ନୂଆଦିଲ୍ଲୀ ୧୪/୦୯: ୧୯୯୯ ମସିହାରେ ସଂଘଟିତ ଇଣ୍ଡିଆନ୍ ଏୟାରଲାଇନ୍ସର ଆଇସି-୮୧୪ ବିମାନ ଅପହରଣକୁ ନେଇ ଏବେ ଦେଶରେ ଚର୍ଚ୍ଚା । ଏହି କ୍ରମରେ ଦେଶର ବର୍ହିବ୍ୟାପାର ମନ୍ତ୍ରୀ ଏସ୍ ଜୟଶଙ୍କର ଗତ ଶୁକ୍ରବାର ଏକ ବିମାନ ଅପହରଣ ସମ୍ପର୍କିତ ନୂଆ ତଥ୍ୟ ଲୋକଲୋଚନକୁ ଆଣିଛନ୍ତି । ୧୯୮୪ ମସିହାରେ ଇଣ୍ଡିଆନ୍ ଏୟାରଲାଇନ୍ସର ବିମାନ ଆଇସି୪୨୧ର ଅପହରଣ ହୋଇଥିଲା । ସେଥିରେ ଜୟଶଙ୍କରଙ୍କ ବାପା ଥିଲେ । ସ୍ୱିଜରଲ୍ୟାଣ୍ଡର ଜେନେଭାଠାରେ ଭାରତୀୟ ସମୁଦାୟକୁ ସମ୍ବୋଧିତ କରିବା ସମୟରେ ଜୟଶଙ୍କର ନେଟ୍ଫ୍ଲିକ୍ସର ସିରିଜ୍ ‘ଆଇସି-୮୧୪: ଦ କାନ୍ଦାହାର ହାଇଜାକ୍’କୁ ନେଇ ଚାଲିଥିବା ବିବାଦ ଉପରେ ଆଲୋଚନା କରିଥିଲେ । ଏହି ଅବସରରେ ଆଇସି-୪୨୧ ବିମାନ ଅପହରଣ ସ୍ମୃତି ତାଙ୍କର ପୁଣି ଥରେ ତାଜା ହୋଇଥିଲା । ଜୟଶଙ୍କର କହିଥିଲେ, ଅପହୃତ ବିମାନରେ ତାଙ୍କ ବାପା ଥିଲେ, ଯିଏକି ଜଣେ ଜଣାଶୁଣା ଭାରତୀୟ ପ୍ରଶାସନିକ କର୍ମଚାରୀ ଥିଲେ । ଜୟଶଙ୍କର ସେତେବେଳେ ଜଣେ ଯୁବ ସରକାରୀ ଅଧିକାରୀ ଥିଲେ । ବିମାନ ଅପହରଣ ସଙ୍କଟର ମୁକାବିଲାରେ ତାଙ୍କୁ ନିୟୋଜିତ କରାଯାଇଥିଲା ।
ଜୟଶଙ୍କର କହିଥିଲେ ‘ବିମାନ ଅପହରଣ ମାମଲାର ପ୍ରବନ୍ଧନ ଟିମ୍ରେ ମୁଁ ଥିଲି । ଅପହରଣର ୩-୪ ଘଣ୍ଟା ପରେ ମୁଁ ମା’ଙ୍କୁ ଫୋନ୍ କରି କହିଲି ଯେ ବିମାନ ଅପହରଣ ହେବା ଯୋଗୁ ମୁଁ ଘରକୁ ଯାଇପାରିବି ନାହିଁ । ସେତେବେଳେ ଜାଣିବାକୁ ପାଇଲି, ସେହି ବିମାନରେ ମୋ ବାପା ଅଛନ୍ତି । ଏହା ଅତ୍ୟନ୍ତ ରୋଚକ ଥିଲା କାରଣ ଗୋଟିଏ ପଟେ ବିମାନ ଅପହରଣ ଉପରେ କାମ କରିବାକୁ ମୁତୟନ ଟିମ୍ର ମୁଁ ଅଂଶ ଥିଲି । ଅନ୍ୟପକ୍ଷେ, ଅପହରଣକୁ ନେଇ ସରକାରଙ୍କ ଉପରେ ଚାପ ପକାଉଥିବା ପରିବାରଙ୍କ ସଦସ୍ୟ ବି ଥିଲି ।’ ଜୟଶଙ୍କରଙ୍କ ବାପା କେ ସୁବ୍ରମଣ୍ୟମ୍ ଜଣେ ବିଶିଷ୍ଟ ଅନ୍ତର୍ଜାତୀୟ ରଣନୀତି ବ୍ୟାପାର ବିଶ୍ଳେଷକ ତଥା ସାମ୍ବାଦିକ ଥିଲେ । ୧୯୮୪ ମସିହା, ଅଗଷ୍ଟ ୨୪ ତାରିଖରେ ଦିଲ୍ଲୀରୁ ଶ୍ରୀନଗର ଯାତ୍ରା କରୁଥିବା ଇଣ୍ଡିଆନ୍ ଏୟାରଲାଇନ୍ସର ବିମାନ ଆଇସି୪୨୧କୁ ଅପହରଣ କରି ପଠାନକୋଟରୁ ଦୁବାଇ ନିଆଯାଇଥିଲା । ଏହି ଘଟଣାର ୩୬ ଘଣ୍ଟା ପରେ ୧୨ ଜଣ ଖଲିସ୍ତାନୀ ଅପହରଣକାରୀ ଆତ୍ମସମର୍ପଣ କଲେ । ସମସ୍ତ ୬୮ ଯାତ୍ରୀ ଓ ୬ ଜଣ ଚାଳକ ଦଳ ସଦସ୍ୟଙ୍କୁ ଉଦ୍ଧାର କରାଗଲା ।
ବିବାଦୀୟ ସିରିଜ୍ ବିଷୟରେ ଜୟଶଙ୍କର କହିଛନ୍ତି ‘ମୁଁ ଫିଲ୍ମ ଦେଖିନାହିଁ । ତେଣୁ ଏ ବିଷୟରେ କୌଣସି ମନ୍ତବ୍ୟ ଦେବାକୁ ଚାହୁଁନାହିଁ ।’ ଅନୁଭବ ସିହ୍ନାଙ୍କ ନେଟ୍ଫ୍ଲିକ୍ସ ସିରିଜ୍ ‘ଆଇସି ୮୧୪: ଦ କାନ୍ଦାହାର ହାଇଜାକ୍’ ରିଲିଜ୍ ପରଠୁ ବିବାଦରେ ରହିଛି । ଫିଲ୍ମ ଦେଖିବା ପରେ ସମୀକ୍ଷକମାନେ ଅଭିଯୋଗ କଲେ ଯେ ନିର୍ମାତା ବିମାନ ଅପହର୍ତ୍ତାଙ୍କ ନାଁକୁ ବଦଳାଇ ‘ଶଙ୍କର’ ଓ ‘ଭୋଲା’ ଦେଇଛନ୍ତି, ଯାହା ଏକ ନିର୍ଦ୍ଦିଷ୍ଟ ଆତଙ୍କବାଦୀ ସମୁଦାୟକୁ ସୁରକ୍ଷା ଦେଉଛି । ପ୍ରକୃତ ଅପହର୍ତ୍ତାଙ୍କ ନାଁ ଇବ୍ରାହିମ ଅତହର, ଶାହିଦ ଅଖତର, ସୟେଦ, ସନ୍ନି, ଅହମଦ କାଜି, ଜହୁର ମିଷ୍ଟ୍ରୀ ଓ ଶାକିର । ଅପହର୍ତ୍ତା ପରସ୍ପରକୁ କୋଡ୍ ନେମ୍- ଭୋଲା, ଶଙ୍କର, ଡକ୍ଟର, ବର୍ଗର୍ ଓ ଚିଫ୍ ଆଦି ନାଁରେ ସମ୍ବୋଧନ କରୁଥିଲେ । ସେହି ନାଁ ସିରିଜ୍ରେ ବ୍ୟବହୃତ ହୋଇଥିଲା । ବିବାଦ ପରେ ନେଟ୍ଫ୍ଲିକ୍ସ ସିରିଜ୍ରେ ବିମାନ ଅପହର୍ତ୍ତାଙ୍କ କୋଡ୍ ନେମ୍ ସହିତ ପ୍ରକୃତ ନାଁକୁ ସାମିଲ କଲା ।
