ଚଳିତ ବର୍ଷର ବିଧାନସଭା ନିର୍ବାଚନ ଓଡ଼ିଶା ରାଜନୀତିରେ ଏକ ନୂତନ ଅଧ୍ୟାୟ ସୃଷ୍ଟି କରିଥିଲା । ନିର୍ବାଚନରେ ଭାରତୀୟ ଜନତା ପାର୍ଟି (ବିଜେପି) ଐତିହାସିକ ବିଜୟ ହାସଲ କରିବା ପରେ, ଦୀର୍ଘ ୨୪ବର୍ଷର ନବୀନ ସରକାରର ପତନ ହୋଇଛି । ସବୁ କଳ୍ପନା ଜଳ୍ପନାରେ ବିରାମ ଲଗାଇ ରାଜ୍ୟର ନେତୃତ୍ୱ ନେଇଛନ୍ତି କେନ୍ଦୁଝର ଜିଲ୍ଲାର ଜଣେ ଆଦିବାସୀ ନେତା ମୋହନ ଚରଣ ମାଝୀ । ଅତି ଶାନ୍ତ, ସରଳ, ଭଦ୍ର ତଥା ମେଳାପୀ ମୋହନ ରାଜ୍ୟକୁ କେଉଁ ଦିଗରେ ଆଗକୁ ନେବେ ତାହାକୁ ନେଇ ଆଶା ଆଶଙ୍କା ରହିଥିଲା । ଇତିମଧ୍ୟରେ ବିଜେପି ସରକାର ୧୦୦ ଦିନର ଯାତ୍ରା ପୂରଣ କରିଛନ୍ତି । ଏହି ସମୟ ମଧ୍ୟରେ ତାଙ୍କ ସରକାର ଯେଉଁଭଳି ଚମତ୍କାର ସଫଳତା ହାସଲ କରିଛି ତାହା ସମସ୍ତଙ୍କୁ ଚକିତ କରିଛି । ପରିବର୍ତ୍ତନ ଓ ପ୍ରଗତି ପାଇଁ ତତ୍ପର ଥିବା ରାଜ୍ୟବାସୀଙ୍କ ମନରେ ଭାରତର ଯଶସ୍ୱୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ "ବିକଶିତ ଓଡ଼ିଶା, ବିକଶିତ ଭାରତ'ର ପ୍ରତିଶ୍ରୁତି ସ୍ପଷ୍ଟଭାବେ ପ୍ରତିଫଳିତ କରିବାରେ ସରକାର ସମ୍ପୂର୍ଣ୍ଣ ସଫଳ ହୋଇଛନ୍ତି ।
୨୦୩୬ ସୁଦ୍ଧା ରାଜ୍ୟକୁ "ସମୃଦ୍ଧ ଓଡ଼ିଶା' କରିବା ଭଳି ଏକ ବୃହତ ଲକ୍ଷ୍ୟ ରଖିଥିବା ବିଜେପି ସରକାର ପ୍ରଥମ ଦିନରୁ ନିଜର ପ୍ରତିଶ୍ରୁତି ପୂରଣ କରିବା ପାଇଁ ଜୋରଦାର ପ୍ରୟାସ ଆରମ୍ଭ କରିଛନ୍ତି । ମହାପ୍ରଭୁ ଶ୍ରୀଜଗନ୍ନାଥଙ୍କ ପବିତ୍ର ଶ୍ରୀମନ୍ଦିରର ୪ଟି ମୁଖ୍ୟଦ୍ୱାର ଖୋଲିବା ଏବଂ ଶ୍ରୀମନ୍ଦିରର ରତ୍ନଭଣ୍ଡାର ଖୋଲାଯାଇ ଗଣତିମଣତି ଆରମ୍ଭ ହେବା ଏକ ବଡ଼ ସଫଳତା । ଅନ୍ୟ ଏକ ଗୁରୁତ୍ୱପୂର୍ଣ୍ଣ ସଫଳତା ହେଉଛି ଧାନର ସର୍ବନିମ୍ନ ସହାୟକ ମୂଲ୍ୟ କୁଇଣ୍ଟାଲ ପିଛା ୨୧୦୦ ଟଙ୍କାରୁ ୩୧୦୦ ଟଙ୍କାକୁ ବୃଦ୍ଧି କରିବା । ଦୀର୍ଘଦିନ ଧରି ଉତ୍ପାଦିତ ଦ୍ରବ୍ୟର ଉନ୍ନତ ମୂଲ୍ୟ ଦାବି କରିଆସୁଥିବା ଓଡ଼ିଶାର ଚାଷୀମାନଙ୍କ ଜୀବିକାରେ ଏହି ପଦକ୍ଷେପ ସହାୟକ ହେବ ବୋଲି ଆଶା କରାଯାଉଛି ।
ସରକାର ଆର୍ଥିକ ସହାୟତା, ସ୍ୱାସ୍ଥ୍ୟ ସହାୟତା ଏବଂ ଦକ୍ଷତା ବିକାଶ କାର୍ଯ୍ୟକ୍ରମ ମାଧ୍ୟମରେ ସାରା ରାଜ୍ୟରେ ପ୍ରାୟ ଏକ କୋଟି ମହିଳାଙ୍କୁ ସଶକ୍ତ କରିବା ଉଦ୍ଦେଶ୍ୟରେ ଏକ ପ୍ରମୁଖ କଲ୍ୟାଣକାରୀ ଯୋଜନା ସୁଭଦ୍ରା ଯୋଜନା ମଧ୍ୟ ଆରମ୍ଭ କରିଛନ୍ତି । ୨୦୨୪ ସେପ୍ଟେମ୍ବର ୧୭ ତାରିଖରେ ଖୋଦ୍ ପ୍ରଧାନମନ୍ତ୍ରୀ ମୋଦି ଓଡ଼ିଶା ଆସି ୨୫ଲକ୍ଷ ମା’ ଓ ଭଉଣୀଙ୍କ ଖାତାକୁ ସୁଭଦ୍ରା ଟଙ୍କା ପଠାଇ ସେମାନଙ୍କ ମାନସମ୍ମାନ ବୃଦ୍ଧି କରିଛନ୍ତି । ଦୀର୍ଘ ୧୬ବର୍ଷ ଧରି ବନ୍ଦ ରହିବା ପରେ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠ ଖୋଲିବା ସ୍ୱଚ୍ଛତା ଓ ଉତ୍ତରଦାୟିତ୍ୱ ପ୍ରତି ନୂଆ ସରକାରଙ୍କ ପ୍ରତିବଦ୍ଧତାର ଆଉ ଏକ ପ୍ରମାଣ । ଶାସନକୁ ଲୋକଙ୍କ ନିକଟତର କରାଇବା, ସେମାନଙ୍କୁ ସିଧାସଳଖ ମୁଖ୍ୟମନ୍ତ୍ରୀଙ୍କ ନିକଟରେ ସେମାନଙ୍କ ସମସ୍ୟା ଜଣାଇବା ପାଇଁ ଏକ ମାଧ୍ୟମ ପ୍ରଦାନ କରିବା ହେଉଛି ଏହି ପଦକ୍ଷେପର ଲକ୍ଷ୍ୟ ।
