ଭୁବନେଶ୍ୱର,୦୨/୦୯: ରାଜଧାନୀରେ ଡେଙ୍ଗୁ ସ୍ଥିତି ଅଣାୟତ୍ତ । ଗତ ଦୁଇଦିନରେ ୧୦୦ ପାଖାପାଖି ରୋଗୀ ଚିହ୍ନଟ ହେଲେଣି । ଶନିବାର ୫୯ ରୋଗୀ ଚିହ୍ନଟ ହୋଇଥିଲେ । ରବିବାର ୫୪୦ ଟେଷ୍ଟିଂ ହୋଇଥିବାବେଳେ ୪୦ ରୋଗୀ ଚିହ୍ନଟ ହୋଇଛନ୍ତି । ରାଜଧାନୀବାସୀଙ୍କୁ ଏବେ ଡେଙ୍ଗୁ ଚିନ୍ତା ଘାରିଛି । ଲୋକେ ଆତଙ୍କିତ ଅବସ୍ଥାରେ ଅଛନ୍ତି । ମାତ୍ର ବିଏମ୍ସି ଓ ସ୍ୱାସ୍ଥ୍ୟ ବିଭାଗ ପରସ୍ପରକୁ ଦୋଷାରପ କରିଚାଲିଛନ୍ତି ।
ଖୋର୍ଦ୍ଧା ଜିଲ୍ଲାରୁ ଆଜି ପର୍ଯ୍ୟନ୍ତ ୧୩୪୭ ରୋଗୀ ଚିହ୍ନଟ ହେଲେଣି । ସେଥିରୁ ଖୋର୍ଦ୍ଧା ଗ୍ରାମାଞ୍ଚଳର ୨୫୮ ଥିଲାବେଳେ ଭୁବନେଶ୍ୱରରେ ୧୦୩୫ ରହିଛି । ଅନ୍ୟ ଜିଲ୍ଲାରୁ ୫୪ ଜଣ ଚିହ୍ନଟ ହୋଇଛନ୍ତି । ପଟିଆ ଅଞ୍ଚଳରେ ରୋଗୀ ସଂଖ୍ୟା ୬୦ରେ ପହଞ୍ଚିଲାଣି। ସାଲିଆ ସାହିରେ ୪୦, ସହିଦ ନଗରରେ ୩୬, ଖଣ୍ଡଗିରିରେ ୩୫, ଚନ୍ଦ୍ରଶେଖରପୁରରେ ୩୦, ଆଇଆରସି ଭିଲେଜରେ ୨୪, ଜୟଦେବ ବିହାରରେ ୨୪ ଓ ପଳାଶୁଣୀରେ ୧୫ ଚିହ୍ନଟ ହୋଇଛନ୍ତି । କ୍ୟାପିଟାଲ ହସ୍ପିଟାଲ୍ରେ ଆଜି ୧୮ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି ।
ଦିନକୁ ଦିନ ଡେଙ୍ଗୁ ସ୍ଥିତି ସଙ୍ଗୀନ ହେବାରେ ଲାଗିଛି । ତଥାପି ବିଏମ୍ସି ଓ ସ୍ୱାସ୍ଥ୍ୟ ବିଭାଗ ଅଧିକାରୀଙ୍କ ନିଦ ଭାଙ୍ଗୁନି । ସ୍ୱାସ୍ଥ୍ୟ ବିଭାଗ କହୁଛି, ବିଏମ୍ସି ମଶା ବଂଶ ନିପାତ କରିବାରେ ବିଫଳ । ଆଉ ବିଏମ୍ସି କହୁଛି, ଡେଙ୍ଗୁ ନିୟନ୍ତ୍ରଣ ନେଇ ଜନସ୍ୱାସ୍ଥ୍ୟ ବିଭାଗ ଅବହେଳା କରୁଛି । ଉଭୟ ବିଭାଗ ପରସ୍ପର ଉପରେ ଦୋଷ ଲଦି ଦେଉଛନ୍ତି ।
