କଣ୍ଟାବାଞ୍ଜି,୧୪/୦୮ : ନିଜ ପଦବି ବଞ୍ଚାଇବାକୁ ଯାଇ ଜଣେ ଜନପ୍ରତିନିଧି କେଉଁସ୍ତରକୁ ଖସି ଯାଆନ୍ତି, ତାର ଏକ ନିଚ୍ଛକ ଚିତ୍ର ଦେଖିବାକୁ ମିଳିଛି ଏକ ଭାଇରାଲ ଭିଡିଓରୁ । ଭିଡିଓଟି ରାତି ସମୟର ହୋଇଥିବା ବେଳେ ସେଠାରେ କେତେକ ଲୋକ ଭୋଜିଭାତ ଖାଉଥିବା ଏବଂ ଜଣେ ଲୋକ ମୁଣ୍ଡିଆ ମାରୁଥିବା ଦେଖିବାକୁ ମିଳିଛି । ଏହାର ଖୋଳତାଡ଼ କରିବାରୁ ଜଣାପଡ଼ିଲା ଯେ, ମୁଣ୍ଡିଆ ମାରୁଥିବା ବ୍ୟକ୍ତି ଜଣକ ହେଲେ ବଲାଙ୍ଗିର ଜିଲ୍ଲା ତୁରେକେଲା ବ୍ଲକ ବଡ଼ବାଙ୍କି ପଞ୍ଚାୟତର ସରପଞ୍ଚ ଡୋଳାଧର ବାଗ୍ ଏବଂ ଭୋଜିଭାତ ଖାଉଥିବା ବ୍ୟକ୍ତିମାନେ ହେଲେ ସେହି ପଞ୍ଚାୟତର ୱାଡ୍ର୍ ମେମ୍ବରମାନେ । ସରପଞ୍ଚ ଜଣକ ଭୂଇଁତଳେ ଶୋଇପଡ଼ି ସାଷ୍ଟାଙ୍ଗ ମୁଣ୍ଡିଆ ମାରି କ୍ଷମା ମାଗୁଥିବା ବେଳେ ୱାର୍ଡ୍ ସଭ୍ୟମାନେ ତାଙ୍କୁ ଉଠାଇଥିଲେ । ଆଗାମୀ ଦିନରେ ଏହି ବିଷୟରେ ଆଲୋଚନା କରିବା ବୋଲି ୱାର୍ଡର ସଭ୍ୟମାନେ ସରପଞ୍ଚଙ୍କୁ ଆଶ୍ୱାସନା ଦେଉଥିବା ଶୁଣିବାକୁ ମିଳିଛି ।
କଥାଟା ଏମିତି, ବଡ଼ବାଙ୍କି ସରପଞ୍ଚ ୱାର୍ଡସଭ୍ୟମାନଙ୍କୁ ଅଣଦେଖା କରି ମନମାନି କାମ କରୁଥିବା ଅଭିଯୋଗ ହୋଇଛି । ଏନେଇ ୱାର୍ଡ୍ସଭ୍ୟମାନେ ସରପଞ୍ଚଙ୍କ ବିରୋଧରେ ଜିଲ୍ଲାପାଳଙ୍କଠାରେ ଅନାସ୍ଥା ପ୍ରସ୍ତାବ ପାଇଁ ଆବେଦନ କରିଛନ୍ତି । ଏହି ଖବର ପାଇବା ପରେ ସରପଞ୍ଚଙ୍କ ଅକଲ ଗୁଡୁମ । କୌଣସି ମତେ ଅସନ୍ତୁଷ୍ଟ ୱାଡ୍ର୍ମେମ୍ବର ମାନଙ୍କୁ ମନାଇବା ପାଇଁ ସେ ଲାଗିପଡିଛନ୍ତି । ଅନାସ୍ଥାରୁ ବର୍ତ୍ତିବା ତଥା ନିଜ ପଦବିକୁ ବଞ୍ଚାଇବା ପାଇଁ ସେ କାକୁତି ମିନତି ହୋଇଛନ୍ତି । ଏଥିପାଇଁ ସରପଞ୍ଚ ଏକ ଭୋଜି ଆୟୋଜନ କରିବା ସହ ‘ଅନାସ୍ଥା ପ୍ରସ୍ତାବ ବନ୍ଦ କରନ୍ତୁ ନହେଲେ ମୋ ସପକ୍ଷରେ ଭୋଟ୍ ଦିଅନ୍ତୁ’ ବୋଲି ୱାର୍ଡମ୍ବେରମାନଙ୍କୁ ମୁଣ୍ଡିଆ ମାରିଥିବା ଭାଇରାଲ ଭିଡିଓରେ ଦେଖିବାକୁ ମିଳିଛି । ଏନେଇ ସରପଞ୍ଚ ଶ୍ରୀ ବାଗ୍ଙ୍କୁ ପଚାରିବାରୁ ଏହା ଏକ ପୁରୁଣା ଭିଡିଓ । ପଞ୍ଚାୟତ ନିର୍ବାଚନ ସମୟର ଭିଡିଓ, ଯାହା ଏବେ ଭାଇରାଲ କରାଯାଉଛି । ତାଙ୍କ ବିରୋଧରେ ଷଡ଼ଯନ୍ତ୍ର କରାଯାଉଥିବା କହିଛନ୍ତି । ଅନ୍ୟପକ୍ଷେ, ଉକ୍ତ ଭିଡିଓଟି ବର୍ତ୍ତମାନ ସମୟର । ୱାର୍ଡ ସଭ୍ୟସଭ୍ୟାଙ୍କୁ ଭୂତାଇବାକୁ ଭୋଜି ଆୟୋଜନ କରାଯାଇଥିବା ୱାର୍ଡ୍ସଭ୍ୟ ଯଦୁମଣି ଭୋଇ, ୱାର୍ଡ୍ସଭ୍ୟା ବିଳାସ ମାଝି ସମେତ ଅନ୍ୟମାନେ କହିଛନ୍ତି ।
