ଫିରିଙ୍ଗିଆ,୨/୮ :  କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ଅଧୀନରେ ଥିବା ନୂଆପଦରଠାରେ ଗତ ମଙ୍ଗଳବାର ବିଳମ୍ବିତ ରାତିରେ ପଞ୍ଚାୟତ ସମ୍ମୁଖରେ ଥିବା ଏକ ବିରାଟ ଆମ୍ବ ଗଛ ଉପୁଡି ପଡି ପଞ୍ଚାୟତ ସମ୍ମୁଖ ରାସ୍ତା ପାର୍ଶ୍ୱରେ ଥିବା ଦୁଇଟି ଦୋକାନ ଉପରେ ପଡ଼ିଯିବା ଫଳରେ ଦୋକାନ ଘର ଗୁଡିକ ସମ୍ପୂର୍ଣ୍ଣ ଭାଙ୍ଗି ଯାଇ ଲକ୍ଷାଧିକ ଟଙ୍କାର ସମ୍ପତ୍ତି ନଷ୍ଟ ହୋଇଯାଇଥିଲା I 

ଖବରପାଇ ଫିରିଙ୍ଗିଆରୁ ଅଗ୍ନିଶମ ବାହିନୀ ଘଟଣାସ୍ଥଳରେ ପହଂଚି ଦୋକାନ ଉପରେ ପଡ଼ିଥିବା ଗଛକୁ କଟି ବାହାର କରିଥିଲେ I ଏହି ଘଟଣାରେ ଦୋକାନ କରି ନିଜ ପରିବାର ପ୍ରତିପୋଷଣ କରି ଆସୁଥିବା ସେହି ନୁଆଁପଦର ଗାଁର ଚନ୍ଦ୍ରଶେଖର ସାହାଣୀ ଓ ପ୍ରଦୀପ ବେହେରା ନାମକ ଦୁଇ ଜଣ ଦୋକାନୀ ନିଜର ଜୀବିକା ହରାଇବା ସହ ଦୋକାନ ହରାଇ ବେସାହାରା ହୋଇପଡିଛନ୍ତି । ତେବେ ଏହି ଘଟଣାକୁ ପ୍ରାୟ ୧୦ଦିନ ବିତି ଯାଇଥିବାବେଳେ ବର୍ତ୍ତମାନ ପର୍ଯ୍ୟନ୍ତ ଏହି ଦୋକାନୀମାନଙ୍କୁ କୌଣସି ସରକାରୀ ସହାୟତା ଯୋଗାଇ ଦିଆଯାଇ ନାହିଁ I ଯାହା ପାଇଁ ଦୋକାନ ହରାଇଥିବା ଦୋକାନୀମାନଙ୍କୁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେବାକୁ ପଡୁଥିବାବେଳେ ବର୍ତମାନ ବିଭିନ୍ନ ବେସରକାରୀ ଅର୍ଥ ଲଗାଣ କରି ସଂସ୍ଥାମାନଙ୍କଠାରୁ ଋଣ ଆଣି ଦୋକାନ କରି ପରିବାର ପ୍ରତିପୋଷଣ କରି ଆସୁଥିବା ଏହି ଦୋକାନୀ ମାନଙ୍କ ପାଇଁ ବହୁ ସମସ୍ୟା ସୃଷ୍ଟି ହୋଇଛି I 

ସରକାରୀ ସହାୟତାକୁ ଚାହିଁ ବସିଥିବା ଏହି ଦୋକାନୀମାନଙ୍କୁ କୌଣସି ସରକାରୀ ସୁବିଧା ଯୋଗାଇ ଦିଆଯାଇନଥିବାରୁ ଏହି ଦୋକାନୀମାନେ ନିଜ ନିଜ ପରିବାର ସହ କନ୍ଧମାଳ ଜିଲ୍ଲାପାଳ ଆଶିଷ ଇଶ୍ୱର ପାଟିଲଙ୍କୁ ଲିଖିତ ଭାବରେ ଜଣାଇଛନ୍ତି I ଅନ୍ୟପଟେ ଜିଲ୍ଲାପାଳ ମଧ୍ୟ୍ୟ ଏହି ଦୋକାନୀମାନଙ୍କର ଦାବିକୁ ହୃଦୟତାର ସହ ଗ୍ରହଣ କରି ତୁରନ୍ତ ଏହାର ସମଧାନ କରାଯିବା ନେଇ ପ୍ରତିଶ୍ରୁତି ଦେଇଛନ୍ତି I ଅନ୍ୟପଟେ ଏହି ଗରିବ ଅସହାୟ ପରିବାର ଗୁଡିକୁ ତୁରନ୍ତ ସରକାରୀ ସହାୟତା ଯୋଗାଇ ଦେବାକୁ ଗ୍ରାମବାସୀ ମଧ୍ୟ୍ୟ ଦାବି କରିଛନ୍ତି I