ମୁମ୍ବାଇ, ୨୬/୦୯: ମହାରାଷ୍ଟ୍ର ବଦଲାପୁରର ଏକ ସ୍କୁଲରେ ଗତ ମାସରେ ଦୁଇ ଶିଶୁଙ୍କ ଯୌନ ଶୋଷଣ ଘଟଣାର ଅଭିଯୁକ୍ତ ଅକ୍ଷୟ ସିନ୍ଦେର ଏନ୍କାଉଣ୍ଟର ଉପରେ ବମ୍ବେ ହାଇକୋର୍ଟ ବୁଧବାର ପ୍ରଶ୍ନ ଉଠାଇଛନ୍ତି । ଜଷ୍ଟିସ୍ ରେବତୀ ମୋହିତେ ଡେରେ ଓ ଜଷ୍ଟିସ୍ ପୃଥ୍ୱୀରାଜ ଚୌହାନଙ୍କ ଖଣ୍ଡପୀଠ ରାଜ୍ୟ ସରକାରଙ୍କୁ ପ୍ରଶ୍ନ କରିଛନ୍ତି ଯେ, ୪ ଜଣ ଅଫିସର ଜଣେ ଅଭିଯୁକ୍ତକୁ ସମ୍ଭାଳି ପାରିଲେ ନାହିଁ ବୋଲି ଆମେ କିଭଳି ଗ୍ରହଣ କରିବୁ । ଅଭିଯୁକ୍ତ ହାତକଡ଼ି ପିନ୍ଧିଥିଲେ । ଆତ୍ମରକ୍ଷା ସ୍ଥିତିରେ ସିଧାସଳଖ ଅଭିଯୁକ୍ତଙ୍କର ମୁଣ୍ଡ ନୁହଁ, ଗୋଡ଼ କିମ୍ବା ବାହୁକୁ ଗୁଳି କରାଯାଏ । ଗୁଳି ଚଳାଇଥିବା ଅଫିସରଙ୍କୁ କେଉଁସ୍ଥାନକୁ ଗୁଳି ମାରିବେ ତାହା ଜଣାଥିବା ଦରକାର ।
ଅଭିଯୁକ୍ତ ଟ୍ରିଗର ଦବାଇବା କ୍ଷଣି ୪ ଜଣ ଲୋକ ଖୁବ୍ ସହଜରେ ତାକୁ କାବୁ କରିପାରିଥାନ୍ତେ । ସେ ସେଭଳି ଶକ୍ତିଶାଳୀ ମଧ୍ୟ ନଥିଲା । ସେଥିଲାଗି କାହିଁକି ଉଦ୍ୟମ କରାଗଲାନି । ବଦ୍ଲାପୁର ଘଟଣାକୁ ଏନ୍କାଉଣ୍ଟର କହିବା କଷ୍ଟକର । ଏଥିସହ କୋର୍ଟ ସିଆଇଡିକୁ କେସ୍ ପେପର ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି । ଅଭିଯୁକ୍ତକୁ ଜେଲ୍ରୁ ବାହାର କରିବା ପରଠାରୁ ତାକୁ ହସ୍ପିଟାଲରେ ମୃତ ଘୋଷିତ କରାଯିବା ଯାଏ ସିସିଟିଭି ଫୁଟେଜ୍କୁ ସୁରକ୍ଷିତ ରଖିବାକୁ କହିଛନ୍ତି । ସେହିପରି ଅଭିଯୁକ୍ତଙ୍କ ବାପାଙ୍କ ଅଭିଯୋଗ ନେଇ କାହିଁକି ଏତଲା ରୁଜୁ ହୋଇନାହିଁ ବୋଲି ପ୍ରଶ୍ନ କରିବା ସହ ତାର ମୃତ୍ୟୁର ନିରପେକ୍ଷ ତଦନ୍ତ ଉପରେ କୋର୍ଟ ଗୁରୁତ୍ୱାରୋପ କରିଛନ୍ତି ।
ଇତିମଧ୍ୟରେ ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଆଜି କହିଛନ୍ତି, ପୁଲିସ ଅଭିଯୁକ୍ତ ଉପରେ ଆତ୍ମରକ୍ଷା ଲାଗି ଗୁଳି ଚଳାଇଥିଲା । ଯଦି ସେ ଖସି ପଳାଇଥାନ୍ତା ତେବେ ବିରୋଧୀମାନେ ଏଥିନେଇ ପ୍ରଶ୍ନ କରିଥାନ୍ତେ । ଘଟଣାରେ ଆହତ ପୁଲିସଙ୍କୁ ଆମେ ସମର୍ଥନ କରିବା ଦରକାର । ସିନ୍ଦେର ୪ଟି ପତ୍ନୀ ଥିଲେ । ସେମାନଙ୍କ ମଧ୍ୟରୁ ଜଣେ ଖସି ପଳାଇ ପୁଲିସ ନିକଟରେ ମାମଲା ରୁଜୁ କରାଇଥିଲେ । ସେ ଅଭିଯୁକ୍ତ ବିରୋଧରେ ଅପ୍ରାକୃତିକ ଯୌନକ୍ରିୟାର ଅଭିଯୋଗ ବି ଆଣିଥିଲେ । ପୁଲିସ ଅନୁସାରେ, ସେହି ମାମଲାରେ ସୋମବାର କ୍ରାଇମବ୍ରାଞ୍ଚ ଟିମ୍ ତାକୁ ତଲୋଜା ଜେଲ୍ରୁ ବଦଲାପୁର ନେଉଥିବାବେଳେ ରାସ୍ତାରେ ସେ ଜଣେ କନ୍ଷ୍ଟେବଳଙ୍କ ବନ୍ଧୁକ ଛଡ଼ାଇ ନେଇ ଗୁଳି କରିଥିଲା । ପରେ ପୁଲିସର ଜବାବୀ ଗୁଳିମାଡ଼ରେ ସେ ପ୍ରାଣ ହରାଇଥିଲା । ଅକ୍ଷୟର ପିତା ବମ୍ବେ ହାଇକୋର୍ଟରେ ଆବେଦନ ଦାଖଲ କରି ଏନ୍କାଉଣ୍ଟରର ଏସ୍ଆଇଟି ତଦନ୍ତ ଦାବି କରିଥିଲେ । ମାମଲାର ପରବର୍ତ୍ତୀ ଶୁଣାଣି ଅକ୍ଟୋବର ୩ରେ ହେବ।