ଲୋକସଭା ନିର୍ବାଚନରେ ଓଡ଼ିଶାର ୨୧ଟି ଆସନରୁ ୨୦ଟିରେ ବିଜୟୀ ହୋଇଥିବା ବିଜେପିର ସଫଳତା ଏବଂ ୩ଜଣ କେନ୍ଦ୍ରମନ୍ତ୍ରୀଙ୍କ ସହ ଜାତୀୟ ସ୍ତରରେ ବିଜେପିର ପ୍ରତିନିଧିତ୍ୱ ନିଜର ସ୍ଥିତିକୁ ଆହୁରି ମଜବୁତ କରିଛି । ବିଜେପି ସରକାରଙ୍କ ସଫଳତା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ "ଡବଲ ଇଞ୍ଜିନ' ସରକାରର ପ୍ରତିଶ୍ରୁତି ପୂରଣ ପ୍ରତି ଦୃଢ଼ ସଂକଳ୍ପକୁ ଦର୍ଶାଉଛି ।
ଅନେକ ସମୟରେ ମନ୍ଦିରର ଭୂମି, ପ୍ରାକୃତିକ ସୋନ୍ଦର୍ଯ୍ୟ ଓ ସମୃଦ୍ଧ ସାଂସ୍କୃତିକ ଐତିହ୍ୟ ଯୋଗୁଁ ପରିଚିତ ଓଡ଼ିଶା ଏକ ବିପୁଳ ସମ୍ଭାବନା ଓ ବିପୁଳ ସୁଯୋଗର ରାଜ୍ୟ । ବିଭିନ୍ନ ପ୍ରାକୃତିକ ସମ୍ପଦ, ଏକ ଲମ୍ବା ଉପକୂଳ ଏବଂ ଏକ ଜୀବନ୍ତ ସାଂସ୍କୃତିକ ପରମ୍ପରାରେ ଭରପୂର, ଏଠାରେ ସ୍ଥାୟୀ ଅଭିବୃଦ୍ଧି ଏବଂ ବିକାଶ ପାଇଁ ଆବଶ୍ୟକ ସମସ୍ତ ଉପାଦାନ ଅଛି । କିନ୍ତୁ ବିଜୁ ଜନତା ଦଳର ୨୪ବର୍ଷର ନିରନ୍ତର ଶାସନ ସତ୍ତେ୍ୱ ରାଜ୍ୟ ନିଜର ସମ୍ପୂର୍ଣ୍ଣ ସାମର୍ଥ୍ୟକୁ ଉପଲବ୍ଧ କରିବା ପାଇଁ ସଂଘର୍ଷ କରୁଥିଲା ।
୨୦୨୩-୨୪ରେ ରାଜ୍ୟର ଅର୍ଥନୀତି ୧୦୦ ବିଲିୟନ ଡଲାର ଥିଲା ଯାହା ଭାରତୀୟ ରାଜ୍ୟମାନଙ୍କ ମଧ୍ୟରେ ୧୪ତମ ସ୍ଥାନରେ ରହିଛି । ଯଦିଓ ଏହା ରାଜ୍ୟର ଅତୀତର ଅର୍ଥନୈତିକ ସ୍ଥିତିଠାରୁ କିଛିଟା ଉନ୍ନତିକୁ ଦର୍ଶାଉଛି, ତଥାପି ଏହା ଲୋକଙ୍କ ଆଶାଠାରୁ ବହୁତ ଦୂରରେ ରହିଯାଇଛି । ଓଡ଼ିଶାର ମୁଣ୍ଡପିଛା ଆୟ ଜାତୀୟ ହାର ଠାରୁ କମ୍ ରହିଛି । ଯାହା ଅର୍ଥନୈତିକ ଅସମାନତା ଏବଂ ଅସମାନ ଅଭିବୃଦ୍ଧିକୁ ପ୍ରତିଫଳିତ କରୁଛି ।
