ବାରିପଦା,୨୪/୦୫: ଆସନ୍ତା ୨୯ ତାରିଖ ବୁଧବାର ବାରିପଦା ଗସ୍ତରେ ଆସୁଛନ୍ତି ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦି । ମୟୂରଭଞ୍ଜ ଜିଲ୍ଲାରେ କରଞ୍ଜିଆ ବିଧାନସଭା ଆସନ ବ୍ୟତୀତ ମୟୂରଭଞ୍ଜ ଲୋକସଭା ସମେତ ଅନ୍ୟ ୮ଟି ବିଧାନସଭା ଆସନରେ ଆସନ୍ତା ଜୁନ୍ ୧ ରେ ମତଦାନ ଥିବାରୁ ଦଳୀୟ ପ୍ରାର୍ଥୀଙ୍କ ବିଜୟ ସୁନିଶ୍ଚିତ କରିବାକୁ ପ୍ରଚାର ପାଇଁ ପ୍ରଧାନମନ୍ତ୍ରୀ ଆସୁଥିବା ନେଇ ସୂଚନା ମିଳିଛି । ଶେଷ ମୁହୂର୍ତ୍ତରେ ମୋଦୀଙ୍କ କାର୍ଯ୍ୟକ୍ରମ ବାରିପଦାରେ ହେବାକୁ ଥିବା ନେଇ ସ୍ଥିର ହୋଇଥିବା ନିର୍ଭର ଯୋଗ୍ୟ ସୂତ୍ରରୁ ସୂଚନା ମିଳିଥିବା ବେଳେ କାର୍ଯ୍ୟକ୍ରମର ସବିଶେଷ ବିବରଣୀ ମିଳିପାରିନାହିଁ ।
ଏଠାରେ ଉଲ୍ଲେଖଯୋଗ୍ୟ ଯେ ୨୦୧୯ ନିର୍ବାଚନ ପୂର୍ବରୁ ଜାନୁଆରୀ ୫ ରେ ପ୍ରଧାନମନ୍ତ୍ରୀ ମୋଦି ବାରିପଦା ଗସ୍ତରେ ଆସିଥିଲେ । ମୋଦୀଙ୍କ ଗସ୍ତ ଫଳରେ ମୟୂରଭଞ୍ଜ ଜିଲ୍ଲାରେ ୯ ଟି ବିଧାନସଭା ମଧ୍ୟରୁ ୬ ଟି ବିଧାନସଭାରେ ବିଜେପି ବିଜୟ ଲାଭ କରିଥିବା ବେଳେ ମୟୂରଭଞ୍ଜ ସାଂସଦ ମଧ୍ୟ ବିଜୟ ଲାଭ କରିଥିଲେ । ଏଥର ସାରା ଓଡ଼ିଶାରେ ପରିବର୍ତ୍ତନର ଧାରା ଚାଲୁଥିବାରୁ ଜିଲ୍ଲାରେ କିଭଳି ସବୁ ଆସନରେ ବିଜେପି ପ୍ରାର୍ଥୀଙ୍କ ବିଜୟ ହେବ ଏବଂ ଓଡ଼ିଶାରେ ଡବଲ ଇଞ୍ଜିନ ସରକାର ହେବ ସେ ନେଇ ନେତା ଓ କର୍ମୀଙ୍କ ମନୋବଳ ବୃଦ୍ଧି କରିବା ସହିତ ଜିଲ୍ଲାବାସୀ ଙ୍କୁ ଉଦବୋଧନ ଦେବେ ।
ସୂଚନା ଯୋଗ୍ୟ ଯେ, ତା ପୂର୍ବରୁ ଶନିବାର ୨୫ ତାରିଖରେ କେନ୍ଦ୍ରଗୃହମନ୍ତ୍ରୀ ତଥା ବିଜେପିର ଚାଣକ୍ୟ ଅମିତ୍ ଶାହଙ୍କ ମୟୂରଭଂଜ ଗସ୍ତ କାର୍ଯ୍ୟକ୍ରମ ରହିଛି । ସୂଚନା ମୁତାବକ ଶ୍ରୀ ଶାହ ହେଲିକପଟର ଯୋଗେ ଭୁବନେଶ୍ୱର ବିଜୁ ପଟ୍ଟନାୟକ ବିମାନ ବନ୍ଦରରୁ ଶନିବାର ଦିବା ସାଢ଼େ ଦଶଟା ସମୟରେ ବାହାରି ବାରିପଦା ପୁଲିସ୍ ପରେଡ ପଡ଼ିଆ ଠାରେ ଦିବା ସାଢ଼େ ୧୧ ଟା ସମୟରେ ପହଞ୍ଚିବେ। ସେଠାରୁ କାର ଯୋଗେ ଐତିହାସିକ ଛଉ ପଡ଼ିଆ ଠାରେ ପହଞ୍ଚି ବିଶାଳ ଜନସଭାକୁ ସମ୍ବୋଧିତ କରିବେ ।