ରାୟଗଡ଼ା,୨୯/୦୨: ସାଧାରଣ ନିର୍ବାଚନ ଯେତିକି ପାଖଉଛି, ଆଶାୟୀଙ୍କ ହୃଦ୍କମ୍ପନ ସେତିକି ବଢିବାରେ ଲାଗିଛି । ଏହି କ୍ରମରେ ବୁଧବାର କୋରାପୁଟ ସାଂସଦ ସପ୍ତଗିରି ଶଙ୍କର ଉଲ୍ଲାକା ଏଆଇସିସି ସଭାପତି ମଲିକାର୍ଜୁନ ଖଡ୍ଗେଙ୍କୁ ସାକ୍ଷାତ କରିଛନ୍ତି । ତାଙ୍କୁ ରାୟଗଡ଼ା ଓ କୋରାପୁଟ ଜିଲ୍ଲା ଆସିବା ପାଇଁ ନିମନ୍ତ୍ରଣ ଦେଇଛନ୍ତି । ଖଡ୍ଗେଙ୍କ ସହିତ ଏହି ସାକ୍ଷାତ ଆଲୋଚନା ପରେ କୋରାପୁଟ ସଂସଦୀୟ କ୍ଷେତ୍ର ପାଇଁ ସପ୍ତଗିରିଙ୍କ ଟିକଟ ଚୂଡାନ୍ତ ହୋଇଥିବା ସୂଚନା ମିଳିଛି । ଯେଉଁମାନେ ଅନଲାଇନ ଆବେଦନ କରିଥିଲେ, ସମସ୍ତଙ୍କୁ ପଛରେ ପକାଇ ସପ୍ତଗିରିଙ୍କ ଉପରେ ମୋହର ଲଗାଇଛନ୍ତି ଦଳୀୟ ହାଇକମାଣ୍ଡ ।
ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ରାୟଗଡ଼ା ବିଧାନସଭା ଆସନରେ ଆପଲାସ୍ୱାମୀ କାଡ୍ରାକା ଓ ବିଷମକଟକ ଆସନରେ ନୀଳମାଧବ ହିକକାଙ୍କୁ ଦଳ ଫାଇନାଲ୍ କରିଛି । ଦଳ ତରଫରୁ ଏହି ତିନି ଜଣକୁ ସବୁଜ ସଙ୍କେତ ଦିଆଯିବା ସହ ପ୍ରଚାର ପାଇଁ ମୈଦାନକୁ ଓହ୍ଲାଇବାକୁ ନିର୍ଦ୍ଦେଶ ଦିଆଯାଇଛି । ଗୁଣପୁର ଆସନରେ ପ୍ରାର୍ଥୀ ଚୟନ ହୋଇନାହିଁ । ଅନେକ ଆଶାୟୀ ରହିଥିବାରୁ ଦଳୀୟ ନେତୃତ୍ୱ ଦ୍ୱନ୍ଦ୍ୱରେ ପଡିଛନ୍ତି । ଗମାଙ୍ଗ ପରିବାରର ଜଣଙ୍କୁ ଟିକଟ ପାଇଁ ଛକାପଞ୍ଝା ଲାଗି ରହିଛି । ତଥାପି ଖୁବ୍ଶୀଘ୍ର ଏଠାରେ ପ୍ରାର୍ଥୀଙ୍କ ନାମ ଘୋଷଣା କରାଯିବ। ଦଳ ତରଫରୁ କିନ୍ତୁ କେହି ଏ ସମ୍ପର୍କରେ କୌଣସି ମତାମତ ଦେବାକୁ ରାଜି ହୋଇନାହାନ୍ତି । ସୂଚନାଥାଉକି, ଆପଲାସ୍ୱାମୀ ଓ ନୀଳମାଧବଙ୍କୁ ୨୦୧୯ ନିର୍ବାଚନରେ ଦଳ ତରଫରୁ ପ୍ରାର୍ଥୀ କରାଯାଇଥିଲା । ଉଭୟ ପରାସ୍ତ ହୋଇଥିଲେ । ତଥାପି ଦଳ ସେମାନଙ୍କ ଉପରେ ପୁନର୍ବାର ଆସ୍ଥା ପ୍ରକଟ କରି ପ୍ରାର୍ଥୀ କରିବାକୁ ମନସ୍ଥ କରିଛି । ନୀଳମାଧବ ହେଉଛନ୍ତି ବିଷମକଟକର ପୂର୍ବତନ ବ୍ଲକ ଅଧ୍ୟକ୍ଷ ।