କୋଲାବିରା ୦୨/୦୨: ସୋସିଆଲ୍ ନେଟ୍ୱର୍କିଂ ସାଇଟ୍ ଇନ୍ଷ୍ଟାଗ୍ରାମ୍ରେ ପ୍ରଥମେ ବନ୍ଧୁତା । ବାନ୍ଧବୀଙ୍କ ମନରେ ନିଜ ପାଇଁ ବିଶ୍ୱାସ ସୃଷ୍ଟି କରିବା ପରେ ଯାତ୍ରା ଦେଖିବାକୁ ଡାକିଲେ ଯୁବକ । ହେଲେ ଇନ୍ଷ୍ଟା ବନ୍ଧୁକୁ ବିଶ୍ୱାସ କରି ଫସିଗଲେ ଯୁବତୀ । ଯୁବତୀଙ୍କ ଅସହାୟତାର ଫାଇଦା ଉଠାଇ ଦୁଷ୍କର୍ମ କରିଥିଲେ ଯୁବକ । ଘଟଣା ପରେ ମାନସିକ ଚାପଗ୍ରସ୍ତ ଯୁବତୀ ଏଣେତେଣେ ବୁଲିବା ପରେ ପୁଲିସ ତାଙ୍କୁ ଉଦ୍ଧାର କରିଥିଲା । ଏହାପରେ ଘଟଣା ପ୍ରଘଟ ହେବା ସହ ପୁଲିସ ଅଭିଯୁକ୍ତକୁ ଗିରଫ କରିଥିବା ଜଣାପଡ଼ିଛି । ଝାରସୁଗୁଡ଼ା ଜିଲ୍ଲା କୋଲାବିରା ଥାନାଞ୍ଚଳର ଏହି ଘଟଣାକୁ ନେଇ ବିଭିନ୍ନ ମହଳରେ ତୀବ୍ର ଉଦ୍ବେଗ ପ୍ରକାଶ ପାଇଛି ।
ସୂଚନାମତେ, କୋଲାବିରା ଥାନା ଅଞ୍ଚଳର ସମ୍ପୃକ୍ତ ଯୁବତୀଙ୍କ ସହ ଏହି ଥାନା ଅଧୀନ କୁଲିହାମାଲ ପଞ୍ଚାୟତ ସମାସିଂହା ଅଞ୍ଚଳର ଆନନ୍ଦ କିଶାନଙ୍କର ଇନ୍ଷ୍ଟାଗ୍ରାମରେ କିଛିଦିନ ତଳେ ବନ୍ଧୁତା ହୋଇଥିଲା । ପରେ ଫୋନ୍ ନମ୍ବର ଦିଆନିଆ ହୋଇ କଥାବାର୍ତ୍ତା ଚାଲିଲା । ଯୁବତୀଙ୍କ ମନରେ ତାଙ୍କ ପାଇଁ ବିଶ୍ୱାସ ଜାତ କରିବା ପରେ ଆନନ୍ଦ ସମାସିଂହା ମକରଯାତ୍ରା ଦେଖି ଆସିବା ପାଇଁ ଯୁବତୀଙ୍କୁ ନିମନ୍ତ୍ରଣ କରିଥିଲା । ସତକୁ ସତ ୨୭ ତାରିଖ ସମାସିଂହା ଯାତ୍ରା ଦେଖିବାକୁ ଆସିଥିଲେ ଯୁବତୀ । ଏହାପୂର୍ବରୁ ସେ ଆନନ୍ଦକୁ ଦେଖି ନଥିଲେ । ତେବେ ମକର ଯାତ୍ରରେ ନିଛାଟିଆ ସ୍ଥାନକୁ ନେଇ ଆନନ୍ଦ ତାଙ୍କୁ ଦୁଷ୍କର୍ମ କରିଥିଲା । ଏହାପରେ ଏକୁଟିଆ ଛାଡ଼ି ଚାଲି ଯାଇଥିଲା । ଘଟଣା ପରେ ଯୁବତୀ ଜଣକ ଘରକୁ ଯାଇ କାହାକୁ କିଛି କହି ନଥିଲେ । ମାତ୍ର ମାନସିକ ଦୁଃଶ୍ଚିନ୍ତାରେ ୨୯ ତାରିଖରେ ଝାରସୁଗୁଡ଼ା ଯାଇ ପୁଣି ବସରେ ସମ୍ବଲପୁରକୁ ଯାଇଥିଲେ । .
ସମ୍ବଲପୁର ଅଇଁଠାପାଲି ବସଷ୍ଟାଣ୍ଡରେ ଜଣେ ମହିଳାଙ୍କ ପାଖରେ ସେ ଆଶ୍ରୟ ନେଇଥିଲେ । ଏ ବିଷୟରେ ଅଇଁଠାପାଲି ଥାନା ପୁଲିସ ସୂଚନା ପାଇ ଯୁବତୀଙ୍କୁ ଉଦ୍ଧାର କରି କୋଲାବିରା ଥାନା ପୁଲିସକୁ ହସ୍ତାନ୍ତର କରିଥିଲା । ପୁଲିସ ଯୁବତୀଙ୍କୁ ଝାରସୁଗୁଡ଼ା ସଖୀ କେନ୍ଦ୍ରରେ ଥଇଥାନ କରିଥିଲା । ପରେ ଯୁବତୀଙ୍କ ଅଭିଯୋଗ କ୍ରମେ କୋଲାବିରା ଥାନାରେ ଏକ ମାମଲା ରୁଜୁ ହୋଇ ପୁଲିସ ତଦନ୍ତ କରିଥିଲା । ଏହାସହ ଯୁବତୀଙ୍କ ଡାକ୍ତରୀ ମାଇନା ସହ ମାଜିଷ୍ଟ୍ରେଟ ସମ୍ମୁଖରେ ବୟାନ ରେକର୍ଡ କରାଯାଇଥିଲା । ଗୁରୁବାର ପୁଲିସ ଅଭିଯୁକ୍ତ ଆନନ୍ଦ କିଶାନକୁ ଗିରଫ କରି କୋର୍ଟ ଚାଲାଣ କରିଥିବା ଆଇଆଇସି ପ୍ରକାଶ କର୍ଣ୍ଣ ସୂଚନା ଦେଇଛନ୍ତି ।
