ଭୁବନେଶ୍ୱର,୨୦/୦୯: ରାଜ୍ୟ ଚଳଚ୍ଚିତ୍ର ଓ ଟେଲି ପୁରସ୍କାରକୁ ଗ୍ରହଣ ଗ୍ରାସିଛି । ଏ ପୁରସ୍କାର ଏବେ ଅନ୍ଧାରରେ । ୨୦୨୦ ମସିହାରୁ ଦିଆଯାଇନାହିଁ । ଗତବର୍ଷ ଅଗଷ୍ଟରେ ଏକାବେଳେ ୩ ବର୍ଷ ପାଇଁ ୨୦୨୦-୨୧-୨୨ ମସିହା ପର୍ଯ୍ୟନ୍ତ ୩୨, ୩୩ ଓ ୩୪ତମ ରାଜ୍ୟ ଚଳଚ୍ଚିତ୍ର ଲାଗି ବିଜ୍ଞପ୍ତି ପ୍ରକାଶ ପାଇଥିଲା । ଏହାର ୨ ମାସ ପରେ ୯, ୧୦ ଓ ୧୧ତମ ଟେଲି ପୁରସ୍କାର ଲାଗି ବିଜ୍ଞପ୍ତି ପ୍ରକାଶ ପାଇଥିଲା। ଏବେ ଚଳଚ୍ଚିତ୍ର ଆବେଦନ ବିଜ୍ଞପ୍ତିକୁ ବର୍ଷେ ପୂରିବାକୁ ଦିନେ ବାକି ଅଛି । କିନ୍ତୁ ଏଯାଏ ୩ରୁ ଗୋଟିଏ ବର୍ଷର ଉତ୍ସବ ବି ହୋଇପାରିଲାନି । ୨୦୨୪ ସରିବାକୁ ବସିଲାଣି ।
୨୦୨୩ ଅଗଷ୍ଟ ୨୧ରେ ଚଳଚ୍ଚିତ୍ର ପୁରସ୍କାର ଲାଗି ବିଜ୍ଞପ୍ତି ପ୍ରକାଶ ପାଇଥିଲା । ଗତବର୍ଷ ସେପ୍ଟେମ୍ବର ୨୦ ଆବେଦନର ଶେଷ ତାରିଖ ଥିଲା । ସୂଚନା ମୁତାବକ³ ପୁରସ୍କାର ପାଇଁ ପ୍ରାୟ ୪୭ ସିନେମା ଆବେଦନ ହୋଇଥିଲା । ଉପରୁ ନିର୍ଦ୍ଦେଶ ଥିଲା³ ଚଳଚ୍ଚିତ୍ର ଚୟନ ପାଇଁ ଯୋଗ୍ୟ ଜୁରୀଙ୍କୁ ନେଇ ଶୀଘ୍ର ପୁରସ୍କାର ବିତରଣ ଉତ୍ସବ ନିରପେକ୍ଷତା ଓ ସ୍ୱଚ୍ଛତାର ସହ ଶେଷ କର । ବାରମ୍ବାର ଜୁରୀ ହୋଇ ଅଡ଼ୁଆ କରୁଥିବା ଲୋକଙ୍କୁ ବାଦ୍ ଦେବା ସହ କୌଣସି ଅଘଟଣକୁ ବରଦାସ୍ତ କରାଯିବନି ବୋଲି କୁହାଯାଇଥିଲା ।
ସେହି ହିସାବରେ ସଂସ୍କୃତି ନିର୍ଦ୍ଦେଶାଳୟ ସବୁ କାର୍ଯ୍ୟ ତତ୍ପରତାର ସହ କଲା । ଜୁରୀ ଗଠନ ସହ ପୁରସ୍କାର ଚୟନ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ତତ୍ତ୍ୱାବଧାନରେ ହେଲା । ଓଡ଼ିଶା ଚଳଚ୍ଚିତ୍ର ଉନ୍ନୟନ ନିଗମ(ଓଏଫ୍ଡିସି) କଟକସ୍ଥିତ ପ୍ରେକ୍ଷାଳୟରେ ଜୁରୀମାନେ ସିନେମା ଦେଖି ପୁରସ୍କାର ବାଛିଲେ । କିନ୍ତୁ ଯାହା ନିଷ୍ପତ୍ତି ନେଲେ, ତାହା ଆଜି ଯାଏ ଜଉ ମୁଦ ଲଫାପା ଭିତରେ ମୁଦି ହୋଇପଡ଼ିଛି । ପୁରସ୍କାର ସେମିତି ଅଧାପନ୍ତରିଆ ହୋଇପଡ଼ିଛି, ଦିଆଯାଇପାରୁନି ।
