ନୂଆଦିଲ୍ଲୀ: ନିର୍ବାଚନୀ ବଣ୍ଡ ମାମଲାର ଶୁଣାଣି ବେଳେ ସୁପ୍ରିମକୋର୍ଟ ପୁଣି ଥରେ ଭାରତୀୟ ଷ୍ଟେଟ ବ୍ୟାଙ୍କକୁ ତାଗିଦ୍ କରିଛନ୍ତି । ପଚାରିଛନ୍ତି ନିର୍ବାଚନୀ ବଣ୍ଡ ସହ ଜଡ଼ିତ ସମ୍ପୂର୍ଣ୍ଣ ତଥ୍ୟ କାହିଁକି ଦିଆଗଲା ନାହିଁ । ମାମଲାରେ ସୁପ୍ରିମକୋର୍ଟ ୨୧ ତାରିଖ ଅପରାହ୍ଣ ୫ଟା ସୁଦ୍ଧା ଏସବିଆଇକୁ ସମ୍ପୂର୍ଣ୍ଣ ତଥ୍ୟ ଦାଖଲ ପାଇଁ ନିର୍ଦ୍ଦେଶ ଦେଇଛନ୍ତି ।

ଏଥିସହ ଏସବିଆଇ ଅଧ୍ୟକ୍ଷଙ୍କୁ ଏକ ସତ୍ୟପାଠ ଦାଖଲ କରିବାକୁ କୋର୍ଟ କହିଛନ୍ତି । ଯେଉଁଥିରେ ସମ୍ପୂର୍ଣ୍ଣ ତଥ୍ୟ ପ୍ରକାଶ କରାଯାଇଥିବ ଏବଂ କିଛି ଲୁଚାଯାଇ ନଥିବ । ସୁପ୍ରିମକୋର୍ଟ କହିଛନ୍ତି, ଏସବିଆଇରୁ ତଥ୍ୟ ପାଇବା ପରେ ନିର୍ବାଚନ ଆୟୋଗ ତୁରନ୍ତ ଏହାକୁ ୱେବସାଇଟରେ ସୂଚନା ସାର୍ବଜନୀନ କରିବେ ।

ଏସବିଆଇ ପକ୍ଷରୁ ବରିଷ୍ଠ ଆଇନଜୀବୀ ହରୀଶ ସାଲଭେ ପକ୍ଷ ରଖିଥିଲେ । ସିଜେଆଇ ପ୍ରଶ୍ନ କରିଥିଲେ ଯେ, 'ଆମେ ସମସ୍ତ ତଥ୍ୟ ପ୍ରକାଶ କରିବାକୁ କହିଥିଲୁ, ଏଥିରେ ବଣ୍ଡ ନମ୍ବର ରହିବାର ଥିଲା, କିନ୍ତୁ ସୂଚନା ଅସମ୍ପୂର୍ଣ୍ଣ ଅଟେ । ଗୁରୁବାର ସୁଦ୍ଧା ବଣ୍ଡ ନମ୍ବର ସହ ସମସ୍ତ ତଥ୍ୟ ଦେବା ଲାଗି ସୁପ୍ରିମକୋର୍ଟ ଏସବିଆଇକୁ ନିର୍ଦ୍ଦେଶ ଦେଇଛନ୍ତି ।

ମାମଲାର ଶୁଣାଣି ସମୟରେ ଜଷ୍ଟିସ୍ ସଞ୍ଜୀବ ଖନ୍ନା କହିଥିଲେ, ଆମେ ଥରେ ନିର୍ଦ୍ଦେଶ ଦେଲୁ । ଆମେ ଯାହା କରୁଛୁ ଅନେକ ପ୍ରସଙ୍ଗ ଓ ସମସ୍ୟାର ସମାଧାନ ବାହାରିବ । ମାମଲାରେ ଆଇନଜୀବୀ ପ୍ରଶାନ୍ତ ଭୂଷଣ ରାଜନୈତିକ ଦଳ ତରଫରୁ କହିଥିଲେ, ଚାନ୍ଦା ଦେଇଥିବା ସଂସ୍ଥାର ନାଁ ଖୁଲାସା କରିବା ପ୍ରସଙ୍ଗ ଉଠାଇଥିଲେ । ଯାହାକୁ ନେଇ ଜଷ୍ଟିସ୍ ଗବଈ କହିଥିଲେ, ଆମେ ଏବେ ରିଭ୍ୟୁ କରିବା ଲାଗି ବସି ନାହୁଁ ।