ନୂଆଦିଲ୍ଲୀ,୦୮/୦୯: ମୁଦ୍ରାସ୍ଫୀତି ଯୋଗୁଁ ଲୋକେ ହନ୍ତସନ୍ତ; ଆସନ୍ତା ୧୦ ମାସ ମଧ୍ୟରେ ଲୋକସଭା ଠାରୁ ଅଧା ଡଜନରୁ ଅଧିକ ରାଜ୍ୟରେ ବିଧାନସଭା ନିର୍ବାଚନ ହେବ। ଏଭଳି ପରିସ୍ଥିତିରେ ଜନସାଧାରଣଙ୍କୁ ଆଶ୍ବସ୍ତି ଯୋଗାଇବା ପାଇଁ ବଡ଼ ନିଷ୍ପତ୍ତି ନିଆଯାଉଛି। ନିକଟରେ ଏଲପିଜି ମୂଲ୍ୟରେ ହଠାତ୍ ବଡ଼ ହ୍ରାସ ଘଟିଥିଲା। ବର୍ତ୍ତମାନ ଜନସାଧାରଣ ପେଟ୍ରୋଲ-ଡିଜେଲ ମୂଲ୍ୟରେ ହ୍ରାସ ପାଇବାକୁ ଆଶାବାନ୍ଧି ବସିଛନ୍ତି। ଯଦିଓ ପେଟ୍ରୋଲ ଏବଂ ଡିଜେଲ ଦର ହ୍ରାସ ନେଇ ସରକାର କୌଣସି ସୂଚନା ଦେଇନାହାଁନ୍ତି। କିନ୍ତୁ ଘରୋଇ ଦଲାଲ ସଂସ୍ଥା ଜେଏମ ଫାଇନାନସିଆଲ ଆକଳନ କରିଛି ଯେ, ପେଟ୍ରୋଲ ଏବଂ ଡିଜେଲର ମୂଲ୍ୟ ଲିଟର ପିଛା ୩ ରୁ ୫ ଟଙ୍କା ହ୍ରାସ କରାଯାଇ ଦିପାବଳୀ ସମୟରେ ଘୋଷଣା କରାଯାଇପାରେ। ଯଦି ଏହା ଘଟେ ତେବେ ଜନସାଧାରଣୁ ଏକ ବଡ଼ ଆଶ୍ବସ୍ତି ମିଳିବାକୁ ଯାଉଛି।
ସୂଚନାଥାଉକି, ନଭେମ୍ବରରୁ ଡିସେମ୍ବର ମଧ୍ୟରେ ୫ ଟି ରାଜ୍ୟରେ ବିଧାନସଭା ନିର୍ବାଚନ ହେବାକୁ ଯାଉଛି। ଏହା ପରେ ଆସନ୍ତା ବର୍ଷ ଲୋକସଭା ନିର୍ବାଚନ ମଧ୍ୟ ହେବ। ଏଭଳି ପରିସ୍ଥିତିରେ ନିର୍ବାଚନରେ ମୁଦ୍ରାସ୍ଫୀତି ଏକ ବଡ଼ ପ୍ରସଙ୍ଗ ହୋଇପାରେ ବୋଲି ସରକାର ଆଶଙ୍କା କରୁଛନ୍ତି। ତେଣୁ ପାର୍ବଣ ଋତୁରେ ପେଟ୍ରୋଲ ଏବଂ ଡିଜେଲ ମୂଲ୍ୟରେ ହ୍ରାସ ଘୋଷଣା କରାଯାଇପାରେ। ଦଲାଲ ସଂସ୍ଥା ଅନୁଯାୟୀ ସରକାର ପେଟ୍ରୋଲ ଏବଂ ଡିଜେଲ ଉପରେ ଏକ୍ସାଇଜ୍ ଡ୍ୟୁଟି କିମ୍ବା ଭାଟ୍ ହ୍ରାସ କରିପାରନ୍ତି। ତେବେ ଏହା ସରକାରୀ ରାଜକୋଷ ଉପରେ ଭାର ବଢ଼ଇବା ନିଶ୍ଚିତ। କାରଣ ଅଶୋଧିତ ତୈଳର ମୂଲ୍ୟ ପ୍ରାୟ ୧୦ ମାସର ସର୍ବୋଚ୍ଚ ସ୍ତରରେ ଅଛି। ଏହି କାରଣରୁ ଋଷ ଏବଂ ସାଉଦି ଆରବ ବର୍ଷ ଶେଷ ପର୍ଯ୍ୟନ୍ତ ତୈଳ ଉତ୍ପାଦନ ହ୍ରାସ କରିବେ। ବର୍ତ୍ତମାନ ଅଶୋଧିତ ତୈଳ ବ୍ୟାରେଲ ପିଛା ୯୦ ଡଲାରରେ ପହଞ୍ଚିଛି।
ସୂଚନାଯୋଗ୍ୟ, ଗତ ସପ୍ତାହରେ କେନ୍ଦ୍ର ସରକାର ୧୪.୨ କିଲୋଗ୍ରାମ ଏଲପିଜି ସିଲିଣ୍ଡର ମୂଲ୍ୟରେ ୨୦୦ ଟଙ୍କା ହ୍ରାସ କରିବାକୁ ଘୋଷଣା କରିଥିଲେ। ଏହାରି ଭିତରେ ମୁଦ୍ରାସ୍ଫୀତି ହାର ମଧ୍ୟ ସରକାରଙ୍କ ପାଇଁ ଏକ ଚ୍ୟାଲେଞ୍ଜ ହୋଇ ରହିଛି। ଜୁଲାଇରେ ଖୁଚୁରା ମୁଦ୍ରାସ୍ଫୀତି ହାର ୭.୪୪% ରେକର୍ଡ କରାଯାଇଥିଲା। ଯାହା ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (ଆରବିଆଇ) ର ୪ ରୁ ୬ ପ୍ରତିଶତ ସୀମା ବାହାରେ। କିନ୍ତୁ ସରକାର ଯେଉଁଭଳି ଭାବରେ ଏଲପିଜି ମୂଲ୍ୟ ହ୍ରାସ କରିଛନ୍ତି, ପେଟ୍ରୋଲ ଏବଂ ଡିଜେଲ ମୂଲ୍ୟରେ ହ୍ରାସ ହେବାର ସମ୍ଭାବନା ମଧ୍ୟ ବୃଦ୍ଧି ପାଇଛି।
ତେବେ ଅଗଷ୍ଟରେ ଖୁଚୁରା ମୁଦ୍ରାସ୍ଫୀତି ଦର ହ୍ରାସ ପାଇବ ବୋଲି ଆଶା କରାଯାଉଛି। କାରଣ ଟମାଟୋ ସହିତ ଅନ୍ୟ ପନିପରିବାର ମୂଲ୍ୟ ଟିକେ ହ୍ରାସ ପାଇଛି। ଯଦି ଆମେ ବର୍ତ୍ତମାନ ପେଟ୍ରୋଲ ଏବଂ ଡିଜେଲର ମୂଲ୍ୟକୁ ଦେଖିବା, ତେବେ ଦିଲ୍ଲୀରେ ପେଟ୍ରୋଲ ଲିଟର ପିଛା ୯୬.୭୨ ଟଙ୍କାରେ ବିକ୍ରି ହେଉଥିବାବେଳେ ଡିଜେଲ ଲିଟର ପିଛା ୮୯.୬୨ ଟଙ୍କାରେ ବିକ୍ରି ହେଉଛି। ଏଭଳି ପରିସ୍ଥିତିରେ ଯଦି ଏକ ଲିଟର ପିଛା ମୂଲ୍ୟ ୩ ରୁ ୫ ଟଙ୍କା କମ୍ ହୁଏ, ତେବେ ଏହା ଜନସାଧାରଣଙ୍କ ପାଇଁ ଏକ ବଡ଼ ଉପହାର ହେବ।
You can also read:
