ନୂଆଦିଲ୍ଲୀ: ଗଣତାନ୍ତ୍ରିକ ବ୍ୟବସ୍ଥା ପାଇଁ ଆଜି (ଗୁରୁବାର) ପାକିସ୍ତାନରେ ଚାଲିଛି ମତଦାନ । ହେଲେ ଏହାରି ଭିତରେ ଯାହା ସୂଚନା ରହିଛି, ଆତଙ୍କବାଦୀ ମାନେ ମଧ୍ୟ ସେଠାରେ ନିର୍ବାଚନ ଲଢୁଛନ୍ତି । ବର୍ତ୍ତମାନ ଏହି ଆତଙ୍କବାଦୀମାନେ ସମ୍ମାନଜନକ ହେବାକୁ ଏବଂ ବିଧାନସଭାରେ ବସିବାକୁ ଚାହୁଁଛନ୍ତି । ମୁମ୍ବାଇ ଆକ୍ରମଣର ମାଷ୍ଟର ମାଇଣ୍ଡ୍ ଅପରାଧୀ ହାଫିଜ ସଇଦର ଗ୍ୟାଙ୍ଗ୍ ନିର୍ବାଚନ କ୍ଷେତ୍ରକୁ ପ୍ରବେଶ କରିଛନ୍ତି । ସଇଦର ପୁଅ ହାଫିଜ ତାଲହା ସଇଦ ମରକାଜୀ ମୁସଲିମ ଲିଗ ପାର୍ଟିରୁ ନିର୍ବାଚନ ଲଢୁଛି । ସେ ଲାହୋରର ନ୍ୟାସନାଲ ଆସେମ୍ବଲି- ୧୨୨ ଆସନରୁ ପ୍ରତିଦ୍ୱନ୍ଦ୍ୱିତା କରୁଛି । ସମାନ ଆସନରୁ ପାକିସ୍ତାନ ମୁସଲିମ ଲିଗ୍-ନୱାଜ ନେତା ତଥା ପୂର୍ବତନ ମନ୍ତ୍ରୀ ଖାୱାଜା ସାଦ୍ ରଫିକ୍ ମଧ୍ୟ ପ୍ରତିଦ୍ୱନ୍ଦ୍ୱିତା କରୁଛନ୍ତି । ସେହିଭଳି ସଯିଦ୍ର ଜ୍ବାଇଁ ହାଫିଜ ନେକ୍ ଗୁଜ୍ଜର ମରକାଜୀ ଲିଗ୍ ଟିକେଟରୁ ପ୍ରାଦେଶିକ ବିଧାନସଭା ନିର୍ବାଚନ ମଣ୍ଡଳୀ PP-୧୬୨ ରୁ ନିର୍ବାଚନ ଲଢୁଛି ।
ଆପଣ ଜାଣି ଆଶ୍ଚର୍ଯ୍ୟ ହେବେ ଯେ, ୨୦୦୮ ମୁମ୍ବାଇ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ହାଫିଜ ସଇଦର ନିଷିଦ୍ଧ ସଂଗଠନର ନୂଆ ଚେହେରା 'ପାକିସ୍ତାନ ମରକାଜୀ ମୁସଲିମ ଲିଗ' ନାମକ ଏକ ନୂତନ ଦଳ ଆକାରରେ ସାଧାରଣ ନିର୍ବାଚନରେ ପ୍ରବେଶ କରିଛି । ପାକିସ୍ତାନରେ ଏହା ପ୍ରାୟତ ଏପରି ଘଟେ ଯେ, ଯେତେବେଳେ ବିଦେଶୀ ଚାପ ଯୋଗୁଁ ଗୋଟିଏ ଆତଙ୍କବାଦୀ ସଂଗଠନ ନିଷେଧ ହୁଏ, ସେତେବେଳେ ଅନ୍ୟ ଗୋଷ୍ଠୀ ଜନ୍ମ ହୁଏ ।
ମରକାଜୀ ମୁସଲିମ୍ ଲିଗ୍ର ଅନେକ ପ୍ରାର୍ଥୀଙ୍କର ହାଫିଜ ସଇଦର ସମ୍ପର୍କୀୟ କିମ୍ବା ନିଷିଦ୍ଧ ଲଶ୍କର-ଇ-ତାଇବା, ଜମାତ-ଉଦ-ଦାୱା କିମ୍ବା ମିଲି ମୁସଲିମ୍ ଲିଗ୍ ସହିତ ଲିଙ୍କ୍ ଅଛି । ଆତଙ୍କବାଦୀ ଆର୍ଥିକ ସହାୟତା ମାମଲାରେ ସଇଦଙ୍କୁ ପାକିସ୍ତାନୀ କୋର୍ଟ ୩୧ ବର୍ଷ କାରାଦଣ୍ଡରେ ଦଣ୍ଡିତ କରିଛନ୍ତି । ମିଳିତ ଜାତିସଂଘ ତାକୁ ୧୦ ଡିସେମ୍ବର ୨୦୦୮ ରେ ବିଶ୍ୱ ଆତଙ୍କବାଦୀ ତାଲିକାରେ ଅନ୍ତର୍ଭୁକ୍ତ କରିଥିଲା । ଗତ ବର୍ଷ ଡିସେମ୍ବର ୨୯ ରେ ଭାରତ ପାକିସ୍ତାନକୁ ଅନେକ ଆତଙ୍କୀ ମାମଲାରେ ଖୋଜୁଥିବା ହାଫିଜ ସଇଦଙ୍କୁ ପ୍ରତ୍ୟର୍ପଣ କରିବାକୁ କହିଥିଲା । ବର୍ତ୍ତମାନ ସେ ଲାହୋରର ଏକ ଜେଲରେ ଅଛି ।
