ଭୁବନେଶ୍ୱର,୨୦/୦୯: କମିଶନରେଟ୍‌ ପୁଲିସ ପକ୍ଷରୁ ସର୍ବସାଧାରଣ ସ୍ଥାନରେ ମଦ୍ୟପାନ ବିରୋଧରେ ଧରପଗଡ଼ ଅଭିଯାନକୁ କଡ଼ାକଡ଼ି କରାଯାଇଛି । ବୁଧବାର ରାତିରେ ବିଭିନ୍ନ ଥାନା ଅଞ୍ଚଳରେ ଥିବା  ମଦ୍ୟପ ଖଟିରେ ଚଢ଼ଉ କରାଯାଇ ୮୩ ମଦ୍ୟପଙ୍କୁ ଅଟକ ରଖାଯାଇଛି । ୬୯ ଜଣଙ୍କଠାରୁ ୩୪ ହଜାର  ୫୦୦ ଟଙ୍କା ଜରିମାନା ଆଦାୟ କରାଯାଇଛି ।  

କମିଶନରେଟ୍‌ ପୁଲିସ ପକ୍ଷରୁ ମିଳିଥିବା  ସୂଚନା ଅନୁଯାୟୀ, ସର୍ବସାଧାରଣ ସ୍ଥାନରେ  ମଦ୍ୟପାନ, ବିଭିନ୍ନ ଖଟି ତଥା ଯାନବାହନ  ଯାଞ୍ଚ କରାଯିବା ସହିତ ଅନ୍ୟାନ୍ୟ ଅପରାଧିକ  କାର୍ଯ୍ୟକଳାପ ବିରୋଧରେ ଧରପଗଡ଼ କରାଯାଇ  ଆଇନ ଉଲ୍ଲଙ୍ଘନକାରୀଙ୍କ ଠାରୁ ଜରିମାନା ଆଦାୟ  କରାଯାଉଛି । ଏହିକ୍ରମରେ ଗତକାଲି ସନ୍ଧ୍ୟାରେ  କ୍ୟାପିଟାଲ ଥାନା, ଖାରବେଳନଗର ଥାନା,  ଭରତପୁର ଥାନା, ଲକ୍ଷ୍ମୀସାଗର ଥାନା, ବଡ଼ଗଡ଼ ଥାନା,  ମୈତ୍ରୀବିହାର ଥାନା, ଖଣ୍ଡଗିରି ଥାନା, ସହିଦନଗର  ଥାନା, ନୟାପଲ୍ଲୀ ଥାନା ଓ ଚନ୍ଦ୍ରଶେଖରପୁର ଥାନା  ତରଫରୁ ବିଭିନ୍ନ ସ୍ଥାନରେ ମିଳିତ ଭାବେ ଧରପଗଡ  କରାଯାଇଥିଲା । ଏହି ଧରପଗଡ଼ ଅଭିଯାନ  ସମୟରେ ମୋଟ ୮୩ ଜଣ ନିୟମ ଖିଲାପକାରୀଙ୍କୁ  ବିଭିନ୍ନ ଥାନାରେ ଅଟକ ରଖାଯାଇଥିଲା । ଓଡ଼ିଶା  ସହରାଞ୍ଚଳ ପୁଲିସ ଆଇନ୍‌ ଅନୁଯାଇ ୬୯ ଜଣଙ୍କ  ନିକଟରୁ ମୋଟ ୩୪ ହଜାର ୫୦୦ଟଙ୍କା ଜରିମାନା  ଆଦାୟ କରାଯାଇଥିଲା । ଭୁବନେଶ୍ୱର ସହରାଞ୍ଚଳ  ପୁଲିସ ତରଫରୁ ଏହିଭଳି ଧରପଗଡ ଅଭିଯାନ ଆଗକୁ ମଧ୍ୟ ନିୟମିତ ଭାବେ ଜାରିରହିବ ବୋଲି  କମିଶନରେଟ୍‌ ପୁଲିସ ପକ୍ଷରୁ କୁହାଯାଇଛି।