ପ୍ୟାରିସ୍‌, ୦୮/୦୮: ଭାରୋତ୍ତୋଳନରେ ପ୍ରମୁଖ ପଦକ  ଦାବିଦାର ରହିଥିବା ଭାରତର ମୀରାବାଈ ଚାନୁ ନିରାଶ କରିଛନ୍ତି । ମହିଳା ୪୯କିଲୋ ବର୍ଗରେ ସେ ୧୯୯ କିଲୋ  (ସ୍ନାଚ୍‌ରେ ୮୮, କ୍ଲିନ୍‌ ଏଣ୍ଡ୍‌ ଜର୍କରେ  ୧୧୧) ଭାର ଉଠାଇ ଚତୁର୍ଥ ସ୍ଥାନରେ  ସନ୍ତୁଷ୍ଟ ହୋଇଥିଲେ ଏବଂ ଅଳ୍ପକେ  ବ୍ରୋଞ୍ଜ ପଦକରୁ ବଞ୍ଚିତ ହୋଇଥିଲେ । କ୍ରମାନ୍ୱୟରେ ତାଙ୍କର ଦ୍ୱିତୀୟ ଅଲିମ୍ପିକ୍ସ  ପଦକ ସ୍ୱପ୍ନ ଧୂଳିସାତ୍‌ ହୋଇଯାଇଥିଲା । ଗତ ଟୋକିଓ ଅଲିମ୍ପିକ୍ସରେ ମୀରାବାଈ  ରୌପ୍ୟ ପଦକ ହାସଲ କରିଥିଲେ । 

ମୀରାବାଈ ପ୍ରଥମେ ସ୍ନାଚ୍‌ରେ  ୮୫କିଲୋରୁ ଅଭିଯାନ ଆରମ୍ଭ  କରିଥିଲେ । ଦ୍ୱିତୀୟ ପ୍ରୟାସରେ  ୮୮କିଲୋ ଉଠାଇବାରେ ବିଫଳ ହୋଇଥିଲେ । ମାତ୍ର ତୃତୀୟ ପ୍ରୟାସରେ  ୮୮କିଲୋ ଉଠାଇଥିଲେ । ଏହାପରେ  କ୍ଲିନ୍‌ ଏଣ୍ଡ୍‌ ଜର୍କରେ ସେ ପ୍ରଥମେ  ୧୧୧କିଲୋ ଓଜନ ଉଠାଇବାକୁ ନିଷ୍ପତ୍ତି  ନେଇଥିଲେ ଏବଂ ବିଫଳ ହୋଇଥିଲେ ।  ଦ୍ୱିତୀୟ ପ୍ରୟାସରେ ସଫଳତାର ସହ ୧୧୧କିଲୋ ଉଠାଇ ପଦକ ଦୌଡ଼ରେ  ରହିଥିଲେ । ମାତ୍ର ତୃତୀୟ ପ୍ରୟାସରେ  ସେ ଓଜନ ବଢ଼ାଇ ୧୧୪କିଲୋ  ରଖିଥିଲେ ଏବଂ ଏଥିରେ ବିଫଳ  ହେବା ସହ ତାଙ୍କ ପଦକ ସ୍ୱପ୍ନ ଧୂଳିସାତ୍‌  ହୋଇଯାଇଥିଲା । ବ୍ରୋଞ୍ଜ ପଦକ ହାସଲ  କରିଥିବା ଥାଇଲାଣ୍ଡର ସୁରୋଦଚନା  ଖମ୍ବାଓଙ୍କଠୁ ମାତ୍ର ୧କିଲୋ ପଛରେ  ରହିଯାଇଥିଲେ । ଚୀନର ଝିହୁଇ  ୨୦୬ କିଲୋ (୮୯ତ୍କ୧୧୭) ଉଠାଇ  ଅଲିମ୍ପିକ୍ସ ରେକର୍ଡ଼ ସହ ସ୍ୱର୍ଣ୍ଣ ପଦକ  ଜିତିଥିଲେ । ରୋମାନିଆର ମିହାଏଲା  ଭାଲେଣ୍ଟିନା କାମ୍ବେଇ ମୋଟ ୨୦୫ କିଲୋ  (୯୩ତ୍କ୧୧୨) କିଲୋ ସହ ରୌପ୍ୟ ଏବଂ  ଖମ୍ବାଓ ୨୦୦ କିଲୋ (୮୮ତ୍କ୧୧୨) ସହ  ବ୍ରୋଞ୍ଜ ଜିତିଥିଲେ ।