ଶ୍ରୀନଗର : ସମଗ୍ର ଉତ୍ତର ଭାରତ ଏହି ସମୟରେ ପ୍ରବଳ ଗରମ ଓ ଲୁ୍’ର ପ୍ରଭାବରେ ପଡ଼ିଛି। ହେଲେ ଅନୁକୂଳ ପବନ ବହିବା ଯୋଗୁଁ କିଛି ମାତ୍ରାରେ ଆଶ୍ୱସ୍ତି ମିଳିଛି। ଭାରତର ପାଣିପାଗ ବିଭାଗ (ଆଇଏମଡି) ଅନୁସାରେ, ରାଷ୍ଟ୍ରୀୟ ରାଜଧାନୀ ଦିଲ୍ଲୀରେ ଶୁକ୍ରବାର ସକାଳେ ସର୍ବନିମ୍ନ ତାପମାତ୍ରା ୩୦.୮ ଡିଗ୍ରୀ ସେଲସିୟସ ରେକର୍ଡ କରାଯାଇଛି, ଯାହା ହାରାହାରି ୪ ଡିଗ୍ରୀ ସେଲସିୟସ ଅଧିକ। ସକାଳ ୮.୩୦ ଟାରେ ପବନରେ ଆଦ୍ରତା ୬୧ ପ୍ରତିଶତ ରୁଜୁ କରାଯାଇଛି। ପାଣିପାଗ ବିଭାଗ କହିଛି, ଦିଲ୍ଲୀରେ ସର୍ବାଧିକ ତାପମାତ୍ରା ୪୨ ଡିଗ୍ରୀ ସେଲସିୟସର ନିକଟରେ ରହିବାର ସମ୍ଭାବନା ରହିଛି।
ଏପଟେ , ହରିଆଣା , ପଞ୍ଜାବ, ରାଜସ୍ଥାନ ସମେତ ଜମ୍ମୁ-କାଶ୍ମୀରରେ ମଧ୍ୟ ପ୍ରବଳ ତାତି ଓ ଲୁ ଲୋକଙ୍କ ଜୀବନକୁ ଦୁର୍ବିସହ କରି ଦେଇଛି। ତାର ଆକର୍ଷଣୀୟ ପ୍ରାକୃତିକ ସୌନ୍ଦର୍ଯ୍ୟ ଓ ଥଣ୍ଡା ପାଗ ପାଇଁ ପ୍ରସିଦ୍ଧ କାଶ୍ମୀର ଘାଟୀରେ ମଧ୍ୟ ଲୁ ପ୍ରବାହ ଚାଲିଛି। ସ୍ଥିତି ଏମିତି କି ଶ୍ରୀନଗରରେ ତାପମାତ୍ରା ଗତ ୧୧ ବର୍ଷର ପୁରୁଣା ରେକର୍ଡ ଭାଙ୍ଗି ଦେଇଛି।
ଗୁରୁବାର ମେ’ର ସବୁଠୁ ଗରମ ଦିନ ରେକର୍ଡ କରାଯାଇଛି। ସେପଟେ ତାପମାତ୍ରା ୩୨.୨ ଡିଗ୍ରୀ ସେଲସିୟସରେ ପହଞ୍ଚିଛି। ଏହା ପୂର୍ବରୁ ୨୩ ମେ ୨୦୨୩ରେ ମଧ୍ୟ ଶ୍ରୀନଗରରେ ଏତେ ହିଁ ତାପମାତ୍ରା ରେକର୍ଡ କରାଯାଇ ଥିଲା। ଭୀଷଣ ଗରମ କାରଣରୁ କାଶ୍ମୀରର ଅନ୍ୟ ସବୁ ପାଣିପାଗ କେନ୍ଦ୍ରରେ ମଧ୍ୟ ଏହି ପାଣିପାଗର ସବୁଠୁ ଗରମ ଦିନ ଭାବେ ରେକର୍ଡ କରାଯାଇଛି।
