ବେତନଟୀ,୦୭/୧୧: ଚାଲେଞ୍ଜ ନେଇ ଗୁଲୁଗୁଲା ଖାଉଖାଉ ତଣ୍ଟିରେ ଲାଖିଯିବାରୁ ଶ୍ୱାସରୁଦ୍ଧ ହୋଇ ଜଣେ  ଯୁବକଙ୍କ ଜୀବନ ଯାଇଛି । ମୃତକ ମୟୂରଭଞ୍ଜ ଜିଲ୍ଲା  ବେତନଟୀ ଥାନା ବଡ଼ଜାମବଣି ଫାଣ୍ଡି ଅଧୀନ ଦାନ୍ତିଆମୁହାଁ  ଗ୍ରାମର ସ୍ୱର୍ଗତ ବିଦ୍ୟାଧର ମହାନାୟକଙ୍କ ପୁଅ ଶିରୀଶ  ଚନ୍ଦ୍ର ମହାନାୟକ (୪୨) । 

ରବିବାର ଦାନ୍ତିଆମୁହାଁ ସାପ୍ତାହିକ ହାଟ ଥିଲା । ହାଟରେ ଶିରୀଶ କିଛି ବନ୍ଧୁଙ୍କ ସହ ଗୁଲୁଗୁଲା ଖିଆଚାଲେଞ୍ଜରେ ଭାଗ ନେଇଥିଲେ । ଏକସଙ୍ଗେ ୪ଟି ଗୁଲୁଗୁଲା ଏବଂ ଗୋଟିଏ ମାଲପୁଆ ପାଟିରେ ପୂରାଇ ଖାଇବାକୁ ଆରମ୍ଭ କରିବ ବେଳେ ଏହା  ତଣ୍ଟିରେ ଲାଖି ଯାଇଥିଲା । ଫଳରେ ଶିରୀଶ ଶ୍ୱାସରୁଦ୍ଧ ହୋଇ ଯାଇଥିଲେ । ପାଖରେ ଥିବା ଲୋକେ ତାଙ୍କୁ ପାଣି  ପିଆଇଥିଲେ ବି ପାଣି ନାକ ପଟୁ ବାହାରି ଆସିଥିଲା । ଶିରୀଶ ଛଟପଟ ହୋଇ ତଳେ ପଡ଼ିଯାଇଥିଲେ । ସ୍ଥାନୀୟ  ଲୋକେ ତାଙ୍କୁ ବାରିପଦା ଡାକ୍ତରଖାନା ନେଇଥିଲେ ।  ଡାକ୍ତର ଶିରୀଶଙ୍କୁ ମୃତ ଘୋଷଣା କରିଥିଲେ ।