ନୂଆଦିଲ୍ଲୀ ୪/୯: ୟୁପିଆଇ ଆରମ୍ଭ ହେବା ପରଠୁ ଧିରେ ଧିରେ ଏହାର ବ୍ୟବହାର ବଢିବାରେ ଲାଗିଛି । ଲୋକମାନେ ପେମେଣ୍ଟ ପାଇଁ ୟୁପିଆଇକୁ ବହୁଳ ବ୍ୟବହାର କରୁଛନ୍ତି । ଯଦି ଆପଣ କେବେ ଏଥିରେ ପେମେଣ୍ଟ କରିଥିବେ ତେବେ ଏହାର ସାଉଣ୍ଡବକ୍ସ ମଧ୍ୟ ଦେଖିଥିବେ । ଏଥିରେ ପେମେଣ୍ଟର ଡିଟେଲ୍ସ ଭଏସରେ ମଧ୍ୟ ଶୁଣିବାକୁ ମିଳେ । ପେମେଣ୍ଟ ହେବା ମାତ୍ରେ ତୁରନ୍ତ ଏହା ସୂଚନା ପ୍ରଦାନ କରିଥାଏ । କହିରଖୁଛୁ ଏହି ସାଉଣ୍ଡ ବକ୍ସ କେବଳ ୟୁପିଆଇ ପେମେଣ୍ଟ ହିଁ ଗ୍ରହଣ କରୁଥିଲା । କିନ୍ତୁ ଏବେ ଏହା କ୍ରେଡିଟ୍ କାର୍ଡ ଏବଂ ଡେବିଟ୍ କାର୍ଡରୁ ପେମେଣ୍ଟ ମଧ୍ୟ ଗ୍ରହଣ କରିପାରିବ । ଏଣିକି କାର୍ଡ ସାଉଣ୍ଡବକ୍ସ ନାମକ ଏକ ନୂଆ ପିଓଏସ୍(ପଏଣ୍ଟ ଅଫ୍ ସେଲ୍) ଡିଭାଇସର ଲଞ୍ଚ୍ ସହିତ ସମ୍ଭବ ହୋଇପାରିବ । ଏହା ଏମିତି ଏକ ଡିଭାଇସ ଯାହା ୟୁପିଆଇ ଏବଂ କାର୍ଡ ପେମେଣ୍ଟ ଉଭୟକୁ ସପୋର୍ଟ କରେ । ପେଟିଏମ୍ ଏହି କାର୍ଡ ସାଉଣ୍ଡବକ୍ସ ଲଞ୍ଚ୍ କରିଦେଇଛି । ଏହାକୁ ବ୍ୟବହାର କରି ଛୋଟ ଦୋକାନୀ ମଧ୍ୟ କାର୍ଡ ପେମେଣ୍ଟ ଗ୍ରହଣ କରିପାରିବେ ଏବଂ ତାହା ପୁଣି ଗ୍ରାହକଙ୍କ କାର୍ଡ ସ୍ୱାଇପ୍ ନକରି । ଆସନ୍ତୁ ଜାଣିବା କେମିତି କାମ କରିବ ଏହି ବକ୍ସ...

କାର୍ଡ ସାଉଣ୍ଡବକ୍ସର ଟପରେ ଏକ କ୍ୟୁଆର୍ କୋଡ୍ ସ୍କାନର ଏବଂ ତଳେ ଏକ ଟ୍ୟାପ୍-ଟୁ-ପେ କାର୍ଡ ପୈଠ ଟର୍ମିନାଲ୍ ରହିଛି । ଯଦି ଗ୍ରାହକ ୟୁପିଆଇ ମାଧ୍ୟମରେ ପୈଠ କରିବାକୁ ଚାହିଁବ ତେବେ କ୍ୟୁଆର୍ କୋର୍ଡ ସ୍କାନ୍ କରିପାରିବ ଏବଂ ଯଦି କାର୍ଡ ମାଧ୍ୟମରେ ପୈଠ ଚାହିଁବ ତେବେ କାର୍ଡ ଟର୍ମିନାଲରେ ଟ୍ୟାପ୍ କରିପାରିବ । ପେଟିଏମର କହିବାନୁସାରେ ଏହି ଡିଭାଇସ୍ ରୂପେ, ଭିସା ଏବଂ ମାଷ୍ଟରକାର୍ଡ ମାଧ୍ୟମରେ କଣ୍ଟାକ୍ଟଲେସ୍ ପେମେଣ୍ଟ ସପୋର୍ଟ କରିବ ।

ଡିଭାଇସରେ ଏକ ଇଣ୍ଟରନାଲ୍ ଫିଜିକାଲ୍ କିପ୍ୟାଡ୍ ଏବଂ ଆମାଉଣ୍ଟ ଦେଖାଉଥିବା ଡିସପ୍ଲେ ଦିଆଯାଇଛି । ଏହାକୁ ପେଟିଏମ୍ ଫର୍ ବିଜନେସ୍ ଆପ୍ ସହିତ ଇଣ୍ଟିଗ୍ରେଟ୍ କରାଯାଇଛି ଯାହା ଫଳରେ ଦୋକାନୀ ନେଣଦେଣକୁ ସହଜରେ ଟ୍ରକ୍ କରିପାରିବେ । ପେଟିଏମ୍ କାର୍ଡ ସାଉଣ୍ଡବକ୍ସରେ ୪ଜି କନେକ୍ଟିଭିଟି ଏବଂ  ୫ ଦିନ ପର୍ଯ୍ୟନ୍ତ ଚାଲୁଥିବା ବ୍ୟାଟେରୀ ଲାଇଫ୍ ଅଫର କରାଯାଇଛି । ଅନ୍ୟ ସାଉଣ୍ଡବକ୍ସ ଉପକରଣ ଭଳି ଏହା ମଧ୍ୟ ପେମେଣ୍ଟ ପୁରା ହେଲେ ଅଡିଓ ମାଧ୍ୟମରେ ସୂଚନା ଦେବ । ଏହା ୧୧ ଭାରତୀୟ ଭାଷାକୁ ସପୋର୍ଟ କରିବ ଏବଂ ଏହାର ଦାମ୍ ୯୯୯ ଟଙ୍କାରୁ ଆରମ୍ଭ ହୋଇଥାଏ ।