ଭୁବନେଶ୍ୱର,୩୧/୦୫: ଲୋକସଭା ଓ ବିଧାନସଭା ନିର୍ବାଚନ ପାଇଁ ଥମିଲା ପ୍ରଚାର । ସରିଲା ନାରାବାଜି, ଭାଷଣବାଜି । ଆଉ ହୋହଲ୍ଲା ନାହିଁ । ଏବେ ସାଇଲେନ୍ସ ପରିୟଡ୍ । ବିନା କୋଳାହଳରେ ଭୋଟର ଚୟନ କରିବେ ଯୋଗ୍ୟ ପ୍ରାର୍ଥୀଙ୍କୁ । ପ୍ରଚାର ବନ୍ଦ ହୋଇଯାଇଥିଲେ ବି ଭୋଟରଙ୍କ ମନ ଜିତିବାକୁ ସବୁ ପ୍ରାର୍ଥୀ ଓ ଦଳ ଶେଷ ପର୍ଯ୍ୟାୟରେ ପ୍ରାଣମୂର୍ଚ୍ଛା ପ୍ରୟାସ ଲଗାଇ ଦେଇଛନ୍ତି ।
ପ୍ରଚାରର ଶେଷ ଦିନରେ କଂଗ୍ରେସ ପାଇଁ ରାହୁଲ ଗାନ୍ଧି, ବିଜେଡି ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କାର୍ତ୍ତିକ ପାଣ୍ଡିଆନ ଓ ବିଜେପି ପାଇଁ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ରାଜ୍ୟ ସଭାପତି ମନମୋହନ ସାମଲ ପ୍ରମୁଖ ଜୋରଦାର ପ୍ରଚାର କରିଛନ୍ତି । ଭୋଟ ଭିକ୍ଷା କରିଛନ୍ତି, ବିରୋଧୀଙ୍କ ଉପରେ ବର୍ଷିଛନ୍ତି । ପ୍ରତିଶ୍ରୁୂତିର ପାହାଡ଼ ଛିଡ଼ା କରାଇଛନ୍ତି ଭୋଟରଙ୍କ ପାଇଁ । ଭୋଟର କାହାକୁ ଭରସିବେ, ସେଥିପାଇଁ ମାନସ ମନ୍ଥନ ଚଳାଇଛନ୍ତି ।
ଶନିବାର (ଜୁନ୍ ୧) ଶେଷ ପର୍ଯ୍ୟାୟ ଭୋଟ । ଓଡ଼ିଶାର ୬ ଲୋକସଭା ଓ ୪୨ ବିଧାନସଭା ଆସନ ପାଇଁ ହେବ ଭୋଟ । ଲୋକସଭା ପାଇଁ ମୋଟ ୬୬ଜଣ ପ୍ରାର୍ଥୀ ଥିବାବେଳେ ବିଧାନସଭା ପାଇଁ ଲଢ଼ୁଛନ୍ତି ୩୯୪ ଜଣ ଯୋଦ୍ଧା । ସାଂସଦ ପ୍ରାର୍ଥୀଙ୍କ ଭିତରେ ୧୧ଜଣ ମହିଳା ଥିବାବେଳେ ବିଧାୟକ ପ୍ରାର୍ଥୀଙ୍କ ଭିତରେ ୫୮ଜଣ ମହିଳା । ଚତୁର୍ଥ ପର୍ଯ୍ୟାୟରେ ଲୋକସଭା ପାଇଁ ଶ୍ରୀକାନ୍ତ ଜେନା, ପ୍ରତାପ ଷଡ଼ଙ୍ଗୀ, ଲେଖାଶ୍ରୀ ସାମନ୍ତସିଂହାର, ବୈଜୟନ୍ତ ପଣ୍ଡା, ଅଂଶୁମାନ ମହାନ୍ତି, ସୁଦାମ ମାର୍ଣ୍ଡିଙ୍କ ଭଳି ପ୍ରଭାବଶାଳୀ ନେତା ଲଢ଼ୁଛନ୍ତି । ବିଧାନସଭାରେ ନିରଞ୍ଜନ ପଟ୍ଟନାୟକ, ଅତନୁ ସବ୍ୟସାଚୀ ନାୟକ, ପ୍ରତାପ କେଶରୀ ଦେବ, ଗଣେଶ୍ୱର ବେହେରା, ପ୍ରଫୁଲ୍ଲ ସାମଲ, ପ୍ରମିଳା ମଲ୍ଲିକ, ପ୍ରଶାନ୍ତ ମୁଦୁଲି, ଅରବିନ୍ଦ ମହାପାତ୍ର, ପ୍ରଭାତୀ ପରିଡ଼ା, ଅରିନ୍ଦମ ରାୟ ପ୍ରମୁଖଙ୍କ ଆସନ ଉପରେ ସଭିଙ୍କ ନଜର ରହିଛି ।