ସେହିପରି ରାଜ୍ୟ ଟେଲି ପୁରସ୍କାର ପାଇଁ ବିଜ୍ଞପ୍ତି ବାହାରି ଆବେଦନ ହୋଇଛି । କିନ୍ତୁ ବିଡ଼ମ୍ବନା ଏବଂ ଦୁର୍ଭାଗ୍ୟ ଯେ, ଜୁରୀ କମିଟି ଗଢ଼ା ହୋଇପାରୁନି କି ତା’ର ସ୍କ୍ରିନିଂ ହୋଇ ପୁରସ୍କାର ବଛା ଯାଇପାରୁନି । ଘଟଣାକୁ ସଂସ୍କୃତି ବିଭାଗ ଗୁରୁତର ସହ ନେଉନି । ଫଳରେ ଆବେଦନ ହୋଇ ଡାଟା କରପ୍ଟ ହେଲାଣି କି କ’ଣ ଭଗବାନକୁ ଜଣା । ୩ ବର୍ଷ ଲାଗି ପାଖାପାଖି ୩୬ରୁ ୪୦ଟି ଟେଲି ଧାରାବାହିକ ଓ ସିନେମା ଆବେଦନ ହୋଇଥିବା ଓଡ଼ିଶା ଟେଲି କଳାକାର ସଂଘର ଜଣେ ବରିଷ୍ଠ ସଦସ୍ୟ କହିଛନ୍ତି ।
ତେଣେ କିଛି କଳାକାରଙ୍କ ପୁରସ୍କାର ପାଇବା ଆଶା ଆଶାରେ ରହିଯାଇଥିଲାବେଳେ ଆଉ କିଛି ବୟସର ଅପରାହ୍ଣରେ ତ ପୁଣି କିଛି ଭଗବାନଙ୍କ ଭରସାରେ । ରାଜ୍ୟ ପୁରସ୍କାରଟିଏ ମିଳିଲେ ଛାତି ଗର୍ବରେ ଫୁଲିଉଠେ ବୋଲି ସେହି ଖୁସିର ମୁହୂର୍ତ୍ତ ସାଉଁଟିବାକୁ ଅନେକ କଳାକାର ଅପେକ୍ଷା କରି ବସିଛନ୍ତି । କିନ୍ତୁ ସେ ଭାଗ୍ୟ କାହିଁ? ସଂସ୍କୃତି ବିଭାଗ ପକ୍ଷରୁ କୁହାଯାଇଥିଲା, ୨୦୨୩ ଅର୍ଥାତ୍ ଗତବର୍ଷ ଡିସେମ୍ବର ସୁଦ୍ଧା ସବୁ ପୁରସ୍କାର ସାରି ଦିଆଯିବ । କିନ୍ତୁ ଡିସେମ୍ବର ଯାଇ ୨୦୨୪ ସେପ୍ଟେମ୍ବର ସରିବାକୁ ବସିଲାଣି । ସେ ପୁରସ୍କାର ଆଉ ଫାଇଲ୍ର ଅବସ୍ଥା କ’ଣ ତା’ର ପ୍ରଶ୍ନ କଲେ ଅଜବ ଉତ୍ତର ମିଳୁଛି ।
ଏ ସମ୍ପର୍କରେ ଆରମ୍ଭରୁ ପୁରସ୍କାର ପର୍ବ ଆୟୋଜନ କରି ଆସୁଥିବା ସଂସ୍କୃତି ବିଭାଗ ଅଧୀନ ଓଡ଼ିଶା ସଙ୍ଗୀତ ନାଟକ ଏକାଡେମୀକୁ ପଚାରିଲାବେଳେକୁ ଉତ୍ତର ମିଳୁଛି, ‘ଆମେ କିଛି ବୁଝୁନୁ । ସବୁ ଓଏଫ୍ଡିସି ବୁଝୁଛି ।’ ଓଏଫ୍ଡିସି କହୁଛି, ‘ଆମର ଦାୟିତ୍ୱ ଥିଲା ସ୍କ୍ରିନ୍ରେ ଜୁରୀଙ୍କୁ ସିନେମା ଦେଖାଇବା ଏବଂ ଅତିଥି ସତ୍କାର । ବାକି ଯାହା ସବୁ ସଂସ୍କୃତି ବିଭାଗ ବୁଝି ଆସୁଛି । ସେ ବିଷୟରେ ଆମେ କିଛି ଜାଣିନୁ। କାହିଁକି ଦିଆଯାଉନି, କେଉଁଠି ଅଟକିଛି ତାଙ୍କୁ ପଚାର?’ ଏ ଭିତରେ ଏ ପୁରସ୍କାର ଯେ କ’ଣ ହେବ, ତାହା ସମୟ କହିବ । ଏହା ଦିଆଯିବ କି ନୂଆ ସରକାର ପୁଣି ନୂଆ ରୂପରେଖରେ ତାକୁ କରିବେ ତାହା ଦେଖିବା ବାକି ରହିଲା ।
