ବାଲେଶ୍ୱର, ୨୬/୧ : ଏବେ ସବୁ କ୍ଷେତ୍ରରେ ଓଡ଼ିଶାର ବିକାଶ ଯାତ୍ରା ଜାରି ରହିଛି। ଶିକ୍ଷା, ସ୍ୱାସ୍ଥ୍ୟ ଠାରୁ ଆରମ୍ଭ କରି ଗମନାଗମନ ପର୍ଯ୍ୟନ୍ତ, ସବୁ କ୍ଷେତ୍ରରେ ଓଡ଼ିଶା ସ୍ଥିତି ଭଲ ରହିଛି। ଆଗାମୀ ଦିନରେ ରାଜ୍ୟର ଏହି ପ୍ରଗତିର ରଥକୁ ଆଗକୁ ନେଇ ଦେଶରେ ଓଡ଼ିଶାକୁ ପ୍ରଥମ କରିବା ପାଇଁ ଯେଉଁ ଲକ୍ଷ୍ୟ ରଖାଯାଇଛି, ସେଥିରେ ରାଜ୍ୟବାସୀ ସାମିଲ ହୁଅନ୍ତୁ ବୋଲି ଶୁକ୍ରବାର ସ୍ଥାନୀୟ ପୁଲିସ ରିଜର୍ଭ ପୁଲିସ ପଡିଆରେ ଅନୁଷ୍ଠିତ ୭୫ତମ ଜିଲ୍ଲା ସ୍ତରୀୟ ସାଧାରଣତନ୍ତ୍ର ପାଳନ ଅବସରରେ ସମବେତ ଜନତାଙ୍କୁ ଉଦବୋଧନ ଦେଇ ମନ୍ତ୍ରୀ ବାସନ୍ତୀ ହେମ୍ବ୍ରମ ଏହା କହିଛନ୍ତି। 

ଏହି ଅବସରରେ ସେ ରାଜ୍ୟର ସଫଳତା ଉପରେ ଆଲୋଚନା କରିଥିଲେ। ଶିଶୁ ମୃତ୍ୟୁହାର ହ୍ରାସଠାରୁ ଟିକାକରଣ ପର୍ଯ୍ୟନ୍ତ ସବୁ କ୍ଷେତ୍ରରେ ଓଡ଼ିଶାର ସ୍ଥିତି ଅନ୍ୟ ରାଜ୍ୟ ଠାରୁ ଭଲ ଅଛି। ବିଶେଷ କରି ୫-ଟିରେ ଶିକ୍ଷା ଭିତ୍ତିଭୂମିର ବିକାଶ ହୋଇଛି ବୋଲି ସେ କହିଥିଲେ। ଏହା ବ୍ୟତୀତ ସ୍ୱାଧୀନତା ସଂଗ୍ରାମ କ୍ଷେତ୍ରରେ ଅବିଭକ୍ତ ବାଲେଶ୍ୱର ଜିଲ୍ଲାର ଅବଦାନ ଉପରେ ଆଲୋଚନା କରିଥିଲେ। ଓଡ଼ିଶା ଭାଷା ଆନ୍ଦୋଳନରେ ଫକୀରମୋହନ ସେନାପତି, ରାଧାନାଥ ରାୟ, ଲକ୍ଷ୍ମୀକାନ୍ତ ମହାପାତ୍ରଙ୍କ ସ୍ମୃତିଚାରଣ କରିଥିଲେ। 

ଏହି କାର୍ଯ୍ୟକ୍ରମରେ ଜିଲ୍ଲାପାଳ ଦତ୍ତାତ୍ରୟ ଭାଉ ସାହେବ ଶିନ୍ଦେ, ଏସପି ସାଗରିକା ନାଥ, ଏଡିଏମ ସୁଧାକର ନାୟକଙ୍କ ସମେତ ଜିଲ୍ଲା ସ୍ତରୀୟ ଅଧିକାରୀ ଉପସ୍ଥିତ ଥିଲେ।  ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ ଭବାନୀ ଶଙ୍କର ଭୂୟାଁ ଏହି କାର୍ଯ୍ୟକ୍ରମ ପରିଚାଳନା କରିଥିଲେ।