ଉମରକୋଟ,୨୮/୦୩ : ରାସ୍ତା ପାର ହେଉଥିବା ସମୟରେ ଚଢିଗଲା ପିକ୍ଅପ୍ ଭ୍ୟାନ୍, ବୃଦ୍ଧ ମୃତ। ଏଭଳି ଏକ ଅଭାବନୀୟ ଘଟଣା ଘଟିଛି ନବରଙ୍ଗପୁର ଜିଲ୍ଲା ଉମରକୋଟ ବ୍ଲକ ସାନଭରଣ୍ଡି ଗ୍ରାମରେ। ବୃଦ୍ଧା ଜଣକ ହେଲେ ସାନ ଭରଣ୍ଡି ଗ୍ରାମର ଗୌରୀ ମାଝୀ (୮୦ବର୍ଷ)। ଘଟଣାକୁ ନେଇ କ୍ଷତିପୂରଣ ଦାବିରେ ଉତ୍ତ୍ୟକ୍ତ ଲୋକେ ରାସ୍ତାରୋକ କରିଛନ୍ତି। ଫଳରେ ଉମରକୋଟ ଠାରୁ ନବରଙ୍ଗପୁର ଯାତାୟତ ବାଧାପ୍ରାପ୍ତ ହୋଇଛି।
ସୂଚନା ଅନୁଯାୟୀ, ନବରଙ୍ଗପୁର ଜିଲ୍ଲା ଉମରକୋଟ ଥାନା ଅନ୍ତର୍ଗତ ସାନଭରଣ୍ଡି ଗ୍ରାମ ୩୯ ନମ୍ୱର ରାଜ୍ୟ ରାଜପଥରେ ଏକ ଛତୁ ବୋଝେଇ ପିକଅପ୍ ଗାଡ଼ି ରାୟପୁର ଠାରୁ ନବରଙ୍ଗପୁର ଛତୁ ନେଇ ଯାଉଥିଲା । ଏହି ସମୟରେ ସାନଭରଣ୍ଡି ଗ୍ରାମର ଗୌରୀ ମାଝୀ ରାସ୍ତା ପାର କରୁଥିବା ସମୟରେ ଧକ୍କା ଦେଇଥିଲା। ଫଳରେ ଘଟଣାସ୍ଥଳରେ ହିଁ ଗୌରୀଙ୍କ ମୃତ୍ୟୁ ଘଟିଥିଲା। ଆଜି ସକାଳ ସାଢେ ୫ଟା ସମୟରେ ଘଟଣାଟି ଘଟିଥିଲା । କ୍ଷତିପୂରଣ ଦାବିରେ ଗ୍ରାମବାସୀ ଓ ପରିବାର ଲୋକ ଶବ ରଖି ୩୯ ନମ୍ୱର ରାଜ୍ୟ ରାଜପଥ ଅବରୋଧ କରିଥିଲେ। ଫଳରେ ଉମରକୋଟ ଠାରୁ ନବରଙ୍ଗପୁର ଯାତାୟତ ବାଧାପ୍ରାପ୍ତ ହୋଇଛି। ଖବର ପାଇ ଉମରକୋଟ ପୋଲିସ ଘଟଣା ସ୍ଥଳରେ ପହଞ୍ଚି ଦୁର୍ଘଟଣା ଘଟାଇଥିବା ଗାଡ଼ିକୁ ଜବତ କରିବା ସହ ଗାଡ଼ି ଚାଳକ ଓ ହେଲେପରଙ୍କୁ ଗିରଫ କରିଛନ୍ତି। ଘଟଣା ସ୍ଥଳରେ ଉତ୍ତେଜନା ଲାଗି ରହିଛି।