ପୁରୀ, ୨୪/୦୫ : ଶ୍ରୀମନ୍ଦିର ମୁଖ୍ୟ ପ୍ରଶାସକ ଭାବେ ଅତିରିକ୍ତ ଦାୟିତ୍ୱ ନେଇଛନ୍ତି କୃଷି ବିଭାଗର ପ୍ରମୁଖ ଶାସନ ସଚିବ ଡଃ ଅରବିନ୍ଦ ପାଢ଼ୀ । ଶ୍ରୀମନ୍ଦିର ମୁଖ୍ୟ ପ୍ରଶାସକ ଭାବେ ଅତିରିକ୍ତ ଦାୟିତ୍ୱରେ ଥିବା ବୀର ବିକ୍ରମ ଯାଦବ ୨୧ ଦିନିଆ ବିଦେଶ ଗସ୍ତରେ ଯାଇଥିବାରୁ ଡଃ ପାଢ଼ୀ ଏହି ଦାୟିତ୍ୱ ତୁଲାଉଛନ୍ତି। ଡଃ ପାଢ଼ୀ ପୂର୍ବରୁ ଶ୍ରୀମନ୍ଦିର ମୁଖ୍ୟ ପ୍ରଶାସକ ଥିଲେ। ତେଣୁ ତାଙ୍କର ବିଶେଷ ଅଭିଜ୍ଞତା ରହିଛି । ନିର୍ବାଚନ  ଓ ରଥଯାତ୍ରାକୁ ଦୃଷ୍ଟିରେ ରଖି ତାଙ୍କୁ ଏହି ଅତିରିକ୍ତ ଦାୟିତ୍ୱ ମିଳିଛି । 

ବୀର ବିକ୍ରମ ଯାଦବ ଫେରିବା ପରେ ସେ ପୁଣି ଶ୍ରୀମନ୍ଦିର ମୁଖ୍ୟ ପ୍ରଶାସକ ଦାୟିତ୍ୱ ନେବେ। ଶ୍ରୀମନ୍ଦିର ସ୍ଥାୟୀ ମୁଖ୍ୟ ପ୍ରଶାସକ ଦାୟିତ୍ୱ ସରକାର ହଟାଇ ଦେବା ପରେ ଏପର୍ଯ୍ୟନ୍ତ ଏଠାରେ ପୂର୍ଣ୍ଣକାଳୀନ ମୁଖ୍ୟ ପ୍ରଶାସନ ନିଯୁକ୍ତି ଦ୍ୱନ୍ଦ୍ୱ ଲାଗି ରହିଛି । ସୁପ୍ରିମ୍‌କୋର୍ଟ ସ୍ଥାୟୀ ମୁଖ୍ୟ ପ୍ରଶାସକ ନିଯୁକ୍ତି ସାଙ୍ଗକୁ ଶ୍ରୀମନ୍ଦିରରେ ଶୃଙ୍ଖଳା ରକ୍ଷା ନିମନ୍ତେ ଅନେକ ନିର୍ଦ୍ଦେଶ ଦେଇଥିଲେ । ହେଲେ ଏପର୍ଯ୍ୟନ୍ତ ଅଧିକାଂଶ ନିର୍ଦ୍ଦେଶ ପାଳନ ହୋଇନି । ସେପଟେ ଆସନ୍ତା ଜୁନ୍‌ ୪ରେ ଭୋଟ  ଗଣତି ଓ ଫଳାଫଳ ପରେ ରଥଯାତ୍ରା ପାଇଁ ୨୦ ତାରିଖ ସୁଦ୍ଧା ଶ୍ରୀମନ୍ଦିର ପରିଚାଳନା କମିଟି ବୈଠକ ବସିବାକୁ ପ୍ରସ୍ତୁତି ହେଉଛି।