ନୂଆଦିଲ୍ଲୀ: ମଧ୍ୟ ୟୁରୋପୀୟ ଦେଶ ସ୍ଲୋଭାକିଆର ପ୍ରଧାନମନ୍ତ୍ରୀ ରବର୍ଟ ଫିକୋ (Robert Fico)ଙ୍କ ଉପରେ ମରଣାନ୍ତକ ଆକ୍ରମଣ । କ୍ୟାବିନେଟ ମିଟିଂ ପରେ ଲୋକଙ୍କୁ ସମ୍ବୋଧିତ କରିବା ବେଳେ ତାଙ୍କ ଉପରେ ଏହି ଆକ୍ରମଣ ହୋଇଛି । ଆକ୍ରମଣକାରୀ ତାଙ୍କୁ ମାରିବା ପାଇଁ ଅନେକ ରାଉଣ୍ଡ ଗୁଳିମାଡ଼ କରିଛନ୍ତି । ଏଥିରେ ସେ ଗୁରୁତର ଭାବେ ଆହତ ହୋଇଥିବା ବେଳେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ଏନେଇ ସ୍ଥାନୀୟ ଗଣମାଧ୍ୟମ ଟିଏ-୩ରେ ରିପୋର୍ଟ ପ୍ରକାଶ ପାଇଛି ।ତେବେ ଏହି ଗୁଳିକାଣ୍ଡ ରାଜଧାନୀଠୁ ୧୫୦ କିଲୋମିଟର ଦୂରରେ ଥିବା ହ୍ୟାଣ୍ଡଲୋଭା ସହରରେ ହୋଇଛି ।
ସେପଟେ ୫୯ ବର୍ଷୀୟ ରବର୍ଟ ଫିକୋଙ୍କ ସ୍ବାସ୍ଥ୍ୟବସ୍ଥା କିଭଳି ଅଛି ତାହା ଜଣାପଡ଼ିନାହିଁ । ୨୦୨୨ରେ ଜାପାନର ପ୍ରଧାନମନ୍ତ୍ରୀ ଶିଞ୍ଜୋ ଆବେଙ୍କୁ ଯେଉଁଭଳି ଭାବରେ ଗୁଳି କରାଯାଇଥିଲା ଠିକ୍ ସେହିଭଳି ରବର୍ଟ ଫିକୋଙ୍କ ଉପରେ ଆକ୍ରମଣ ହୋଇଥିବା କୁହାଯାଉଛି । ଏକ ମିଡିଆ ରିପୋର୍ଟ ଅନୁସାରେ ଜଣେ ବ୍ୟକ୍ତିଙ୍କୁ ଅଟକ ରଖିଛି ପୋଲିସ ।ତେବେ ସେ ଆକ୍ରମଣକାରୀ ନା ଆଉ କିଏ ତାହା ସ୍ପଷ୍ଟ ହୋଇ ନାହିଁ ।
ମିଳିଥିବା ସୂଚନା ଅନୁସାରେ, ସ୍ଲୋଭାକିଆର ପ୍ରଧାନମନ୍ତ୍ରୀଙ୍କ ଉପରେ ଦୁଇଟି ଗୁଳି ବାଜିଛି । ଗୋଟିଏ ତାଙ୍କ ଛାତି ଏବଂ ଅନ୍ୟଟି ପେଟରେ ଲାଗିଛି । ତେବେ ଏହି ଆକ୍ରମଣ କାହିଁକି ହୋଇଛି, ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇ ନାହିଁ । ରବର୍ଟ ଫିକୋ ଗତବର୍ଷ ଅକ୍ଟୋବରରେ ତୃତୀୟ ଥର ପାଇଁ ସ୍ଲୋଭାକିଆର ପ୍ରଧାନମନ୍ତ୍ରୀ ଭାବରେ ନିର୍ବାଚିତ ହୋଇଥିଲେ ।