଗ ହଟାଇବାକୁ(ଡି-ଟ୍ୟାନିଂ) ଏବେ ପାର୍ଲରରେ ବେଶ ଭିଡ଼ ଦେଖିବାକୁ ମିଳୁଛି ।
ଦିନକୁ ଦିନ ପାରଦ ଉପରମୁହାଁ ହେବାରେ ଲାଗିଛି । ପ୍ରଚଣ୍ଡ ଖରାରେ ଚର୍ମରେ କଳା ଆସ୍ତରଣ ପଡ଼ିଯାଉଛି । ଯାହାକୁ ଆମେ ଟ୍ୟାନ୍ ବୋଲି କହୁଛେ । ବିଶେଷକରି ଖରାଦିନେ ସୂର୍ଯ୍ୟଙ୍କର ପ୍ରଖର ଏବଂ ଅତିବାଇଗଣୀ କିରଣ ଫଳରେ ଏପରି ସମସ୍ୟା ଅଧିକ ହୁଏ । ମାତ୍ର ସୌନ୍ଦର୍ଯ୍ୟ ସଚେତନ ମହିଳା ବା ଛାତ୍ରୀ ଏଥିରୁ ମୁକୁଳିବାକୁ ସବୁ ପ୍ରକାର ସତର୍କତା ଅବଲମ୍ବନ କରନ୍ତି । କିଏ ଘରୋଇ ଉପଚାର ଉପରେ ନିର୍ଭର କରିଥାଏ ତ ଆଉ କିଏ ବ୍ୟୁଟି ପାର୍ଲର ଉପରେ ଭରଷା କରିବାକୁ ବାଧ୍ୟ ହୁଏ । ଆଉ ଏହି ସମୟରେ ସୌନ୍ଦର୍ଯ୍ୟ ସଚେତନ ମହିଳା ବା ଝିଅଙ୍କ ଦୁର୍ବଳତାର ସୁଯୋଗ ନିଅନ୍ତି ବ୍ୟୁଟି ପାର୍ଲର । ବିଭିନ୍ନ ପ୍ରକାରର ଅଫର, ଡିସକାଉଣ୍ଟ ଦେଇ ଗ୍ରାହକଙ୍କୁ ଆକର୍ଷିତ କରନ୍ତି ନାମିଦାମୀ ପାର୍ଲର । କେବଳ ମୁହଁ, ବେକରେ ଡି-ଟ୍ୟାନିଂର ମୂଲ୍ୟ ୩ଶହରୁ ଆରମ୍ଭ ହୋଇ ୨ ହଜାର ଟଙ୍କା ପର୍ଯ୍ୟନ୍ତ ରହୁଛି । ଦାମୀ ବ୍ରାଣ୍ଡର କ୍ରିମ୍ ବା ଲୋସନ ବ୍ୟବହାର କଲେ ଏହାର ମୂଲ୍ୟ ଆହୁରି ଅଧିକ । ସେହିପରି ପୁରା ଗୋଡ଼ରେ ଡି-ଟ୍ୟାନିଂର ମୂଲ୍ୟ ହଜାରେ ଟଙ୍କାରୁ ଆରମ୍ଭ ହେଉଥିବା ବେଳେ ହାତ ପାଇଁ ୫ ଶହ ଟଙ୍କାରୁ ଆରମ୍ଭ ହୋଇଥାଏ ।
କେବଳ ଡି-ଟ୍ୟାନିଂ କାହିଁକି ଖରାଦିନେ ନିଜ ମୁହଁକୁ ସତେଜ ଏବଂ ଉ୍ୱଳ ରଖିବା ପାଇଁ ଫେସିଆଲର ଚାହିଦା ମଧ୍ୟ ଅଧିକ । ଫଳରେ ଅଧିକ ଜଳୀୟ ଅଂଶ ରହୁଥିବାରୁ ଖରା ଦିନରେ ଫ୍ରୁଟ୍ସ୍ ଫେସିଆଲ୍ ଏବଂ ଜେଲ୍ ଫେସିଲର ଡିମାଣ୍ଡ ଅଧିକ । ଫ୍ରୁଟ୍ସ ଫେସିଆଲ ମଧ୍ୟରେ ରହିଛି ମିଣ୍ଟ୍, ବାନାନା, ଆଲୋଭେରା, ପପେୟା, ଷ୍ଟ୍ରବେରୀ ଭଳି ଫ୍ରୁଟ୍ସ୍ ଫେସିଆଲ୍ । ଯାହାର ମୂଲ୍ୟ ୫ ଶହ ଟଙ୍କାରୁ ଆରମ୍ଭ ହେଉଛି । ନିଜ ବ୍ୟସ୍ତବହୁଳ ଜୀବନରେ ଯେଉଁମାନେ ପାର୍ଲର ଯାଇ ପାରୁ ନାହାନ୍ତି ସେମାନେ ଘରକୁ ଅନଲାଇନ ବ୍ୟୁଟିସିଆନ ଡକାଉଛନ୍ତି ।
ମୁଡୁମାରେ ଥିବା ସ୍ମିଥ୍ ଆଣ୍ଡ୍ ଷ୍ଟାଇଲ ପାର୍ଲର ମାଲିକ ସସ୍ମିତା ସାହୁ କହନ୍ତି, ଏହି ଋତୁରେ ହିଁ ଡି-ଟ୍ୟାନ୍ର ଚାହିଦା ଅଧିକ ବଢିଯାଏ । କେହି କେହି ଏହାକୁ ମାସରେ ଥରେ କରୁଥିବା ବେଳେ କର୍ମଜୀବୀମାନେ ମାସକୁ ୨ଥର କରୁଛନ୍ତି । ବିଶେଷକରି ଡି-ଟ୍ୟାନ୍ ପାଇଁ ଯୁବପିଢିଙ୍କ ଆଗ୍ରହ ଅଧିକ । ତେବେ ଡି-ଟ୍ୟାନ ହେଉ ବା ଫ୍ରୁଟ ଫେସିଆଲ, ଝିଅଙ୍କ ତୁଳନାରେ ପୁଅଙ୍କ ସଂଖ୍ୟା ବି କିଛି କମ ନୁହେଁ । ସୌନ୍ଦର୍ଯ୍ୟ ସଚେତନ ଅନେକ ପୁଅ ମଧ୍ୟ ପାର୍ଲର ଯିବାକୁ ଆଉ ସଙ୍କୋଚ କରୁନାହାନ୍ତି । ଏଥିପାଇଁ ରାଜଧାନୀରେ ଥିବା ୟୁନିସେକ୍ସ ସେଲୁନରେ ବି ଭିଡ଼ ଦେଖିବାକୁ ମିଳୁଛି ।