ପ୍ୟାରିସ୍‌,୦୫/୦୮: ସର୍ବିୟା ତାରକା ନୋଭାକ୍‌ ଜୋକୋଭିକ୍‌ ଦୀର୍ଘ ପ୍ରତୀକ୍ଷାର ଅନ୍ତ ଘଟାଇ ଶେଷରେ ଅଲିମ୍ପିକ୍ସ ଚାମ୍ପିଅନ୍‌ ହେବା  ସହ ଗୋଲ୍ଡେନ ସ୍ଲାମ୍‌ ସ୍ୱପ୍ନ ପୂରଣ କରିଛନ୍ତି । ରବିବାର ଅନୁଷ୍ଠିତ ପୁରୁଷ  ବର୍ଗ ଫାଇନାଲ୍‌ରେ ସେ ସିଧାସଳଖ ୭-୬ (୭-୩), ୭-୬ (୭- ୨) ସେଟ୍‌ରେ ସ୍ପେନର କାର୍ଲୋସ ଅଲ୍‌କାରାଜଙ୍କୁ ପରାସ୍ତ କରିଥିଲେ । ଏହି ମ୍ୟାଚ୍‌ ଜିତିବା ପାଇଁ ତାଙ୍କୁ ପାଖାପାଖି ୩ଘଣ୍ଟା ଲାଗି ଯାଇଥିଲା । ଜୋକୋଭିକ୍‌ ଟାଇବ୍ରେକରେ ଉଭୟ ସେଟ୍‌ ଜିତିଥିଲେ । 

୨୦୦୮ ବେଜିଂ ଅଲିମ୍ପିକ୍ସ ବ୍ରୋଞ୍ଜ ବିଜେତା ଜୋକୋଭିକ୍‌ ଗତ ଲଣ୍ଡନ,  ରିଓ ଏବଂ ଟୋକିଓ ଅଲିମ୍ପିକ୍ସରେ ବିଫଳ ହୋଇଥିଲେ । ଦୀର୍ଘ ଦିନର  ପ୍ରତୀକ୍ଷା ପରେ ସେ ପ୍ୟାରିସ୍‌ ଅଲିମ୍ପିକ୍ସରେ ସ୍ୱର୍ଣ୍ଣ ପଦକ ସ୍ୱାଦ ଚାଖିଥିଲେ । ବିଶ୍ୱର ଚତୁର୍ଥ ପୁରୁଷ ଖେଳାଳି ଭାବେ ଗ୍ଲୋଡେନ୍‌ ସ୍ଲାମ୍‌ (ସମସ୍ତ ୪ଟି  ଯାକ ଗ୍ରାଣ୍ଡସ୍ଲାମ୍‌ ଓ ଅଲିମ୍ପିକ୍ସ ଟାଇଟଲ୍‌) ସଫଳତା ହାସଲ କରିଥିଲେ। ପୂର୍ବରୁ ସ୍ପେନର ପ୍ରସିଦ୍ଧ ଖେଳାଳି ରାଫେଲ ନାଦାଲ, ସ୍ୱିଜରଲାଣ୍ଡର ରୋଜର  ଫେଡେରର ଏବଂ ଆମେରିକାର ପିଟ୍‌ ସାମ୍ପ୍ରାସ ଗୋଲ୍ଡେନ ସ୍ଲାମ୍‌ ପୂରଣ  କରିଥିଲେ । ୩୭ ବର୍ଷୀୟ ଜୋକୋଭିକ୍‌ ବୟୋଜ୍ୟେଷ୍ଠ ଖେଳାଳି ଭାବେ  ସିଙ୍ଗଲ୍ସରେ ଅଲିମ୍ପିକ୍ସ ସ୍ୱର୍ଣ୍ଣ ଜିତିବାର ରେକର୍ଡ଼ ସ୍ଥାପନ କରିଛନ୍ତି ।