ନୂଆଦିଲ୍ଲୀ,୦୩/୦୯:ବଲିଉଡ ଅଭିନେତ୍ରୀ ତଥା ବିଜେପି ସାଂସଦ କଙ୍ଗନା ରାଣାଓ୍ବତ ଆଜିକାଲି ତାଙ୍କ ଆଗାମୀ ଚଳଚ୍ଚିତ୍ର 'ଏମରଜେନ୍ସି' ନେଇ ଶିରୋନାମାରେ ରହିଛନ୍ତି । ଏପରିକି ସେନ୍ସର ବୋର୍ଡ ମଧ୍ୟ ଫିଲ୍ମ ରିଲିଜକୁ ସାର୍ଟିଫିକେଟ ଦେଇନଥିବା ଜଣାପଡିଛି । ଫଳରେ ଫିଲ୍ମ ରିଲିଜ ସ୍ଥଗିତ ହୋଇଛି । ହେଲେ ଏପରି ସମୟରେ ଅଭିନେତ୍ରୀଙ୍କ ନୂଆ ଫିଲ୍ମ ମଧ୍ୟ ଘୋଷଣା କରାଯାଇଛି । ଯାହାର ନାଁ 'ଭାରତ ଭାଗ୍ୟ ବିଧାତା' । ଫିଲ୍ମରେ ସାଧାରଣ ଲୋକଙ୍କ ସଂଘର୍ଷ ଏବଂ ତାଙ୍କ ଉପଲବ୍ଧି ଦର୍ଶାଯିବ ।

ତେବେ କଙ୍ଗନା ସୋସିଆଲ ମିଡିଆ ଏକ୍ସରେ ନୂଆ ଫିଲ୍ମ 'ଭାରତ ଭାଗ୍ୟ ବିଧାତା' ଘୋଷଣା କରିଛନ୍ତି । ଅଭିନେତ୍ରୀ ଏକ ଫଟୋ ସେୟାର କରି ଏହାର ସୂଚନା ଦେଇଥିବା ବେଳେ ସେହି ଫଟୋରେ ତାଙ୍କ ସହ ନିର୍ଦ୍ଦେଶକ ଏବଂ ପ୍ରଡ୍ୟୁସର ନଜର ଆସିଛନ୍ତି । ତେବେ ଅଭିନେତ୍ରୀ ଏହି ଫଟୋ ସେୟାର କରି ଲେଖିଛନ୍ତି ଯେ,ବଡ଼ ପରଦାରେ ବାସ୍ତବିକ ଜୀବନର କାହାଣୀକୁ ଅନୁଭବ କରନ୍ତୁ । 'ଭାରତ ଭାଗ୍ୟ ବିଧାତା' ଘୋଷଣା କରି ମୁଁ ଖୁସି, ଯେଉଁଥିରେ ଅନେକ ହିରୋମାନଙ୍କୁ ଶ୍ରଦ୍ଧାଞ୍ଜଳୀ ଦିଆଯିବ।

'କଙ୍ଗନା ରାଣାୱତଙ୍କ ଏହି ଚଳଚ୍ଚିତ୍ର ଆମ ଦେଶ ଗଠନ କରୁଥିବା ବ୍ଲୁ-କଲର ଶ୍ରମିକଙ୍କ ସଂଘର୍ଷ ଉପରେ ଆଧାରିତ । ଯେଉଁଥିରେ ସେହି ହିରୋମାନଙ୍କ ଉଦ୍ୟମକୁ ଦର୍ଶାଯାଇଛି ଯେଉଁମାନେ ଅଧିକ ମାନ୍ୟତା ପାଇନାହାଁନ୍ତି କିନ୍ତୁ ଦେଶର ବିକାଶରେ ସେମାନଙ୍କର ଅତ୍ୟନ୍ତ ଗୁରୁତ୍ୱପୂର୍ଣ୍ଣ କାର୍ଯ୍ୟ କରିଛନ୍ତି । ଏହାକୁ ବବିତା ଆଶିୱାଲ  ଏବଂ ଆଦି ଶର୍ମାଦ୍ୱାରା ପ୍ରସ୍ତୁତ କରାଯାଉଛି । ତେବେ ପୁଣି କଙ୍ଗନାଙ୍କୁ ଏହି ଫିଲ୍ମରେ ଦମାଦର ଅନ୍ଦାଜରେ ଦେଖିବାକୁ ମିଳିବ । କଙ୍ଗନାଙ୍କ ଚଳଚ୍ଚିତ୍ର 'ଏମରଜେନ୍ସି' ଚଳିତ ବର୍ଷ ସେପ୍ଟେମ୍ବର ୬ ରେ ପ୍ରେକ୍ଷାଳୟରେ ମୁକ୍ତିଲାଭ କରିଥାନ୍ତା । ହେଲେ ଫିଲ୍ମରେ ଶିଖମାନଙ୍କ ଚିତ୍ରଣ ଭୁଲ ଭାବେ ଦର୍ଶାଯାଇଥିବା ଅଭିଯୋଗ କରି ଫିଲ୍ମକୁ ବିରୋଧ ସହ ବ୍ୟାନ କରିବାକୁ ଦାବି ହୋଇଛି । ଏପରି ସମୟରେ ସିବିଏଫସି ଏପର୍ଯ୍ୟନ୍ତ ଫିଲ୍ମକୁ ସାର୍ଟିଫିକେଟ ପ୍ରଦାନ କରିନଥିବା ବେଳେ ଫିଲ୍ମର ରିଲିଜ୍ ତାରିଖକୁ ସ୍ଥଗିତ ରଖାଯାଇଛି ।