ନୂଆଦିଲ୍ଲୀ,୨୬।୫: ଦିଲ୍ଲୀରୁ ଉଡାଣ ଆରମ୍ଭ କରିଥିବା ସ୍ପାଇସଜେଟ୍ ବିମାନର ଜରୁରୀ ଅବତରଣ। ଇନ୍ଦିରା ଗାନ୍ଧି ଇଣ୍ଟରନ୍ୟାସନାଲ ଏୟାରପୋର୍ଟରେ ଉଡାଣ ଭରିବାର କିଛି ସମୟ ପରେ ବିମାନ ଖରାପ ହୋଇଯାଇଥିଲା। ଏହାପରେ ବିମାନକୁ ଲ୍ୟାଣ୍ଡିଂ କରିବାକୁ ପଡିଥିଲା। ଏହାର ଇଞ୍ଜିନରେ ଖରାପ ଥିବାର କୁହାଯାଉଛି। ସ୍ପାଇସଜେଟ୍ ଏୟାରକ୍ରାଫ୍ଟ ରବିବାର ସକାଳେ ଲେହ ଅଭିମୁଖେ ଉଡାଣ ଭରିଥିଲା, କିନ୍ତୁ କିଛି ସମୟ ପରେ ଏହି ବିମାନ ପୁଣିଥରେ ଦିଲ୍ଲୀ ବିମାନ ବନ୍ଦରକୁ ଆସିଛି। ନ୍ୟୁଜ ଏଜେନ୍ସି ପିଟିଆଇର ସୁତ୍ରରୁ କୁହାଯାଇଛି ଯେ, ଏହି ବିମାନରେ ପ୍ରାୟ ୧୩୫ ଯାତ୍ରୀ ଥିଲେ। ବିମାନକୁ ସଫଳତାର ସହ ଦିଲ୍ଲୀ ଏୟାରପୋର୍ଟରେ ଲ୍ୟାଣ୍ଡ କରାଯାଇଥିଲା।
ଏୟାରକ୍ରାଫ୍ଟ ଓ ଦିଲ୍ଲୀ ଏୟାରପୋର୍ଟକୁ ସମ୍ପୂର୍ଣ୍ଣ ଭାବରେ ଏମର୍ଜେନ୍ସି ଘୋଷଣା କରାଯାଇଛି। ବିମାନ ଏସ୍ଜି୧୨୩ ସକାଳ ପ୍ରାୟ ସାଢେ ୧୦ଟାରେ ଉଡାଣ ଭରିଥିଲା। କିନ୍ତୁ ୧୧ଟା ବେଳେ ବିମାନକୁ ଲ୍ୟାଣ୍ଡ କରିବାକୁ ପଡିଛି। କୁହାଯାଉଛି ଯେ, ବିମାନର ଇଞ୍ଜିନ ଥରି ଯାଇଥିଲା। ବୋଇଂ ୭୩୭-୭ ଏୟାରକ୍ରାଫ୍ଟ ଉଡାଣର କିଛି ସମୟ ପରେ ଏୟାରପୋର୍ଟରେ ଅବତରଣ କରିଥିଲା।
କିଛି ଗଣମାଧ୍ୟମର ରିପୋର୍ଟରେ କୁହାଯାଇଛି ଯେ, ବିମାନ ସହ ଏକ ପକ୍ଷୀ ମାଡ ହୋଇଥିଲା। ଏହାପରେ ଇଞ୍ଜିନ ଥରିବାକୁ ଲାଗିଥିଲା। ଏହି କାରଣରୁ ୧୩୫ ଜଣ ଯାତ୍ରୀ ଚିନ୍ତାରେ ପଡିଯାଇଥିଲେ। ହେଲେ ପାଇଲଟ୍ ନିଜର ଉପସ୍ଥିତ ବୁଦ୍ଧି ଦେଖାଇ ବିମାନକୁ ଦିଲ୍ଲୀ ଏୟାରପୋର୍ଟରେ ସୁରକ୍ଷିତ ଲ୍ୟାଣ୍ଡ କରିଥିଲେ, ସେତେବେଳେ ଯାତ୍ରୀମାନେ ଆଶ୍ବସ୍ତ ହୋଇଥିଲେ।