ଏହି ପର୍ଯ୍ୟାୟରେ ମୋଟ ୯୯ ଲକ୍ଷ ୬୧ ହଜାର ୫୭ଜଣ ମତଦାତା ଆଗାମୀ ୫ ବର୍ଷ ପାଇଁ ନିଜ ଅଞ୍ଚଳର ଭାଗ୍ୟ ନିର୍ଦ୍ଧାରଣ କରିବେ । ଏଥିରେ ୫୦ ଲକ୍ଷ ୮୮ ହଜାର ୭୬ଜଣ ପୁରୁଷ ଓ ୪୮ ଲକ୍ଷ ୭୨ ହଜାର ୨୯୪ଜଣ ମହିଳା ଏବଂ ୬୮୭ଜଣ ତୃତୀୟ ଲିଙ୍ଗ ଭୋଟର । ୧୮- ୧୯ ବର୍ଷ ବୟସ୍କ ମତଦାତାଙ୍କ ସଂଖ୍ୟା ୨.୫୭ ଲକ୍ଷ, ୨୦-୨୯ ବର୍ଷ ବୟସ୍କ ମତଦାତାଙ୍କ ସଂଖ୍ୟା ୨୦.୫୧ ଲକ୍ଷ । ଶେଷ ପର୍ଯ୍ୟାୟ ପାଇଁ ୧୦ ହଜାର ୫୮୭ଟି ବୁଥ୍ ଓ ୨୫ଟି ଅତିରିକ୍ତ ବୁଥ୍ ବ୍ୟବସ୍ଥା କରାଯାଇଛି । ୧୪୦୦ରୁ ଅଧିକ ବୁଥ୍ ସମ୍ପୂର୍ଣ୍ଣ ରୂପେ ମହିଳା କର୍ମଚାରୀଙ୍କ ଦ୍ୱାରା ପରିଚାଳିତ ହେବ । ଏହି ପର୍ଯ୍ୟାୟରେ ପ୍ରାୟ ୭୨ ହଜାର ପୋଲିଂ କର୍ମଚାରୀ ନିୟୋଜିତ ହୋଇଛନ୍ତି । ସକାଳ ୭ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଭୋଟ ହେବ ।
୪୨ଟି ନିର୍ବାଚନମଣ୍ଡଳୀରେ ଭୋଟ ପାଇଁ ମୋଟ ୧୨୫ କମ୍ପାନି ସେଣ୍ଟ୍ରାଲ ଆର୍ମଡ ପୁଲିସ ଫୋର୍ସ (ସିଏପିଏଫ) ନିୟୋଜିତ ହୋଇଛନ୍ତି । ଅଂଶୁଘାତ ମୁକାବିଲା ପାଇଁ ପ୍ରତି ପୋଲିଂ ଷ୍ଟେସନରେ ଆବଶ୍ୟକୀୟ ଔଷଧ, ଓଆରଏସ୍ ରଖାଯିବ । ବୁଥରେ ପିଇବା ପାଣି, ଶୌଚାଳୟ ଓ ଛାଇ ଆଦି ସର୍ବନିମ୍ନ ବ୍ୟବସ୍ଥା ସୁନିଶ୍ଚିତ କରିବାକୁ କୁହାଯାଇଛି । ବୁଥ୍ ଭିତରକୁ କୌଣସି ବୈଦ୍ୟୁତିକ ଉପକରଣ ଯଥା-ମୋବାଇଲ୍ ଫୋନ, କ୍ୟାମେରା, ହେଡ୍ଫୋନ, ସ୍ମାର୍ଟ ୱାଚ୍ ନେବାକୁ ବାରଣ କରାଯାଇଛି ।
ଏହି ଲୋକସଭା ଆସନ ଭିତରୁ ୨୦୧୯ରେ ବିଜେଡି ୪ ଓ ବିଜେପି ୨ଟି ଜିତିଥିଲା । ୪୨ ବିଧାନସଭା ଆସନ ଭିତରୁ ବିଜେଡି ୩୪ ଓ ବିଜେପି ୬ଟି ଆସନ ଜିତିଥିଲା ଗତ ଥର । ଏଥର ଶେଷ ପର୍ଯ୍ୟାୟ ପାଇଁ ତିନି ଦଳ ପୂରା ଦମ୍ ଲଗାଇ ଦେଇଛନ୍ତି । ପ୍ରଚାର ଥମିବା ପରେ ଭିତିରିଆ କସରତ ଆରମ୍ଭ ହୋଇଯାଇଛି । ଭୋଟରଙ୍କ ମନ ଜିତିବାକୁ ସବୁ ପ୍ରକାର ପ୍ରୟାସ ଚାଲିଛି।
