ପୋଙ୍ଗୟାଙ୍ଗ: ଉତ୍ତର କୋରିଆର ଶାସକ କିମ୍ ଜଙ୍ଗ ଉନ ପରାମାଣୁ ଯୁଦ୍ଧାସ୍ତ୍ର ପରିବହନ କ୍ଷମତା ସଂପନ୍ନ ମିସାଇଲ୍ର ଅଭ୍ୟାସ କାର୍ଯ୍ୟକ୍ରମରେ ଯୋଗ ଦେଇଛନ୍ତି । ଏହି ସବୁ ମିସାଇଲଗୁଡ଼ିକୁ ଦକ୍ଷିଣ କୋରିଆର ରାଜଧାନୀ ସିଓଲକୁ ଟାର୍ଗେଟ କରିବା ପାଇଁ ସକ୍ଷମ ବୋଲି କୁହାଯାଉଛି । ପ୍ରତିଦ୍ବନ୍ଦୀଙ୍କ ସହ ବଢ଼ୁଥିବା ତିକ୍ତତା ମଧ୍ୟରେ କିମ୍ ଜଙ୍ଗ ଉନ ନିଜ ଦେଶର ସୁରକ୍ଷାକୁ ବଢ଼ାଇବା ପାଇଁ ଚେଷ୍ଟା ଜାରି ରଖିଛନ୍ତି । ଏହା ପୂର୍ବରୁ ଦକ୍ଷିଣ କୋରିଆ ଏବଂ ଜାପାନ ସେନା ଦାବି କରିଥିଲେ ଯେ, ଉତ୍ତର କୋରିଆ ପୂର୍ବତଟ କ୍ଷେତ୍ରରେ ଏକାଧିକ ସ୍ବଳ୍ପ ଦୂରଗାମୀ ବାଲିଷ୍ଟିକ୍ ମିସାଇଲ ମାଡ଼ କରିଥିଲା ।
ଉତ୍ତର କୋରିଆ ସୋମବାର ଯେଉଁ ୩ଟି ପ୍ରଣାଳୀର ପରୀକ୍ଷଣ କରିଛି ସେଥିରେ ୬୦୦ ମିଲିମିଟର ବିଶିଷ୍ଟ ବହୁମୁଖୀ ରକେଟ୍ ପ୍ରକ୍ଷେପକ ମଧ୍ୟ ସାମିଲ ଥିଲା । ଏହି ରକେଟ ସାମରିକ ପରମାଣୁ ଯୁଦ୍ଧାସ୍ତ୍ର ପରିବହନ କରିବାରେ ସକ୍ଷମ । ଉତ୍ତର କୋରିଆର ସରକାରୀ ମିଡିଆ ‘କୋରିଆନ୍ ସେଣ୍ଟ୍ରାଲ୍ ନ୍ୟୁଜ୍ ଏଜେନ୍ସି’ (କେସିଏନଏ) ଦ୍ବାରା ପ୍ରକାଶିତ ଫଟୋରୁ ଦେଖିବାକୁ ମିଳିଛି ଯେ, ଏହି ଉତ୍ତକ୍ଷେପଣ ସମୟରେ ଉତ୍ତର କୋରିଆ ଅତିକମରେ ୬ଟି ରକେଟ୍ର ବ୍ୟବହାର କରିଛି । ଏହା ସହ ତୋପ ଦ୍ବାରା ଏକ ନିର୍ଦ୍ଧାରିତ ଉଚ୍ଚତାରେ ବିସ୍ଫୋରଣ ମଧ୍ୟ କରାଯାଇଛି ।
ସେପଟେ ବହୁମୁଖୀ ରକେଟ ପ୍ରକ୍ଷେପକକୁ ନିଜର ଅସ୍ତ୍ରାଗାରର ମୁଖ୍ୟ ଅଂଶ ବୋଲି କହିଛନ୍ତି କିମ୍ ଜଙ୍ଗ ଉନ୍ । କେସିଏନଏ ଅନୁସାରେ, ଶତ୍ରୁରାଷ୍ଟ୍ରଙ୍କୁ ବୁଝିବାକୁ ହେବ ଯେ ଆଗକୁ ଯଦି ଯୁଦ୍ଧ ହୁଏ ତେବେ ବିନାଶକାରୀ ପରିଣାମ ଭୋଗିବାରୁ କେହି ବର୍ତ୍ତିପାରିବେ ନାହିଁ । ସେପଟେ ମଙ୍ଗଳବାର ଦକ୍ଷିଣ କୋରିଆର ଜଏଣ୍ଟ ଚିଫ ଅଫ ଷ୍ଟାଫ ଅଭିଯୋଗ କରିଛନ୍ତି ଯେ, ଫଟୋରେ ଯେତିକି ମିସାଇଲ୍ ପରୀକ୍ଷା ହୋଇଥିବା ଦେଖାଯାଉଛି ତାଠାରୁ ଅଧିକ ପରୀକ୍ଷଣ କରିଛି ଉତ୍ତର କୋରିଆ ।