୨୦୨୨ରେ ୧୦.୫ଲକ୍ଷ କୋଟି ଟଙ୍କାର ପୁଞ୍ଜିନିବେଶ ପ୍ରତିଶ୍ରୁତି ପାଇଥିବା "ମେକ୍ ଇନ୍ ଓଡ଼ିଶା' କନକ୍ଲେଭ୍ ଭଳି ହାଇପ୍ରୋଫାଇଲ୍ ପଦକ୍ଷେପ ସତ୍ତେ୍ୱ ଏହାର ସୁଫଳ ସମାନ ଭାବେ ବଣ୍ଟନ ହୋଇପାରିନାହିଁ । ସନ୍ତୁଳିତ ଅର୍ଥନୈତିକ ବିକାଶ ପାଇଁ ଗୁରୁତ୍ୱପୂର୍ଣ୍ଣ ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ (ଏମଏସଏମଇ) କ୍ଷେତ୍ର ଅନୁନ୍ନତ ରହିଛି । ଏମ୍ଏସ୍ଏମ୍ଇ ସଂଖ୍ୟା ଦୃଷ୍ଟିରୁ ଓଡ଼ିଶା ଭାରତର ଶ୍ରେଷ୍ଠ ୧୦ଟି ରାଜ୍ୟ ମଧ୍ୟରେ ମଧ୍ୟ ନାହିଁ । ତୃଣମୂଳ ସ୍ତରରେ ନିଯୁକ୍ତି ସୃଷ୍ଟି ଏବଂ ଅର୍ଥନୈତିକ ସଶକ୍ତୀକରଣ ପାଇଁ ଏମଏସଏମଇ କ୍ଷେତ୍ର ଗୁରୁତ୍ୱପୂର୍ଣ୍ଣ ହୋଇଥିବାରୁ ଏହା ଏକ ଗୁରୁତ୍ୱପୂର୍ଣ୍ଣ ଅଭାବ ହୋଇ ରହିଥିଲା ।
ବିଜେପି ସରକାରଙ୍କ ପ୍ରଥମ ୧୦୦ ଦିନରେ ଶିଳ୍ପାୟନ ଉଦ୍ୟମ ଆଗକୁ ବଢ଼ିଛି । ଏହି ସମୟ ଭିତରେ ୪୫ହଜାର କୋଟି ଟଙ୍କାର ପୁଞ୍ଜିନିବେଶ ପ୍ରସ୍ତାବ ମଞ୍ଜୁର ହୋଇଛି । ସେଗୁଡ଼ିକ କାର୍ଯ୍ୟକାରୀ ହେଲେ ୩୬ହଜାର ଲୋକଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟିହେବ । ନୂଆ ସରକାରଙ୍କ ପ୍ରଥମ ଉଚ୍ଚସ୍ତରୀୟ ମଞ୍ଜୁରି କର୍ତ୍ତୃପକ୍ଷଙ୍କ ବୈଠକରେ ୩୯୨୭୧କୋଟି ଟଙ୍କାର ୧୨ଟି ଶିଳ୍ପ ପ୍ରକଳ୍ପ ମଞ୍ଜୁର କରାଯାଇଛି । ଏହା ବ୍ୟତୀତ ସିଙ୍ଗିଲ ୱିଣ୍ଡୋ ବ୍ୟବସ୍ଥାରେ ମଧ୍ୟ କୋଟି କୋଟି ଟଙ୍କାର ପ୍ରକଳ୍ପ ମଞ୍ଜୁର ହୋଇଛି । ଶିଳ୍ପାୟନକୁ ନେଇ ସରକାରଙ୍କ ଆଭିମୁଖ୍ୟ ସ୍ପଷ୍ଟ ରହିଛି । ପାଞ୍ଚବର୍ଷ ମଧ୍ୟରେ ଦେଶ ଭିତରୁ ରାଜ୍ୟକୁ ଅଢ଼େଇ ଲକ୍ଷ କୋଟି ଟଙ୍କାର ପୁଞ୍ଜିନିବେଶ ଓ ୨ ବିଲିଅନ ଡଲାରର ପ୍ରତ୍ୟକ୍ଷ ବୈଦେଶିକ ପୁଞ୍ଜିନିବେଶ (ଏଫ୍ଡିଆଇ) ଆଣିବାକୁ ସରକାର ଯୋଜନା ରଖିଛନ୍ତି । ପାରମ୍ପରିକ ଧାତବ ଶିଳ୍ପ ସହିତ ଗ୍ରିନ୍ ହାଇଡ୍ରୋଜେନ୍, ଗ୍ରିନ୍ ଆମୋନିଆ, ପମ୍ପଡ୍ ଷ୍ଟୋରେଜ୍ ବିଦ୍ୟୁତ୍ ପ୍ରକଳ୍ପ, ସେମିକଣ୍ଡକ୍ଟର ଭଳି ଉଦୀୟମାନ ପ୍ରକଳ୍ପ ଉପରେ ସରକାର ଜୋର ଦେଉଛନ୍ତି । ଆଇଟି କ୍ଷେତ୍ରରେ ନୂଆ ନୂଆ କମ୍ପାନିକୁ ଆକୃଷ୍ଟ କରିବା ଲାଗି ଉଦ୍ୟମ କରାଯାଉଛି । ଶିଳ୍ପାୟନ ଦ୍ୱାରା ନିଯୁକ୍ତି ସୁଯୋଗ ସୃଷ୍ଟି କରିବା ଉପରେ ସରକାର ପ୍ରାଥମିକତା ଦେଉଛନ୍ତି ।
କୃଷି ଓଡ଼ିଶାର ଅର୍ଥନୀତିର ମେରୁଦଣ୍ଡ ହୋଇ ରହିଛି ଏବଂ ଏହା ପ୍ରାୟ ୭୦% ଲୋକଙ୍କୁ ଜୀବିକା ପ୍ରଦାନ କରୁଛି । ତେବେ କମ୍ ଉତ୍ପାଦକତା, ବାରମ୍ବାର ପ୍ରାକୃତିକ ବିପର୍ଯ୍ୟୟ ଓ ପର୍ଯ୍ୟାପ୍ତ ଭିତ୍ତିଭୂମି ଯୋଗୁଁ ଏହି କ୍ଷେତ୍ର କ୍ଷତିଗ୍ରସ୍ତ ହୋଇଛି । ଚାଉଳ ଓ ପନିପରିବା ଉତ୍ପାଦନରେ ଓଡ଼ିଶା ଯଥାକ୍ରମେ ଅଷ୍ଟମ ଓ ସପ୍ତମ ସ୍ଥାନରେ ଥିଲେ ମଧ୍ୟ ଏହାର ଉତ୍ପାଦକତା ଜାତୀୟ ହାରାହାରି ଠାରୁ ଯଥେଷ୍ଟ କମ୍ । କୃଷିକ୍ଷେତ୍ରରେ ରାଜ୍ୟକୁ ସ୍ୱାବଲମ୍ବୀ କରିବା ସହ ଅତ୍ୟାବଶ୍ୟକ ଖାଦ୍ୟ ସାମଗ୍ରୀ ଯୋଗାଣକୁ ଉଚିତ୍ ମୂଲ୍ୟରେ ଉପଲବ୍ଧ କରିବା ସୁନିଶ୍ଚିତ କରିବା ଲାଗି ସରକାର ଅନେକ ପଦକ୍ଷେପ ନେଇଛନ୍ତି । ଚାଷୀମାନଙ୍କ ଲାଗି ସର୍ବନିମ୍ନ ସହାୟକ ମୂଲ୍ୟ ବଢ଼ାଇ ଚାଷୀକୁଳର ସମ୍ମାନ ବଢ଼ାଇଛନ୍ତି ସରକାର । ଏଥିସହିତ ୨୦୨୪-୨୫ ବଜେଟ୍ରେ କୃଷିକ୍ଷେତ୍ର ଲାଗି ୩୩୯୧୯ କୋଟି ଟଙ୍କାର ବ୍ୟୟବରାଦ କରାଯାଇଛି ।
ଆଳୁ ଉତ୍ପାଦନରେ ଆତ୍ମନିର୍ଭରଶୀଳତା ହାସଲ କରିବା ଉଦ୍ଦେଶ୍ୟରେ ଆଳୁ ମିଶନ ଉପରେ ରାଜ୍ୟ ସରକାର ଗୁରୁତ୍ୱ ଦେଉଥିଲେ ମଧ୍ୟ ଓଡ଼ିଶା ପଶ୍ଚିମବଙ୍ଗ, ଉତ୍ତରପ୍ରଦେଶ, ମହାରାଷ୍ଟ୍ର ଓ ଆନ୍ଧ୍ରପ୍ରଦେଶ ଭଳି ପଡ଼ୋଶୀ ରାଜ୍ୟରୁ ଆଳୁ, ପିଆଜ, କଦଳୀ ଓ ଲଙ୍କା ଭଳି ପନିପରିବା ଆମଦାନୀ ଜାରି ରଖିଛି । ବାହ୍ୟ ଉତ୍ସ ଉପରେ ଏହି ନିର୍ଭରଶୀଳତା କେବଳ ରାଜ୍ୟର ଅର୍ଥନୀତିକୁ ନଷ୍ଟ କରେନାହିଁ ବରଂ ଏହା କୃଷକମାନଙ୍କୁ ବଜାର ଅସ୍ଥିରତାର ସମ୍ମୁଖୀନ କରାଇଥାଏ । ଏଭଳି ସଙ୍କଟକୁ ଟାଳିବା ଲାଗି ନୂଆ ସରକାର ଉତ୍ତରପ୍ରଦେଶ ଓ ପଞ୍ଜାବ ଭଳି ରାଜ୍ୟରୁ ଆଳୁ ଆଣିବାକୁ ଉଦ୍ୟମ କରିବା, କୃଷିଜାତ ସାମଗ୍ରୀ ସଂଗ୍ରହର ଉତ୍ସରେ ବିବିଧତା ଆଣିବା ଲାଗି ସରକାରଙ୍କ ଆଭିମୁଖ୍ୟକୁ ତାହା ପ୍ରତିଫଳିତ କରୁଛି । ଓଡ଼ିଶାରେ ବ୍ୟାପକ କୋଲ୍ଡ ଷ୍ଟୋରେଜ ତିଆରି ଉପରେ ସରକାର ଗୁରୁତ୍ୱ ଦେଉଛନ୍ତି ।
ସରକାର ଶିକ୍ଷା ଏବଂ କ୍ରୀଡ଼ାର ବିକାଶ ପାଇଁ ମଧ୍ୟ ଅନେକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି । ଶିକ୍ଷା ବ୍ୟବସ୍ଥାକୁ ସୁଦୃଢ଼ କରି ପ୍ରତି ପଞ୍ଚାୟତରେ ଗୋଦାବରୀଶ ମିଶ୍ର ଆଦର୍ଶ ପ୍ରାଥମିକ ବିଦ୍ୟାଳୟ ଖୋଲିବାକୁ ଯୋଜନା କରିଥିବାବେଳେ ମଧୋ ସିଂହ ହାତପାଣ୍ଠି ଯୋଜନା ଶିକ୍ଷାରୁ ଦୂରେଇ ଯାଉଥିବା ଆଦିବାସୀ ପିଲାଙ୍କୁ ଶିକ୍ଷା ସହ ଯୋଡ଼ିବାରେ ସାହାଯ୍ୟ କରିବ । କ୍ରୀଡ଼ାର ବିକାଶ ପାଇଁ ସରକାର ରାଜଧାନୀ ଉପକଣ୍ଠରେ ଏକ ନୂତନ ଷ୍ଟାଡିୟମ ନିର୍ମାଣକୁ ମଞ୍ଜୁରୀ ଦେଇଛନ୍ତି । ଦୁର୍ନୀତି ଉପରେ ଅଙ୍କୁଶ ଲଗାଇବାକୁ ଯାଇ ସରକାରଙ୍କ କଠୋର ନୀତି ଯୋଗୁଁ ଏହି ୧୦୦ଦିନ ମଧ୍ୟରେ ୭୧ଟି ମାମଲା ରୁଜୁ ସହ ୫୮ଜଣ ଅଧିକାରୀ ଜେଲ ଗଲେଣି ।
