ମୋହନା,୧୯/୦୯: କମଳାପୁର ଛକରେ ମର୍ମନ୍ତୁଦ ସଡ଼କ ଦୁର୍ଘଟଣା । ଏହି ଦୁର୍ଘଟଣାରେ ୨ ଜଣ ପ୍ରାଣ ହରାଇଛନ୍ତି । ଉଭୟ ପଣସଢିଅ ଗାଁର ବାସିନ୍ଦା ହୋଇଥିବା ବେଳେ ତନ୍ମଧ୍ୟରୁ ଜଣେ ଭାସ୍କର ଦଲାଇ ବୋଲି ଜଣା ପଡ଼ିଛି ।  ବୁଧବାର ସନ୍ଧ୍ୟାରେ ଗଜପତି ଜିଲ୍ଲା ମୋହନା ଥାନା ଅନ୍ତର୍ଗତ କମଳାପୁର ଛକରେ ଏହି ଦୁର୍ଘଟଣା ଘଟିଛି ।

ସୂଚନା ମୁତାବକ, ବୁଧବାର ସନ୍ଧ୍ୟା ସମୟରେ ଏକ ବାଇକ୍‌ରେ ୨ ଜଣ ଯାତ୍ରା କରୁଥିଲେ । ଏହି ସମୟରେ କମଳାପୁର ଛକରେ  ଉକ୍ତ ବାଇକ୍‌ ସହ ଏକ ଟ୍ରକ୍‌ର ଧକ୍କା ହୋଇଥିଲା । ଏହା ଦେଖି ତୁରନ୍ତ ସ୍ଥାନୀୟଲୋକେ ପୋଲିସକୁ ଖବର ଦେଇଥିଲେ ।  ଏହି ଦୁର୍ଘଟଣାରେ ଘଟଣାସ୍ଥଳରେ ହିଁ ଜଣଙ୍କର ମୃତ୍ୟୁ ହୋଇଥିଲା ।  ଖବର ପାଇ ମୋହନା ପୋଲିସ ପହଞ୍ଚି ଅନ୍ୟଜଣେ ବାଇକ୍‌ ଆରୋହୀଙ୍କୁ ଗୁରୁତର ଅବସ୍ଥାରେ ବ୍ରହ୍ମପୁର ବଡ଼ ମେଡିକାଲରେ ଚିକିତ୍ସା ପାଇଁ ଭର୍ତ୍ତି କରାଇଥିଲେ । ତେବେ ସେଠାରେ ଚିକିତ୍ସାଧୀନ ଅବସ୍ଥାରେ ଆଉ ଜଣେ ବୁଧବାର ରାତିରେ ପ୍ରାଣ ହରାଇଥିଲେ । ଘଟଣାସ୍ଥଳରେ ପୋଲିସ ଉପସ୍ଥିତ ରହି ତଦନ୍ତ ଜାରି ରଖିଛି ।