ଲକ୍ଷ୍ନୌ: ଆଇପିଏଲ ୨୦୨୪ର ୨୬ ତମ ମ୍ୟାଚ୍ରେ କମାଲ କଲା ଦିଲ୍ଲୀ । ଚଳିତ ସିଜନରେ ଦ୍ବିତୀୟ ବିଜୟ ହାସଲ କଲା ଦଳ । ଆଜିର ମ୍ୟାଚ୍ରେ ଜେକ୍ ଫ୍ରେଜର ମାକଗର୍କ ୫୫ ରନ୍ କରିଥିବା ବେଳେ ଋଷଭ ପନ୍ତ ୪୧ ଏବଂ ପୃଥ୍ବୀ ଶ ୩୨ ରନ୍ କରି ପ୍ୟାଭିଲିୟନ୍ ଫେରିଥିଲେ । ତ୍ରିଷ୍ଟାନ ଷ୍ଟବଙ୍କ ଅପରାଜିତ ୧୫ ଓ ସାଇ ହୋପଙ୍କ ଅପରାଜିତ ୧୧ ରନ୍ ବଳରେ ୧୮.୧ ଓଭରରେ ଲକ୍ଷ୍ନୌକୁ ପରାସ୍ତ କରିଛି ଦିଲ୍ଲୀ । ସେହିଭଳି ଲକ୍ଷ୍ନୌର ରବି ବିଷ୍ଣୋଇ ସର୍ବାଧିକ ୨ ଟି ଓ୍ବିକେଟ ନେଇଥିବା ବେଳେ ନବୀନ ଉଇ ହକ ଏବଂ ୟଶ ଠାକୁର ଗୋଟିଏ ଲେଖାଏଁ ଓ୍ବିକେଟ ନେଇଥିଲେ ।
ଆଜି ପ୍ରଥମେ ଟସ ଜିତି ବ୍ୟାଟିଂ ନିଷ୍ପତ୍ତି ନେଇଥିବା ଲକ୍ଷ୍ନୌ ନିର୍ଦ୍ଧାରିତ ଓଭରରେ ୭ ଓ୍ବିକେଟ ହରାଇ ୧୬୭ ରନ୍ କରିଥିଲା । ଲକ୍ଷ୍ନୌର ଆୟୁଷ ବାଦୋନି ଅପରାଜିତ ୫୫ ରନ୍ କରିଥିଲା । ଆରମ୍ଭରୁ ବ୍ୟାଟିଂ ବିପର୍ଯ୍ୟୟ ଭୋଗିଥିବା ଲକ୍ଷ୍ନୌ ସୁପର ଜ୍ୟାଣ୍ଟସ୍ ଓଭର ଶେଷ ଆଡ଼କୁ ସମ୍ମାନଜନକ ସ୍କୋର କରିବାରେ ସଫଳ ହୋଇଥିଲା । ଆଜିର ମ୍ୟାଚ୍ରେ ଅଧିନାୟକ କେଏଲ ରାହୁଲ ୩୯ ରନ୍ କରି ଆଉଟ ହୋଇଥିବା ବେଳେ ଅନ୍ୟ ବ୍ୟାଟର ଭଲ ପ୍ରଦର୍ଶନ କରିପାରିନଥିଲେ । ଆୟୁଷ ବାଦୋନିଙ୍କ ଅପରାଜିତ ୫୫ ରନ୍ ବଳରେ ଲକ୍ଷ୍ନୌ ୧୬୭ ରନ୍ କରପାରିଥିଲା ।
ଦିଲ୍ଲୀ କ୍ୟାପିଟାଲ୍ସର କୁଲଦୀପ ଯାଦବ ଆଜି ଦମଦାର ବୋଲିଂ କରିଥିଲା । ମାତ୍ର ୨୦ ରନ୍ ଦେଇ ୩ଟି ଓ୍ବିକେଟ ନେଇଥିଲେ କୁଲଦୀପ । ସେହିଭଳି ଖଲିଲ ଅହମ୍ମଦ ମଧ୍ୟ ୨ଟି ଓ୍ବିକେଟ ନେଇ ଲକ୍ଷ୍ନୌର ଦମ୍ଭ ଭାଙ୍ଗି ଦେଇଥିଲେ । ଇଶାନ୍ତ ଶର୍ମା ଏବଂ ମୁକେଶ କୁମାର ଗୋଟିଏ ଲେଖାଏଁ ଓ୍ବିକେଟ ନେଇଥିଲେ ।
ଆଜିର ମ୍ୟାଚ୍ରେ ଲକ୍ଷ୍ନୌ ୨୮ ରନ୍ରେ ପ୍ରଥମ ଓ୍ବିକେଟ (କ୍ବିଣ୍ଟନ ଡିକକ୍) ହରାଇଥିଲା । ସେ ୧୯ ରନ୍ କରି ଖଲିଲ ଅହମ୍ମଦଙ୍କ ବଲରେ ଏଲବିଡବ୍ଲୁ ହୋଇ ପ୍ୟାଭିଲିୟନ୍ ଫେରିଥିଲେ । ସେହିଭଳି ଦେବଦତ୍ତ ପାଡିକଲଙ୍କୁ ଆଉଟ କରି ପଡ଼ିଆରୁ ଫେରାଇଥିଲେ ଖଲିଲ ଅହମ୍ମଦ । ପରେ ପରେ ମାର୍କସ ଷ୍ଟାଇନିସ୍ (୮), ନିକୋଲାସ ପୁରନ (୦), ଦୀପକ ହୁଡା (୧୦), କୃଣାଲ ପାଣ୍ଡ୍ୟା (୩) ଆଉଟ ହୋଇଥିଲେ ।
