ନୂଆଦିଲ୍ଲୀ,୨୭/୦୯:  ଇରାକର ଏକ ବିମାନ କୋଲକାତା ବିମାନବନ୍ଦରରେ କରିଛି ଜରୁରୀ ଅବତରଣ । ଚୀନ୍ ଯାଉଥିବା ଏହି ବିମାନଟି ଆଜି ସକାଳେ କୋଲକାତା ବିମାନବନ୍ଦରରେ ଜରୁରୀ ଅବତରଣ କରିଛି। ତେବେ ବିମାନ ମଧ୍ୟରେ ଜଣେ ଯାତ୍ରୀ ଅସୁସ୍ଥ ହୋଇ ପଡ଼ିବାରୁ ଜରୁରୀ ଅବତରଣ କରାଯାଇଥିଲା। କିନ୍ତୁ ଡାକ୍ତରଖାନାରେ ତାଙ୍କୁ ମୃତ ଘୋଷଣା କରାଯାଇଛି। 

ସୂଚନା ଅନୁସାରେ, ଇରାକର ରାଜଧାନୀ ବାଗଦାଦରୁ ଚାଇନାର ଗୁଆଙ୍ଗଜୋକୁ ଉଡ଼ାଣ ଭରିଥିଲା IA-୪୭୩ ବିମାନ। ବିମାନରେ ୧୫ ଜଣ କ୍ୟୁ ସଦସ୍ୟଙ୍କ ସହ ୧୦୦ଜଣ ଯାତ୍ରୀ ଥିଲେ। ତେବେ ଉଡାଣର କିଛି ସମୟ ପରେ ଜଣେ ୧୬ ବର୍ଷୀୟ ଝିଅ ଅସୁସ୍ଥ ହୋଇ ପଡିଥିଲେ। ସେ ଚେତାଶୂନ୍ୟ ହୋଇ ତଳେ ପଡିଯିବାରୁ ବିମାନର ଜରୁରୀ ଅବତରଣ କରାଯାଇଥିଲା। ସକାଳ ପ୍ରାୟ ସାଢେ ୧୦ଟା ସମୟରେ କୋଲକାତା ବିମାନ ବନ୍ଦରରେ ଜରୁରୀ ଅବତରଣ କରାଯାଇଥିଲା। ଅସୁସ୍ଥ ନାବାଳିକାଙ୍କୁ ତୁରନ୍ତ ହସ୍ପିଟାଲରେ ଭର୍ତ୍ତି କରାଯାଇଥିଲା। ମାତ୍ର ସେଠାରେ ତାଙ୍କୁ ମୃତ ଘୋଷଣା କରାଯାଇଥିବା ବିମାନବନ୍ଦର କର୍ତ୍ତୃପକ୍ଷଙ୍କ ମୁଖପାତ୍ର ସୂଚନା ଦେଇଛନ୍ତି।