ପୁରୁଣା ସରକାରଙ୍କ ଅମଳରେ ମହିଳା ସଶକ୍ତୀକରଣ, ଅନୁସୂଚିତ ଜାତି ଓ ଜନଜାତିଙ୍କ କଲ୍ୟାଣ, ଓଡ଼ିଆ ସଂସ୍କୃତି ଓ ଭାଷାର ପ୍ରଚାର ପ୍ରସାର ଆଦି ପ୍ରସଙ୍ଗକୁ ଅଣଦେଖା କରାଯାଇଥିଲା । ଜଗନ୍ନାଥ ମନ୍ଦିରର ୪ଟି ମୁଖ୍ୟଦ୍ୱାର ଖୋଲିବା ଓ ମନ୍ଦିରର କୋଷାଗାର ରତ୍ନଭଣ୍ଡାର ଖୋଲିବା ଦାବିରେ ପୂର୍ବ ପ୍ରଶାସନର ଉଦାସୀନତା ଯୋଗୁଁ ଲୋକମାନେ ଆହୁରି ବିଚ୍ଛିନ୍ନ ହୋଇପଡ଼ିଥିଲେ । କିନ୍ତୁ ଶାସନ ଭାର ହାତକୁ ନେବାପରେ ତୁରନ୍ତ ଶ୍ରୀମନ୍ଦିର ଚାରିଦ୍ୱାରକୁ ଖୋଲି ଭକ୍ତ ଓ ଭଗବାନଙ୍କ ମଧ୍ୟରେ ରହିଥିବା ଅନ୍ତରକୁ ନୂଆ ସରକାର ଦୂର କରି ଲୋକମାନଙ୍କ ଆଶୀର୍ବାଦ ଲାଭ କରିଛି । କେବଳ ସେତିକି ନୁହେଁ ମହାପ୍ରଭୁଙ୍କ ରତ୍ନଭଣ୍ଡାରକୁ ଖୋଲିବା, ସେଥିରେ ଥିବା ରତ୍ନକୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରିବା, ରତ୍ନଭଣ୍ଡାରର ମରାମତି କରିବା, ଭଳି ପଦକ୍ଷେପ ନେଇ ସରକାର ଭକ୍ତଙ୍କ ମନରେ ଭଗବତ ପ୍ରେମକୁ ବଢ଼ାଇଛନ୍ତି ।
ସଂକ୍ଷେପରେ କହିଲେ ଓଡ଼ିଶାର ବିଜେପି ସରକାର ଓଡ଼ିଆ ଅସ୍ମିତାକୁ ଉଜାଗର କରିବା, ଭକ୍ତଙ୍କୁ ଭଗବାନଙ୍କ ନିକଟତର କରିବା, ନାରୀଙ୍କୁ ସମ୍ମାନ ଓ ସଶକ୍ତୀକରଣ, ଚାଷୀଙ୍କୁ ଉଚିତ୍ ମୂଲ୍ୟ ଦେବା, ରୋଜଗାର, ଶିଳ୍ପାୟନ, ଦୁର୍ନୀତି ବିରୋଧରେ ଶୂନ୍ୟ ସହନଶୀଳତା ନୀତି, ସରକାରଙ୍କୁ ଲୋକଙ୍କ ପାଖରେ ପହଞ୍ଚାଇବା ଭଳି ପୂର୍ବ ସରକାର ଅମଳରେ ଅସମ୍ଭବ ମନେ ହେଉଥିବା ଅନେକ କାମକୁ ନୂଆ ସରକାର ଅତି ସହଜରେ କରି ଦେଖାଇଛନ୍ତି । ବିଜେପି ସରକାର ଓଡ଼ିଶାକୁ ଏକ ଦ୍ରୁତ ଅଭିବୃଦ୍ଧିଶୀଳ ଓ ଉଜ୍ୱଳ ଭବିଷ୍ୟତ ପଥରେ ଅବସ୍ଥାପିତ କରିବାରେ ସଫଳ ହୋଇଛନ୍ତି।
