ଭୁବନେଶ୍ୱର,୦୨/୦୪: ମଙ୍ଗଳବାର କଂଗ୍ରେସର ଓଡ଼ିଶାର ପ୍ରଥମ ପର୍ଯ୍ୟାୟ ଟିକଟ ଘୋଷଣା ହେବ । ତେବେ ୧୪୭ ବିଧାନସଭା ସିଟ୍ ଓ ୨୧ ଲୋକସଭା ସିଟ୍ରେ ପ୍ରାର୍ଥୀ ଘୋଷଣା ନ କରି ପ୍ରଥମ ଓ ଦ୍ୱିତୀୟ ପର୍ଯ୍ୟାୟ ନିର୍ବାଚନ ହେବାକୁ ଥିବା ସିଟଗୁଡିକ ମଧ୍ୟରୁ ଅଧିକାଂଶ ଆସନରେ ଟିକଟ ଘୋଷଣା କରାଯିବ । ପ୍ରଥମ ପର୍ଯ୍ୟାୟରେ ୧୨ ସାଂସଦ ଓ ୫୨ ବିଧାୟକ ପ୍ରାର୍ଥୀ ଘୋଷଣା କରାଯିବ ବୋଲି ବରିଷ୍ଠ କଂଗ୍ରେସ ନେତା ସୂଚନା ଦେଇଛନ୍ତି ।
ପ୍ରଦେଶ କଂଗ୍ରେସ କମିଟି ସଭାପତି ଶରତ ପଟ୍ଟନାୟକ କହିଛନ୍ତି, ସ୍କ୍ରିନିଂ କମିଟି ବୈଠକ ସରିବା ପରେ ଗତକାଲି ରାତିରେ କେନ୍ଦ୍ରୀୟ ନିର୍ବାଚନ କମିଟି(ସିଇସି) ବୈଠକ ସରିଛି । ଏହି ବୈଠକରେ ଓଡ଼ିଶାର ଅଧିକାଂଶ ଆସନ ନେଇ ତର୍ଜମା ସରିଛି । ଆସନ୍ତାକାଲି ଯେ କୌଣସି ମୂହୁର୍ତ୍ତରେ ଏଆଇସିସି ଟିକଟ ଘୋଷଣା କରିପାରେ ବୋଲି ପିସିସି ସଭାପତି ଶ୍ରୀ ପଟ୍ଟନାୟକ କହିଛନ୍ତି । ଯୋଗ୍ୟ ଓ ଜିତିବା ସମ୍ଭାବନା ଥିବା ପ୍ରାର୍ଥୀଙ୍କୁ ଟିକଟ୍ ମିଳିବ । ଯୁବ, ଛାତ୍ର ଓ ମହିଳାଙ୍କୁ ଅଗ୍ରାଧିକାର ଦିଆଯିବ । ଟିକଟ ବଣ୍ଟନ ବେଳେ ସବୁ ବର୍ଗଙ୍କୁ ଗୁରୁତ୍ୱ ମିଳିବ ବୋଲି ଶ୍ରୀ ପଟ୍ଟନାୟକ କହିଛନ୍ତି । ତେବେ ଦଳ ଛାଡୁଥିବା ନେତାଙ୍କ ସମ୍ପର୍କରେ ଶରତ କହିଛନ୍ତି ଯେ, ପ୍ରତି ନିର୍ବାଚନ ସମୟରେ ଏଭଳି ସ୍ଥିତି ଦେଖାଯାଏ । କେବଳ ଓଡ଼ିଶା କି କଂଗ୍ରେସରେ ହେଉଛି ତାହା ନୁହଁ, ସାରା ଦେଶରେ ହେଉଛି । ବିଜେଡି ଓ ବିଜେପିରୁ ପୂର୍ବତନ ସାସଂଦ ଓ ବିଧାୟକ ମଧ୍ୟ ଦଳ ଛାଡୁଛନ୍ତି । ଏଥିରେ ବ୍ୟସ୍ତ ହେବାର କିଛି କଥା ନାହିଁ । ନିଜ ସ୍ୱାର୍ଥ ପାଇଁ କିଛି ନ୍ୟସ୍ତ ସ୍ୱାର୍ଥ ବ୍ୟକ୍ତି ଦଳ ଛାଡ଼ୁଛନ୍ତି । ଭଲ ନେତାମାନେ ଦଳ ଛାଡନ୍ତି ନାହିଁ ବୋଲି ଶ୍ରୀ ପଟ୍ଟନାୟକ କହିଛନ୍ତି ।
ଉଲ୍ଲେଖଯୋଗ୍ୟ, କଂଗ୍ରେସ ଟିକଟ୍ ବଣ୍ଟନ ପାଇଁ ଓଡ଼ିଶା କଂଗ୍ରେସ ପ୍ରଭାରୀ ଡ. ଅଜୟ କୁମାର, ପିସିସି ସଭାପତି ଶରତ ପଟ୍ଟନାୟକ, ଓଡ଼ିଶା କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ଦିଲ୍ଲୀରେ ଡେରା ପକାଇଛନ୍ତି । ସ୍କ୍ରିନିଂ କମିଟି ବୈଠକ ବେଳେ ପୂର୍ବତନ ପିସିସି ସଭାପତି ଜୟଦେବ ଜେନା, ବିଧାୟକ ସନ୍ତୋଷ ସିଂ ସାଲୁଜା ପ୍ରମୁଖ ରାଜ୍ୟ କଂଗ୍ରେସର ବହୁ ବରିଷ୍ଠ ନେତା ଯୋଗ ଦେଇଥିଲେ । ସେହିପରି ସିଇସି ବୈଠକ ବେଳେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ, ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀ, ଏଆଇସିସି ସାଧାରଣ ସମ୍ପାଦକ କେ ସି ବେଣୁଗୋପାଳ, ପୂର୍ବତନ କେନ୍ଦ୍ରମନ୍ତ୍ରୀ ଅମ୍ବିକା ସୋନି, ଛତିଶଗଡ଼ ପୂର୍ବତନ ଉପମୁଖମନ୍ତ୍ରୀ ଟି ଏସ୍ ସିଂଦେଓଙ୍କ ସମେତ ଅନ୍ୟ ବରିଷ୍ଠ ନେତା ଯୋଗ ଦେଇଥିଲେ ।
