ଭୁବନେଶ୍ୱର ୦୯/୦୨: ଅନ୍ତର୍ଜାତୀୟ ହକି ଖେଳାଳି ତଥା ଅଲିମ୍ପିକ୍ସ ପଦକ ବିଜେତା ବରୁଣ କୁମାରଙ୍କୁ ଖୋଜୁଛି ବେଙ୍ଗାଲୁରୁ ପୁଲିସ୍ । ଜଣେ ନାବାଳିକାଙ୍କୁ ବିବାହର ପ୍ରତିଶ୍ରୁତି ଦେଇ ବଳାତ୍କାର କରିବା ଅଭିଯୋଗ ପରେ ବରୁଣ ଫେରାର ହୋଇଯାଇଥିବା ଜଣାପଡିଛି । ସେ ଭୁବନେଶ୍ୱର ଲୁଚିଥିବା ପ୍ରମାଣ ମିଳିଛି । ବେଙ୍ଗାଲୁରୁ ପୁଲିସ୍ର ଏକ ଟିମ୍ ଗତ ୪ ଦିନ ହେବ ଏଠାରେ ଡେରା ପକାଇଛି । ବରୁଣର ଶେଷ ମୋବାଇଲ୍ ଲୋକେସନ୍ ମୈତ୍ରୀବିହାର ଦର୍ଶାଉଥିଲାବେଳେ ପୁଲିସ୍ ବରୁଣର ପତ୍ତା ପାଇନାହିଁ ।
କିଛିଦିନ ତଳେ ବେଙ୍ଗାଲୁରୁର ଜଣେ ୨୨ ବର୍ଷୀୟ ଯୁବତୀ ବରୁଣ ବିରୋଧରେ ଥାନାରେ ଅଭିଯୋଗ କରିଥିଲେ । ଏତଲାରେ ଦର୍ଶାଇଥିଲେ, ୨୦୧୯ ମସିହାରେ (ସେତେବେଳେ ସେ ନାବାଳିକା ଥିଲେ) ଇନ୍ଷ୍ଟାଗ୍ରାମରେ ବରୁଣ ଓ ମିଲି (ଛଦ୍ମାନାମ, ୨୨ ବର୍ଷ)ଙ୍କ ମଧ୍ୟରେ ବନ୍ଧୁତ୍ୱ ଗଢ଼ି ଉଠିଥିଲା । ବେଙ୍ଗାଲୁରୁ ସାଇ କେନ୍ଦ୍ରରେ ଉଭୟଙ୍କ ସାକ୍ଷାତ ହୋଇଥିଲା । ୨୦୧୯ରେ ବରୁଣ ତାଙ୍କୁ ଜୟନଗର (ବେଙ୍ଗାଲୁରୁ) ଏକ ହୋଟେଲକୁ ନେଇଥିଲେ । ବିବାହର ପ୍ରତିଶ୍ରୁତି ଦେଇ ସେଠାରେ ସେ ତାଙ୍କ ସହିତ ଶାରୀରିକ ସଂପର୍କ ରଖିଥିଲେ । ୫ ବର୍ଷ ଉଭୟ ସଂପର୍କରେ ରହିଥିଲେ । ପରେ ବରୁଣ ତାଙ୍କ ସହ ସଂପର୍କ ତୁଟାଇ ଦେଇଥିଲେ । ଯୁବତୀ ଜଣଙ୍କ ବାରମ୍ବାର ପ୍ରୟାସ କରିବି ବରୁଣଙ୍କ ସହ ଯୋଗାଯୋଗ କରି ପାରିନଥିଲେ । ଶେଷରେ ସେ ନ୍ୟାୟ ପାଇଁ ଆଇନର ଆଶ୍ରୟ ନେବାକୁ ବାଧ୍ୟ ହୋଇଥିଲେ ବୋଲି ଏତଲାରେ ଦର୍ଶାଇଛନ୍ତି । ମିଲିଙ୍କ ଏତଲାକୁ ଭିତ୍ତି କରି ପୁଲିସ ବରୁଣଙ୍କ ନାମରେ ପୋକ୍ସୋ ଆଇନ ସହ ୩୭୬ ଓ ୪୨୦ ଦଫା ଲଗାଇ ମାମଲା ରୁଜୁ କରିଛି ।
ହକି ପ୍ରୋ ଲିଗ୍ ମ୍ୟାଚ୍ ପାଇଁ ବରୁଣ ଗତ ୫ ତାରିଖରେ ଅମୃତସରରୁ ଭୁବନେଶ୍ୱର ଆସି ସାଥି ଖେଳାଳିଙ୍କ ସହ ହୋଟେଲରେ ରହିଥିଲେ । ତାଙ୍କୁ ଧରିବା ପାଇଁ ବେଙ୍ଗାଲୁରୁ ପୁଲିସ୍ ଟିମ୍ ଭୁବନେଶ୍ୱର ଆସି କମିଶନରେଟ୍ ପୁଲିସ୍ର ସହାୟତା ନେଇଥିଲା । ଗତକାଲି ଭାରତର ମ୍ୟାଚ୍ ଥିଲା । ବେଙ୍ଗାଲୁର ପୁଲିସ୍ ଟିମ୍ କଳିଙ୍ଗ ଷ୍ଟାଡ଼ିୟମର ବିଭିନ୍ନ ଗେଟ୍ରେ ଛକି ରହିଥିଲା । ହେଲେ ବରୁଣ ଚକମା ଦେଇ ସେଠାରୁ ଖସି ଯାଇଥିଲେ ।
ଶେଷ ଭରସା ଥିଲା ସିସିଟିଭି ଫୁଟେଜ । ସେଣ୍ଟ୍ରାଲ୍ ସିସିଟିଭି କଣ୍ଟ୍ରୋଲ ରୁମକୁ ଯାଇ ଘଣ୍ଟା ଘଣ୍ଟା ଘାଣ୍ଟି ହୋଇଥିଲା ବେଙ୍ଗାଲୁରୁ ପୁଲିସ୍ । ନିମ୍ନମାନର ଝାପସା ଫୁଟେଜ୍ ପୁଲିସ୍କୁ ନିରାସ କରିଥିଲା । କମିଶନରେଟ୍ ପୁଲିସ୍ ସହଯୋଗରେ ବିଭିନ୍ନ ଆଡେ ଚଢ଼ଉ ଚାଲିଛି । ଭୁବନେଶ୍ୱର ଡିସିପି ପ୍ରତୀକ ସିଂହ ସହ ବେଙ୍ଗାଲୁରୁ ଡିସିପି ଯୋଗଯୋଗରେ ଅଛନ୍ତି । ଘଟଣା ହାଇପ୍ରେଫାଇଲ୍ ହୋଇଥିବାରୁ ସତର୍କତା ଅବଲମ୍ବନ କରୁଛି ପୁଲିସ୍ ।
